na lae dekhne ki tab jalwa dekhne wale

na laa.e dekhne kī taab jalva dekhne vaale

tamāshā ban ga.e ḳhud hī tamāshā dekhne vaale

sarāpā tanz huuñ aur tanz bhī manshā-e-fitrat kā

mujhe kyā dekhtā hai jā guzar jā dekhne vaale

kahīñ terī nazar afsāna-e-mūsā na ban jaa.e

zarā hushiyār rahnā dil kī duniyā dekhne vaale

bahar-sūrat tujhī ko dekhte haiñ jis tarah dekhūñ

terī nazroñ se bach kar terā jalva dekhne vaale

abhī parde ta.ayyun ke kahāñ uTThe haiñ ai ġhāfil

abhī dekhā hī kyā hai tū ne jalva dekhne vaale

tū apne mansab-e-ālī se bhī ai kaash vāqif ho

ba-hairat jānib-e-auj-e-surayyā dekhne vaale

kamāl-e-husn kā nazzāra nā-mumkin sahī 'anvar'

magar kuchh dekh hī lete haiñ jalva dekhne vaale

na lae dekhne ki tab jalwa dekhne wale

tamasha ban gae KHud hi tamasha dekhne wale

sarapa tanz hun aur tanz bhi mansha-e-fitrat ka

mujhe kya dekhta hai ja guzar ja dekhne wale

kahin teri nazar afsana-e-musa na ban jae

zara hushiyar rahna dil ki duniya dekhne wale

bahar-surat tujhi ko dekhte hain jis tarah dekhun

teri nazron se bach kar tera jalwa dekhne wale

abhi parde tayyun ke kahan uTThe hain ai ghafil

abhi dekha hi kya hai tu ne jalwa dekhne wale

tu apne mansab-e-ali se bhi ai kash waqif ho

ba-hairat jaanib-e-auj-e-surayya dekhne wale

kamal-e-husn ka nazzara na-mumkin sahi 'anwar'

magar kuchh dekh hi lete hain jalwa dekhne wale