wo jin ki chhanw mein pale baDe hue

vo jin kī chhāñv meñ pale baḌe hue

idhar udhar paḌe haiñ sab kaTe hue

hazīmatoñ ke karb kī alāmateñ

charāġh taaq taaq haiñ bujhe hue

tamām tiir dushmanoñ se jā mile

kamān-dār kyā kareñ DaTe hue

visāl-rut meñ hijr kī hikāyateñ

udaas kar ga.ī haiñ dil khule hue

gharoñ kī raunaqeñ vahī jo thiiñ kabhī

magar bhulā diye ga.e ga.e hue

tanī tanī sī gardaneñ jhukī huī

duā ko haath haiñ sabhī uThe hue

wo jin ki chhanw mein pale baDe hue

idhar udhar paDe hain sab kaTe hue

hazimaton ke karb ki alamaten

charagh taq taq hain bujhe hue

tamam tir dushmanon se ja mile

kaman-dar kya karen DaTe hue

visal-rut mein hijr ki hikayaten

udas kar gai hain dil khule hue

gharon ki raunaqen wahi jo thin kabhi

magar bhula diye gae gae hue

tani tani si gardanen jhuki hui

dua ko hath hain sabhi uThe hue