aaKHiri mukalima

le jaao daraḳhtoñ ko le jaao

mere kis kaam ke ye daraḳht

le jaao

maiñ to mar rahā huuñ

mere saath jaane vaale

kuchh hī log to haiñ

maiñ ne baat kī in rāstoñ se

ki jo rāste nahīñ the

phir maiñ nadī meñ Duub gayā

mujhe nahīñ ma.alūm thā ki mujhe is tarah

aarī se kaaT diyā jā.egā

ki daraḳhtoñ meñ bhī

merā shumār nahīñ hogā

maiñ niiñd ke āḳhirī hisse meñ khaḌā huuñ

ek mazdūr

belche se merī tasvīr banā rahā hai

raat guzar rahī hai

ki us ke guzarne se pahle bhī

ek raat guzar chukī hai

maiñ bhalā kis raat kā hisāb duuñ

mujhe mārne vāloñ meñ

merā lahū bhī shāmil hogā

ye mujhe ma.alūm nahīñ thā

maiñ mar rahā huuñ

ki mujhe mārne vaalī zaat

merī riiḌh kī haDDī se

kalām kar chukī hai

us ne mujhe baTan Tāñkne vaalī ma.amūlī suī se chhed ke

jāñkanī se guzār diyā hai

magar us se pahle

mujh se ye bhī nahīñ pūchhā

ki maiñ kisī jahān meñ

zinda thā bhī yā nahīñ

qadīm kāñsī ke bartanoñ

mere naam par bahā.e hue

āñsuoñ kā ek ḳhazāna to mahfūz hai

aur is ḳhazāne hī par to maiñ ne isrār kiyā

kyūñki maiñ jāntā huuñ

ki ye duniyā

keval ek chintā ghar hai

is meñ hazāroñ saal se rahne vaale ko bhī

rahne ke liye

ek pal bhī mayassar nahīñ

kyūñki ik ik pal kā

daam chukānā paḌtā hai

pahāḌ ek zarre ke hāthoñ

bik jaatā hai

maiñ mar rahā huuñ

magar is se pahle

maiñ ne ek iltijā kī hai

ki mujhe ik ik pal kā

daam chukā ke marne diyā jaa.e

mere naam ke

an-ginat naam darj haiñ

Thiik hai

mere vo tamām alfāz hī to

akārat ga.e nā

jo mahz ek jhuuT ke naam

likhe ga.e

magar ab kuchh jānñe ke liye

rah kyā gayā hai

ki agar merā sach itnā baḌā thā

tū use chhoTā karne ke liye

syāhī se bharī davāt

qalam-dān se pare

kyuuñ ulaT dī ga.ī

maiñ mar rahā huuñ

magar mujhe ik ik pal kā

daam chukā ke marne diyā jaa.e

aur ek daraḳht bhī

bach gayā hai

to le jaao ise le jaao

le jao daraKHton ko le jao

mere kis kaam ke ye daraKHt

le jao

main to mar raha hun

mere sath jaane wale

kuchh hi log to hain

main ne baat ki in raston se

ki jo raste nahin the

phir main nadi mein Dub gaya

mujhe nahin malum tha ki mujhe is tarah

aari se kaT diya jaega

ki daraKHton mein bhi

mera shumar nahin hoga

main nind ke aaKHiri hisse mein khaDa hun

ek mazdur

belche se meri taswir bana raha hai

raat guzar rahi hai

ki us ke guzarne se pahle bhi

ek raat guzar chuki hai

main bhala kis raat ka hisab dun

mujhe marne walon mein

mera lahu bhi shamil hoga

ye mujhe malum nahin tha

main mar raha hun

ki mujhe marne wali zat

meri riDh ki haDDi se

kalam kar chuki hai

us ne mujhe baTan Tankne wali mamuli sui se chhed ke

jaankani se guzar diya hai

magar us se pahle

mujh se ye bhi nahin puchha

ki main kisi jahan mein

zinda tha bhi ya nahin

qadim kansi ke bartanon

mere nam par bahae hue

aansuon ka ek KHazana to mahfuz hai

aur is KHazane hi par to main ne israr kiya

kyunki main jaanta hun

ki ye duniya

kewal ek chinta ghar hai

is mein hazaron sal se rahne wale ko bhi

rahne ke liye

ek pal bhi mayassar nahin

kyunki ek ek pal ka

dam chukana paDta hai

pahaD ek zarre ke hathon

bik jata hai

main mar raha hun

magar is se pahle

main ne ek iltija ki hai

ki mujhe ek ek pal ka

dam chuka ke marne diya jae

mere nam ke

an-ginat nam darj hain

Thik hai

mere wo tamam alfaz hi to

akarat gae na

jo mahz ek jhuT ke nam

likhe gae

magar ab kuchh jaanne ke liye

rah kya gaya hai

ki agar mera sach itna baDa tha

tu use chhoTa karne ke liye

syahi se bhari dawat

qalam-dan se pare

kyun ulaT di gai

main mar raha hun

magar mujhe ek ek pal ka

dam chuka ke marne diya jae

aur ek daraKHt bhi

bach gaya hai

to le jao ise le jao