manus ho chuke hain tere aastan se hum

mānūs ho chuke haiñ tire āstāñ se ham

ab zindagī badal ke uTheñge yahāñ se ham

tanhā.iyāñ diloñ kī bhalā kis tarah miTeñ

kuchh ajnabī se aap haiñ kuchh bad-gumāñ se ham

ab ālam-e-sukūt hī rūdād-e-ishq hai

kuchh arz-e-hāl kar nahīñ sakte zabāñ se ham

hai rāz-e-bahar-e-ishq ajab hairat-āfrīñ

ye dekhnā hai Duub ke ubhreñ kahāñ se ham

barbād baar baar nasheman huā magar

ġhāfil haiñ aaj tak nigah-e-bāġhbāñ se ham

miltā kisī nazar kā sahārā agar hameñ

thakte na yuuñ hayāt ke bār-e-girāñ se ham

hāsil huā vo lutf asīrī meñ ai 'nasīm'

tā umr be-niyāz rahe āshiyāñ se ham

manus ho chuke hain tere aastan se hum

ab zindagi badal ke uThenge yahan se hum

tanhaiyan dilon ki bhala kis tarah miTen

kuchh ajnabi se aap hain kuchh bad-guman se hum

ab aalam-e-sukut hi rudad-e-ishq hai

kuchh arz-e-haal kar nahin sakte zaban se hum

hai raaz-e-bahar-e-ishq ajab hairat-afrin

ye dekhna hai Dub ke ubhren kahan se hum

barbaad bar bar nasheman hua magar

ghafil hain aaj tak nigah-e-baghban se hum

milta kisi nazar ka sahaara agar hamein

thakte na yun hayat ke bar-e-giran se hum

hasil hua wo lutf asiri mein ai 'nasim'

ta umr be-niyaz rahe aashiyan se hum