nigahon se nigahen samne hote hi jab laDiyan

nigāhoñ se nigāheñ sāmne hote hī jab laḌiyāñ

yakāyak khul ga.iiñ donoñ taraf se dil kī kuljhaḌiyāñ

ye ab kī shab-barāt ai yaar tujh bin ham pe yuuñ guzrī

havā.ī to hamārī aah thī aur ashk phul-jhaḌiyāñ

hamārī aah jaise laḳht-e-dil se guth ke nikle hai

kahīñ dekhī haiñ tiiñ is lutf se phūloñ kī bhī chhaḌiyāñ

muā majnūñ to ik muddat huī par ab tak is ġham meñ

kareñ haiñ naala mil kar ham-digar zanjīr kī kaḌiyāñ

zamīñ se ye lago nahīñ gul bhalā kis tarah nikle haiñ

jo lākhoñ sūrateñ dilkash nahīñ is ḳhaak meñ gaḌiyāñ

kabhū TuuTā na mizhgāñ se mirī aañsū kā zanjīrā

na jaane ashk ke qatre the yā motī kī ye laḌiyāñ

bhare aate haiñ 'qā.em' pai-ba-pai is tarah aañsū se

kahe tū chashm ko merī ki haiñ ye rahT kī ghaḌiyāñ

nigahon se nigahen samne hote hi jab laDiyan

yakayak khul gain donon taraf se dil ki kuljhaDiyan

ye ab ki shab-baraat ai yar tujh bin hum pe yun guzri

hawai to hamari aah thi aur ashk phul-jhaDiyan

hamari aah jaise laKHt-e-dil se guth ke nikle hai

kahin dekhi hain tin is lutf se phulon ki bhi chhaDiyan

mua majnun to ek muddat hui par ab tak is gham mein

karen hain nala mil kar ham-digar zanjir ki kaDiyan

zamin se ye lago nahin gul bhala kis tarah nikle hain

jo lakhon suraten dilkash nahin is KHak mein gaDiyan

kabhu TuTa na mizhgan se meri aansu ka zanjira

na jaane ashk ke qatre the ya moti ki ye laDiyan

bhare aate hain 'qaem' pai-ba-pai is tarah aansu se

kahe tu chashm ko meri ki hain ye rahT ki ghaDiyan