wo mujhko dastiyab baDi der tak raha

vo mujh ko dastiyāb baḌī der tak rahā

maiñ us kā intiḳhāb baḌī der tak rahā

dekhā thā us ne muḌ ke mujhe ik nazar to phir

āñkhoñ meñ iztirāb baḌī der tak rahā

ḳhushbū bhī qaid ho ga.ī lafzoñ ke jaal meñ

ḳhat meñ vo ik gulāb baḌī der tak rahā

chehre pe phailne lagī ta.abīr kī thakan

palkoñ pe ek ḳhvāb baḌī der tak rahā

pahle-pahal to ishq ke ādāb ye bhī the

maiñ aap vo janāb baḌī der tak rahā

bārish kī tarah mujh pe barastā rahā vo shaḳhs

ban kar vo ik sahāb baḌī der tak rahā

phir sub.h tak hī chhat pe sitāre muqīm the

khiḌkī meñ māhtāb baḌī der tak rahā

us ke savāl par sabhī alfāz mar ga.e

ashkoñ meñ phir javāb baḌī der tak rahā

gin-gin ke mujh pe kitne vo ehsān kar gayā

poroñ pe phir hisāb baḌī der tak rahā

wo mujh ko dastiyab baDi der tak raha

main us ka intiKHab baDi der tak raha

dekha tha us ne muD ke mujhe ek nazar to phir

aankhon mein iztirab baDi der tak raha

KHushbu bhi qaid ho gai lafzon ke jal mein

KHat mein wo ek gulab baDi der tak raha

chehre pe phailne lagi tabir ki thakan

palkon pe ek KHwab baDi der tak raha

pahle-pahal to ishq ke aadab ye bhi the

main aap wo janab baDi der tak raha

barish ki tarah mujh pe barasta raha wo shaKHs

ban kar wo ek sahab baDi der tak raha

phir subh tak hi chhat pe sitare muqim the

khiDki mein mahtab baDi der tak raha

us ke sawal par sabhi alfaz mar gae

ashkon mein phir jawab baDi der tak raha

gin-gin ke mujh pe kitne wo ehsan kar gaya

poron pe phir hisab baDi der tak raha