na maut hijr mein aai na mujhko KHwab aaya

na maut hijr meñ aa.ī na mujh ko ḳhvāb aaya

ye kis azaab meñ maiñ huuñ ye kyā azaab aaya

pas-az-fanā mire lāshe ko pā.emāl kiyā

ye dil meñ kyā tire ai ḳhānumāñ-ḳharāb aaya

tavāf-e-ka.aba kā ham ko savāb ḳhaak huā

qadam qadam pe ḳhayāl-e-ḳhum-e-sharāb aaya

hazār da.ave haiñ dar-parda zulm karne par

ġhazab huā jo vo mahshar meñ be-naqāb aaya

ḳhatā adū kī jafā mujh pe munsifī yahī hai

ye kyā ḳhayāl tujhe shoḳh pur-itāb aaya

ilāhī aaj huā kyā vagarna thā ye thā

udhar gayā mirā ḳhat aur idhar javāb aaya

huā hai siine meñ shāyad jigar do paara 'hayā'

bajā.e ashk jo āñkhoñ se ḳhūn-e-nāb aaya

na maut hijr mein aai na mujh ko KHwab aaya

ye kis azab mein main hun ye kya azab aaya

pas-az-fana mere lashe ko paemal kiya

ye dil mein kya tere ai KHanuman-KHarab aaya

tawaf-e-kaba ka hum ko sawab KHak hua

qadam qadam pe KHayal-e-KHum-e-sharab aaya

hazar dawe hain dar-parda zulm karne par

ghazab hua jo wo mahshar mein be-naqab aaya

KHata adu ki jafa mujh pe munsifi yahi hai

ye kya KHayal tujhe shoKH pur-itab aaya

ilahi aaj hua kya wagarna tha ye tha

udhar gaya mera KHat aur idhar jawab aaya

hua hai sine mein shayad jigar do para 'haya'

bajae ashk jo aankhon se KHun-e-nab aaya