tanz ke tir-o-nashtar is par komal aur rasile honT

tanz ke tīr-o-nashtar is par komal aur rasīle hoñT

jin kā maarā maañg na paa.e paanī vo zahrīle hoñT

mujh ko dilāse dene vaale pahle apnā haal to dekh

champa.ī aariz utrā chehra suunī āñkheñ piile hoñT

jaan ga.e ai shoḳh tujhe ai ahd-shikan pahchān ga.e

kahtī hai kuchh aur hī chitvan laakh tarāsheñ hiile hoñT

mai kī mazammat aur janāb-e-shaiḳh phir is chaTḳhāre se

raal yaqīnan Tapkī hogī varna kyoñ haiñ giile hoñT

dil par ḳhanjar chale 'mubārak' lekin tū fariyād na kar

zabt-e-mohabbat kā hai taqāzā is mahfil meñ sī le hoñT

tanz ke tir-o-nashtar is par komal aur rasile honT

jin ka mara mang na pae pani wo zahrile honT

mujh ko dilase dene wale pahle apna haal to dekh

champai aariz utra chehra suni aankhen pile honT

jaan gae ai shoKH tujhe ai ahd-shikan pahchan gae

kahti hai kuchh aur hi chitwan lakh tarashen hile honT

mai ki mazammat aur janab-e-shaiKH phir is chaTKHare se

ral yaqinan Tapki hogi warna kyon hain gile honT

dil par KHanjar chale 'mubarak' lekin tu fariyaad na kar

zabt-e-mohabbat ka hai taqaza is mahfil mein si le honT