jo log aasman ne yan KHak kar uDae

jo log āsmāñ ne yaañ ḳhaak kar uḌaa.e

be-‘ibratoñ ne le kar ḳhaak un kī ghar banā.e

rahne kī koī jāgah shāyad na thī unhoñ kī

jo yaañ se uTh ga.e haiñ ve phir kabhū na aa.e

qaaf

laḌke barahmanoñ ke sandal bharī jabīneñ

hindostāñ meñ dekhe so un se dil lagā.e

har ik sanam-kada kyā kāfir jagah hai ham ne

qashqe bhī yaañ khiñchāe zunnār bhī bañdhā.e

pāmāl log kyā kyā aage hue haiñ tum se

is par bhī tum jo aa.e yaañ tum ne sar uThā.e

kyā ghūrte ho har dam Darte nahīñ haiñ kuchh ham

jin āñkhoñ par haiñ 'āshiq un āñkhoñ ke dikhā.e

āh-e-sharar-fishāñ jo nikle hai muñh se har dam

raushan hai 'mīr' ġham ne qalb-o-kabid jalā.e

jo log aasman ne yan KHak kar uDae

be-‘ibraton ne le kar KHak un ki ghar banae

rahne ki koi jagah shayad na thi unhon ki

jo yan se uTh gae hain we phir kabhu na aae

qaf

laDke barahmanon ke sandal bhari jabinen

hindostan mein dekhe so un se dil lagae

har ek sanam-kada kya kafir jagah hai hum ne

qashqe bhi yan khinchae zunnar bhi bandhae

pamal log kya kya aage hue hain tum se

is par bhi tum jo aae yan tum ne sar uThae

kya ghurte ho har dam Darte nahin hain kuchh hum

jin aankhon par hain 'ashiq un aankhon ke dikhae

aah-e-sharar-fishan jo nikle hai munh se har dam

raushan hai 'mir' gham ne qalb-o-kabid jalae