kya-kya na samne se zamane guzar gae

kyā-kyā na sāmne se zamāne guzar ga.e

ik ġham hamāre saath rahā ham jidhar ga.e

aa jā ki ab to tāb-e-shakebā.ī bhī nahīñ

ai dost tujh ko dekhe zamāne guzar ga.e

kin hādsoñ ke darmiyāñ jiinā paḌā mujhe

dekhe the jitne ḳhvāb suhāne bikhar ga.e

ham se to terā ġham bhī chhupāyā na jā sakā

lab sī liye to palkoñ pe aañsū Thahar ga.e

vo dostoñ ke dost vo ġhairoñ ke ġham-gusār

vo pur-ḳhulūs log na jaane kidhar ga.e

sunte haiñ din shabāb ke jān-e-hayāt meñ

lekin vo sub.h-o-shām jo rote guzar ga.e

ifrāt-e-ġham hī ek nahīñ maut kā sabab

fart-e-ḳhushī se bhī to ka.ī log mar ga.e

ai yād-e-yār aa ki kamī dard-e-dil meñ hai

ai chashm-e-yār dekh ka.ī zaḳhm bhar ga.e

dil bhī hai zaḳhm-zaḳhm jigar bhī lahū-lahū

tīr-e-nigāh-e-yār kahāñ tak utar ga.e

'nusrat' vo is se pahle to itne hasīñ na the

aa kar mirī nigāh meñ jitne sañvar ga.e

kya-kya na samne se zamane guzar gae

ek gham hamare sath raha hum jidhar gae

aa ja ki ab to tab-e-shakebai bhi nahin

ai dost tujh ko dekhe zamane guzar gae

kin hadson ke darmiyan jina paDa mujhe

dekhe the jitne KHwab suhane bikhar gae

hum se to tera gham bhi chhupaya na ja saka

lab si liye to palkon pe aansu Thahar gae

wo doston ke dost wo ghairon ke gham-gusar

wo pur-KHulus log na jaane kidhar gae

sunte hain din shabab ke jaan-e-hayat mein

lekin wo subh-o-sham jo rote guzar gae

ifraat-e-gham hi ek nahin maut ka sabab

fart-e-KHushi se bhi to kai log mar gae

ai yaad-e-yar aa ki kami dard-e-dil mein hai

ai chashm-e-yar dekh kai zaKHm bhar gae

dil bhi hai zaKHm-zaKHm jigar bhi lahu-lahu

tir-e-nigah-e-yar kahan tak utar gae

'nusrat' wo is se pahle to itne hasin na the

aa kar meri nigah mein jitne sanwar gae