sar-e-daur-e-falak bhi dekhun apne ru-ba-ru TuTa

sar-e-daur-e-falak bhī dekhūñ apne rū-ba-rū TuuTā

ki sang-e-mohtasib se pā-e-ḳhum dast-e-subū TuuTā

kahāñ aate mayassar tujh se mujh ko ḳhud-numā itne

huā yuuñ ittifāq ā.īna mere rū-ba-rū TuuTā

kaf-e-chālāk meñ terī jo thā sar-rishta jānoñ kā

garebāñ se mire har ik tirā Tāñkā rafū TuuTā

tarāvat thī chaman meñ sarv goyā ashk-e-qumrī se

udhar āñkheñ muñdīñ us kī ki īdhar āb-e-jū TuuTā

ḳhatar kar tū na lag chal ai sabā us zulf se itnā

balā āvegī tere sar jo us kā ek mū TuuTā

vo be-kas kyā kare kah tū rahī dil hī kī dil hī meñ

nipaT bejā tirā dil 'mīr' se ai aarzū TuuTā

sar-e-daur-e-falak bhi dekhun apne ru-ba-ru TuTa

ki sang-e-mohtasib se pa-e-KHum dast-e-subu TuTa

kahan aate mayassar tujh se mujh ko KHud-numa itne

hua yun ittifaq aaina mere ru-ba-ru TuTa

kaf-e-chaalak mein teri jo tha sar-rishta jaanon ka

gareban se mere har ek tera Tanka rafu TuTa

tarawat thi chaman mein sarw goya ashk-e-qumri se

udhar aankhen mundin us ki ki idhar aab-e-ju TuTa

KHatar kar tu na lag chal ai saba us zulf se itna

bala aawegi tere sar jo us ka ek mu TuTa

wo be-kas kya kare kah tu rahi dil hi ki dil hi mein

nipaT beja tera dil 'mir' se ai aarzu TuTa