wahan main jaun magar kuchh mera bhala bhi to ho

vahāñ maiñ jā.ūñ magar kuchh mirā bhalā bhī to ho

vo phuul bāġh-e-badan meñ khilā huā bhī to ho

ḳhudā ko pūjne lag jā.ūñ chhoḌ kar but ko

butoñ ke jaise badan vaalā vo ḳhudā bhī to ho

maiñ masjidoñ ke kināre se lauT aatā huuñ

kahīñ savāb kā dariyā bahā huā bhī to ho

bahut miThās bhī be-zā.iqa sī hone lagī

vo ḳhush-mizāj kisī baat par ḳhafā bhī to ho

use mujhe hī uThā kar gale lagānā thā

ki us ke paañv koī aur yuuñ paḌā bhī to ho

wahan main jaun magar kuchh mera bhala bhi to ho

wo phul bagh-e-badan mein khila hua bhi to ho

KHuda ko pujne lag jaun chhoD kar but ko

buton ke jaise badan wala wo KHuda bhi to ho

main masjidon ke kinare se lauT aata hun

kahin sawab ka dariya baha hua bhi to ho

bahut miThas bhi be-zaiqa si hone lagi

wo KHush-mizaj kisi baat par KHafa bhi to ho

use mujhe hi uTha kar gale lagana tha

ki us ke panw koi aur yun paDa bhi to ho