main yaad hun unki ye unhen yaad nahin hai

maiñ yaad huuñ un kī ye unheñ yaad nahīñ hai

mujh sā bhī jahāñ meñ koī nāshād nahīñ hai

mahbūb kā har zulm hai ehsān se behtar

bedād jise kahte haiñ bedād nahīñ hai

Dartā hai ki charchā na tire zulm kā ho jaa.e

lab par tire mazlūm ke fariyād nahīñ hai

har gosha-e-ālam nazar-e-ġhaur se dekhā

ik dil bhī ġham-o-ranj se āzād nahīñ hai

sab mahv kiyā ik nigah-e-lutf se tū ne

pichhlā tirā koī bhī sitam yaad nahīñ hai

mahrūm koī kyoñ ho tire daur-e-sitam meñ

bad-baḳht hai jo kushta-e-bedād nahīñ hai

vāqif hī nahīñ zauq-e-asīrī se vo hargiz

jo kushta-e-be-mehrī-e-sayyād nahīñ hai

thā maiñ jo sitam-dost kiyā tū ne sitam tark

kuchh kam ye sitam ai sitam-ījād nahīñ hai

kyā baat hai ai dil tujhe chup lag ga.ī kaisī

kyoñ mashġhala-e-nāla-o-fariyād nahīñ hai

kyoñ mujh ko asīrī meñ rihā.ī kī havas ho

kyā dil meñ mire ulfat-e-sayyād nahīñ hai

kahne ko to yuuñ sher sabhī kahte haiñ 'nashtar'

vāqif nahīñ jo fan se vo ustād nahīñ hai

main yaad hun un ki ye unhen yaad nahin hai

mujh sa bhi jahan mein koi nashad nahin hai

mahbub ka har zulm hai ehsan se behtar

bedad jise kahte hain bedad nahin hai

Darta hai ki charcha na tere zulm ka ho jae

lab par tere mazlum ke fariyaad nahin hai

har gosha-e-alam nazar-e-ghaur se dekha

ek dil bhi gham-o-ranj se aazad nahin hai

sab mahw kiya ek nigah-e-lutf se tu ne

pichhla tera koi bhi sitam yaad nahin hai

mahrum koi kyon ho tere daur-e-sitam mein

bad-baKHt hai jo kushta-e-bedad nahin hai

waqif hi nahin zauq-e-asiri se wo hargiz

jo kushta-e-be-mehri-e-sayyaad nahin hai

tha main jo sitam-dost kiya tu ne sitam tark

kuchh kam ye sitam ai sitam-ijad nahin hai

kya baat hai ai dil tujhe chup lag gai kaisi

kyon mashghala-e-nala-o-fariyaad nahin hai

kyon mujh ko asiri mein rihai ki hawas ho

kya dil mein mere ulfat-e-sayyaad nahin hai

kahne ko to yun sher sabhi kahte hain 'nashtar'

waqif nahin jo fan se wo ustad nahin hai