tha najm-e-baKHt-tira muqabil tamam raat

thā najm-e-baḳht-tīra muqābil tamām raat

āñkhoñ tale phirā mire qātil tamām raat

hārūt saañ zaqan meñ rahā dil tamām raat

guzrī miyāna-e-chah-e-bābil tamām raat

kis gul ne gul kiyā thā mirī sham-e-gor ko

thā qabr par hujūm-e-anādil tamām raat

dhabba lage na rañg-e-safed-o-siyāh meñ

hai go tamām din ke muqābil tamām raat

raushan thī sub.h tak mire madfan pe sham-e-tūr

royā khaḌe khaḌe mirā qātil tamām raat

ai rashk-e-mehr-o-mah tire muñh par nisār hai

sūraj tamām din mah-e-kāmil tamām raat

jaatī thī yaad gesū o ruḳh meñ falak pe aah

mahtāb thā asīr-e-salāsil tamām raat

karte haiñ gul jo chaak garebāñ tamām din

sunte haiñ nāla-hā-e-anādil tamām raat

kahtā thā 'arsh' sach meñ samajhtā thā jhuuT yaar

kartā rahā hai haq ko vo bātil tamām raat

tha najm-e-baKHt-tira muqabil tamam raat

aankhon tale phira mere qatil tamam raat

haarut san zaqan mein raha dil tamam raat

guzri miyana-e-chah-e-babil tamam raat

kis gul ne gul kiya tha meri sham-e-gor ko

tha qabr par hujum-e-anadil tamam raat

dhabba lage na rang-e-safed-o-siyah mein

hai go tamam din ke muqabil tamam raat

raushan thi subh tak mere madfan pe sham-e-tur

roya khaDe khaDe mera qatil tamam raat

ai rashk-e-mehr-o-mah tere munh par nisar hai

suraj tamam din mah-e-kaamil tamam raat

jati thi yaad gesu o ruKH mein falak pe aah

mahtab tha asir-e-salasil tamam raat

karte hain gul jo chaak gareban tamam din

sunte hain nala-ha-e-anadil tamam raat

kahta tha 'arsh' sach mein samajhta tha jhuT yar

karta raha hai haq ko wo baatil tamam raat