naKHl-e-umid-o-arzu be-barg-o-bar hai

naḳhl-e-umīd-o-ārzū be-barg-o-bār hai

nākāmī-e-hayāt pe dil sharmsār hai

dāmān-e-sabr hijr meñ go tār-tār hai

va.ade kā un ke phir bhī hameñ e.atibār hai

fikr-e-jahāñ mujhe na ġham-e-rozgār hai

phir bhī na jaane kis liye dil be-qarār hai

shām-e-firāq shiddat-e-ġham be-shumār hai

mushtāq-e-dīd aañkh bhī ab ashk-bār hai

gulshan meñ un ko dekh ke mahv-e-ḳhirām-e-nāz

samjhī nigāh-e-shauq ki raqs-e-bahār hai

yuuñ to hazār baar use aazmā chuke

phir e.atibār-e-va.ada-e-ġhaflat-shi.ār hai

muddat huī hai qat-e-ta.alluq kiye 'nadīm'

us jān-e-intizār kā phir intizār hai

naKHl-e-umid-o-arzu be-barg-o-bar hai

nakaami-e-hayat pe dil sharmsar hai

daman-e-sabr hijr mein go tar-tar hai

wade ka un ke phir bhi hamein eatibar hai

fikr-e-jahan mujhe na gham-e-rozgar hai

phir bhi na jaane kis liye dil be-qarar hai

sham-e-firaq shiddat-e-gham be-shumar hai

mushtaq-e-did aankh bhi ab ashk-bar hai

gulshan mein un ko dekh ke mahw-e-KHiram-e-naz

samjhi nigah-e-shauq ki raqs-e-bahaar hai

yun to hazar bar use aazma chuke

phir eatibar-e-wada-e-ghaflat-shiar hai

muddat hui hai qat-e-talluq kiye 'nadim'

us jaan-e-intizar ka phir intizar hai