teri jafa ba-KHuda bais-e-gazand nahin

tirī jafā ba-ḳhudā bā.is-e-gazand nahīñ

mazāq-e-ishq tirā kuchh magar buland nahīñ

niyāz-e-husn ke qābil to maiñ nahīñ lekin

ye kis tarah se kahūñ maiñ niyāz-mand nahīñ

use ḳhabar nahīñ kyā shai hai ishrat-e-abadī

jo tere dard-e-mohabbat se bahra-mand nahīñ

baḌā ho koī to ḳhātir meñ ham nahīñ laate

jo past ho ke mohabbat meñ sar-buland nahīñ

nazar ke sāmne phirtī hai kis liye har dam

vo ik adā jo use ḳhud bhī kuchh pasand nahīñ

nahīñ ki sharm-o-hayā vasf-e-ḳhās hai us kā

ki ye hijābī-o-shoḳhī meñ vo bhī band nahīñ

hazār kaam haiñ aise jinheñ maiñ kartā huuñ

agarche dil se mujhe ek bhī pasand nahīñ

satāne vāloñ se apne ye pūchhtā huuñ 'jalīl'

tumhāre sīnoñ meñ kyā qalb-e-dard-mand nahīñ

teri jafa ba-KHuda bais-e-gazand nahin

mazaq-e-ishq tera kuchh magar buland nahin

niyaz-e-husn ke qabil to main nahin lekin

ye kis tarah se kahun main niyaz-mand nahin

use KHabar nahin kya shai hai ishrat-e-abadi

jo tere dard-e-mohabbat se bahra-mand nahin

baDa ho koi to KHatir mein hum nahin late

jo past ho ke mohabbat mein sar-buland nahin

nazar ke samne phirti hai kis liye har dam

wo ek ada jo use KHud bhi kuchh pasand nahin

nahin ki sharm-o-haya wasf-e-KHas hai us ka

ki ye hijabi-o-shoKHi mein wo bhi band nahin

hazar kaam hain aise jinhen main karta hun

agarche dil se mujhe ek bhi pasand nahin

satane walon se apne ye puchhta hun 'jalil'

tumhaare sinon mein kya qalb-e-dard-mand nahin