wo raat be-panah thi aur main gharib tha

vo raat be-panāh thī aur maiñ ġharīb thā

vo jis ne ye charāġh jalāyā ajiib thā

vo raushnī ki aañkh uThā.ī nahīñ ga.ī

kal mujh se merā chāñd bahut hī qarīb thā

dekhā mujhe to tab.a ravāñ ho ga.ī mirī

vo muskurā diyā to maiñ shā.er adiib thā

rakhtā na kyuuñ maiñ ruuh o badan us ke sāmne

vo yuuñ bhī thā tabīb vo yuuñ bhī tabīb thā

har silsila thā us kā ḳhudā se milā huā

chup ho ki lab-kushā ho balā kā ḳhatīb thā

mauj-e-nashāt o sail-e-ġham-e-jāñ the ek saath

gulshan meñ naġhma-sañj ajab andalīb thā

maiñ bhī rahā huuñ ḳhalvat-e-jānāñ meñ ek shaam

ye ḳhvāb hai yā vāqa.ī maiñ ḳhush-nasīb thā

harf-e-duā o dast-e-saḳhāvat ke baab meñ

ḳhud merā tajraba hai vo be-had najīb thā

dekhā hai us ko ḳhalvat o jalvat meñ bār-hā

vo aadmī bahut hī ajīb-o-ġharīb thā

likkho tamām umar magar phir bhī tum 'alīm'

us ko dikhā na paao vo aisā habīb thā

wo raat be-panah thi aur main gharib tha

wo jis ne ye charagh jalaya ajib tha

wo raushni ki aankh uThai nahin gai

kal mujh se mera chand bahut hi qarib tha

dekha mujhe to taba rawan ho gai meri

wo muskura diya to main shaer adib tha

rakhta na kyun main ruh o badan us ke samne

wo yun bhi tha tabib wo yun bhi tabib tha

har silsila tha us ka KHuda se mila hua

chup ho ki lab-kusha ho bala ka KHatib tha

mauj-e-nashat o sail-e-gham-e-jaan the ek sath

gulshan mein naghma-sanj ajab andalib tha

main bhi raha hun KHalwat-e-jaanan mein ek sham

ye KHwab hai ya waqai main KHush-nasib tha

harf-e-dua o dast-e-saKHawat ke bab mein

KHud mera tajraba hai wo be-had najib tha

dekha hai us ko KHalwat o jalwat mein bar-ha

wo aadmi bahut hi ajib-o-gharib tha

likkho tamam umar magar phir bhi tum 'alim'

us ko dikha na pao wo aisa habib tha