ye nafs hamara dushman hai ise rah pe lana mushkil hai

ye nafs hamārā dushman hai ise raah pe laanā mushkil hai

auroñ ko manānā āsāñ hai is dil ko manānā mushkil hai

aatā hai hameñ bhī ai vaa.iz terī hī tarah taqrīr kā fan

bātoñ kā banānā āsāñ hai kuchh kar ke dikhānā mushkil hai

do lafz zabāñ par aate haiñ rishte qaa.em ho jaate haiñ

rishtoñ kā banānā āsāñ hai rishtoñ kā nibhānā mushkil hai

maanā ki sabhī insān hī haiñ ehsās bhī hai jazbāt bhī haiñ

hāthoñ kā milānā āsāñ hai par saath nibhānā mushkil hai

isrāf ke jo haiñ shaidā.ī shaitān ke hote haiñ bhaa.ī

paisoñ kā luTānā āsāñ hai paisoñ kā kamānā mushkil hai

haq baat jise tum kahte ho haq hai ki yahī sachchā.ī hai

par ye bhī haqīqat hai yaaro mānegā zamāna mushkil hai

insān ke hāthoñ meñ jāzib ta.amīr bhī hai taḳhrīb bhī hai

sau sham.eñ bujhānā āsāñ hai ik sham.a jalānā mushkil hai

ye nafs hamara dushman hai ise rah pe lana mushkil hai

auron ko manana aasan hai is dil ko manana mushkil hai

aata hai hamein bhi ai waiz teri hi tarah taqrir ka fan

baaton ka banana aasan hai kuchh kar ke dikhana mushkil hai

do lafz zaban par aate hain rishte qaem ho jate hain

rishton ka banana aasan hai rishton ka nibhana mushkil hai

mana ki sabhi insan hi hain ehsas bhi hai jazbaat bhi hain

hathon ka milana aasan hai par sath nibhana mushkil hai

israf ke jo hain shaidai shaitan ke hote hain bhai

paison ka luTana aasan hai paison ka kamana mushkil hai

haq baat jise tum kahte ho haq hai ki yahi sachchai hai

par ye bhi haqiqat hai yaro manega zamana mushkil hai

insan ke hathon mein jazib tamir bhi hai taKHrib bhi hai

sau shamen bujhana aasan hai ek shama jalana mushkil hai