tumhaare dard ko marqum kar ke dekhunga

tumhāre dard ko marqūm kar ke dekhūñgā

phir apne aap ko maġhmūm kar ke dekhūñgā

maiñ thak chukā huuñ bahut ab tirī galī kā pata

kisī faqīr se ma.alūm kar ke dekhūñgā

ḳhabar milī hai tire lab shahad se shīrīñ haiñ

yaqīñ nahīñ hai magar chuum kar ke dekhūñgā

kahāñ kahāñ se shikasta kiyā hai logoñ ne

maiñ apne jism ko ab zoom kar ke dekhūñgā

kabhī to va.ada nibhāne kī baat kī hogī

ḳhutūt-e-yār ko maqsūm kar ke dekhūñgā

kisī ke sāmne ā.ūñgā jā-ba-jā aksar

kisī ko diid se mahrūm kar ke dekhūñgā

sunā hai maiñ ne ki tum sādgī pe vaarī ho

so apnī shoḳhiyāñ ma.asūm kar ke dekhūñgā

yahāñ pe kitne adālat pasand rahte haiñ

ġharīb-e-shahr ko mazlūm kar ke dekhūñgā

jamāl-e-yār ko sher-o-suḳhan ke dhāge meñ

qalam kī suuī se manzūm kar ke dekhūñgā

tumhāre saare ḳhad-o-ḳhāl ko bayāñ kar ke

raqam maiñ husn kā mafhūm kar ke dekhūñgā

kutub sajā.ūñgā kamre meñ chār-sū apne

sajā sajā ke unheñ jhuum kar ke dekhūñgā

ḳhudā kare mujhe mil jaa.e ham-safar 'mahvar'

dayār-e-ishq meñ showrōm kar ke dekhūñgā

tumhaare dard ko marqum kar ke dekhunga

phir apne aap ko maghmum kar ke dekhunga

main thak chuka hun bahut ab teri gali ka pata

kisi faqir se malum kar ke dekhunga

KHabar mili hai tere lab shahad se shirin hain

yaqin nahin hai magar chum kar ke dekhunga

kahan kahan se shikasta kiya hai logon ne

main apne jism ko ab zoom kar ke dekhunga

kabhi to wada nibhane ki baat ki hogi

KHutut-e-yar ko maqsum kar ke dekhunga

kisi ke samne aaunga ja-ba-ja aksar

kisi ko did se mahrum kar ke dekhunga

suna hai main ne ki tum sadgi pe wari ho

so apni shoKHiyan masum kar ke dekhunga

yahan pe kitne adalat pasand rahte hain

gharib-e-shahr ko mazlum kar ke dekhunga

jamal-e-yar ko sher-o-suKHan ke dhage mein

qalam ki sui se manzum kar ke dekhunga

tumhaare sare KHad-o-KHal ko bayan kar ke

raqam main husn ka mafhum kar ke dekhunga

kutub sajaunga kamre mein chaar-su apne

saja saja ke unhen jhum kar ke dekhunga

KHuda kare mujhe mil jae ham-safar 'mahwar'

dayar-e-ishq mein showroom kar ke dekhunga