maut han bar-haq hai lekin zindagi fani kahan

maut haañ bar-haq hai lekin zindagī faanī kahāñ

qissa-e-hastī ba-anjām-e-tan-āsānī kahāñ

aap ke sajde meñ rūh-e-sajda ai 'mānī' kahāñ

kaash ye ehsās hotā ḳham hai peshānī kahāñ

mushkiloñ se ruuh ko mānūs honā chāhiye

zindagī dushvāriyoñ hī meñ hai āsānī kahāñ

ai zuleḳhā bartar-az-insāniyat kā zikr chhoḌ

dard se begāna rahnā kār-e-insānī kahāñ

tishna-e-maqsūd dhokhā hai jhalak ummīd kī

sirf ik manzar sarāb-āsā hai ye paanī kahāñ

kaaT dī bistar pe añgāroñ ke saarī zindagī

ai tamannā is se baḌh kar koī qurbānī kahāñ

manzil-e-hairat meñ laayā imtihān-e-tāb-e-dīd

dekhiye le jā.egī ab dil kī hairānī kahāñ

kasrat-o-vahdat meñ nisbat hai shuā-o-shams kī

ek hī jalva hai jalvoñ kī farāvānī kahāñ

miT ke mere ghar kī raunaq ālam-e-ibrat banī

dasht bhī vīrāñ hai lekin naf-e-vīrānī kahāñ

aish-e-āzādī kabhī miltā to hotā ranj-e-qaid

mustaqil jam.iyat-e-dil hai pareshānī kahāñ

ye fazā-e-fikr ai 'mānī' hai me.arāj-e-suḳhan

ab magar taḳh.īl meñ vo barq-sāmānī kahāñ

maut han bar-haq hai lekin zindagi fani kahan

qissa-e-hasti ba-anjam-e-tan-asani kahan

aap ke sajde mein ruh-e-sajda ai 'mani' kahan

kash ye ehsas hota KHam hai peshani kahan

mushkilon se ruh ko manus hona chahiye

zindagi dushwariyon hi mein hai aasani kahan

ai zuleKHa bartar-az-insaniyat ka zikr chhoD

dard se begana rahna kar-e-insani kahan

tishna-e-maqsud dhokha hai jhalak ummid ki

sirf ek manzar sarab-asa hai ye pani kahan

kaT di bistar pe angaron ke sari zindagi

ai tamanna is se baDh kar koi qurbani kahan

manzil-e-hairat mein laya imtihan-e-tab-e-did

dekhiye le jaegi ab dil ki hairani kahan

kasrat-o-wahdat mein nisbat hai shua-o-shams ki

ek hi jalwa hai jalwon ki farawani kahan

miT ke mere ghar ki raunaq aalam-e-ibrat bani

dasht bhi viran hai lekin naf-e-virani kahan

aish-e-azadi kabhi milta to hota ranj-e-qaid

mustaqil jamiyat-e-dil hai pareshani kahan

ye faza-e-fikr ai 'mani' hai mearaj-e-suKHan

ab magar taKHil mein wo barq-samani kahan