ajaib-KHana

mirā vajūd

dekhte hī dekhte

ek ajā.ib-ḳhāne meñ Dhal rahā hai

ki mere lā-shu.ūr ne

āsār-e-qadīma kī nādir ināyatoñ ko

chhupā ke mujh se

mujh hī meñ jam.a kar diyā hai

yahāñ kahīñ kisī rack meñ

mire hunūt-shuda harf aur lamhe

paḌe hue haiñ

jinheñ na-jāne kaun sā masāla lagā diyā gayā hai

ki mire jism kī harārat se bhī vo

gal nahīñ rahe haiñ

in almāriyoñ se

mirī TuuTī huī chūḌiyoñ ke saaz kī

āvāz aa rahī hai

ye dekho shelf meñ

merī bachpan kī guḌiyā kā

TuuTā huā jism so rahā hai

kahīñ merī siñghār-mez kā ā.īna

be-rañg ho kar chaTaḳh gayā hai

magar ab bhī

mere azāb-lamhoñ kā

aks de rahā hai

kahīñ kisī surme-dānī meñ

shāyad kabhī maiñ ne apnī aañkh chhoḌ dī thī

jo us meñ se mujhe ghūrtī hai

aur merī zindagī

mere zañg-ālūd zevaroñ meñ

dab ke chīḳhtī hai

aur pāyaloñ kī āvāz se Dar rahī hai

ek TuuTī huī kañghī se

mire baal uljhe hue haiñ

aur kināre pe rakkhī huī

surāhī se pyaas kī bū

ris rahī hai

kisī ghaḌiyāl kī TuuTī huī suuī

ik azāb-lamhe meñ murta.ish hai

aur qarīb hī

mere jazboñ ke tālāb se

baas uTh rahī hai

aur tamāsh-bīn,

jauq-dar-jauq mere ajā.ib-ḳhāne ko

dekhne ko aa rahe haiñ

in meñ se koī tamāsh-bīn

is ajā.ib-ḳhāne kī

saañs letī huī maut ko

taz.hīk se dekh kar

nazar-andāz kartā huā jā rahā hai

aur koī ajā.ibāt kā shauqīn

in tamām ashyā pe tahqīq kar ke

apna-āp sābit karnā chāhtā hai

magar un ko dhuul meñ paḌī huī

tārīḳh kī uljhī huī Dor kā

koī sirā nahīñ mil rahā hai

aur meñ kināre pe khaḌī huī

apne usī ek sire ke milne kī muntazir huuñ

ki mirā vajūd dekhte hī dekhte

ek ajā.ib-ḳhāne meñ Dhal chukā hai

mera wajud

dekhte hi dekhte

ek ajaib-KHane mein Dhal raha hai

ki mere la-shuur ne

aasar-e-qadima ki nadir inayaton ko

chhupa ke mujh se

mujh hi mein jama kar diya hai

yahan kahin kisi rack mein

mere hunut-shuda harf aur lamhe

paDe hue hain

jinhen na-jaane kaun sa masala laga diya gaya hai

ki mere jism ki hararat se bhi wo

gal nahin rahe hain

in almariyon se

meri TuTi hui chuDiyon ke saz ki

aawaz aa rahi hai

ye dekho shelf mein

meri bachpan ki guDiya ka

TuTa hua jism so raha hai

kahin meri singhaar-mez ka aaina

be-rang ho kar chaTaKH gaya hai

magar ab bhi

mere azab-lamhon ka

aks de raha hai

kahin kisi surme-dani mein

shayad kabhi main ne apni aankh chhoD di thi

jo us mein se mujhe ghurti hai

aur meri zindagi

mere zang-alud zewaron mein

dab ke chiKHti hai

aur payalon ki aawaz se Dar rahi hai

ek TuTi hui kanghi se

mere baal uljhe hue hain

aur kinare pe rakkhi hui

surahi se pyas ki bu

ris rahi hai

kisi ghaDiyal ki TuTi hui sui

ek azab-lamhe mein murtaish hai

aur qarib hi

mere jazbon ke talab se

bas uTh rahi hai

aur tamash-bin,

jauq-dar-jauq mere ajaib-KHane ko

dekhne ko aa rahe hain

in mein se koi tamash-bin

is ajaib-KHane ki

sans leti hui maut ko

tazhik se dekh kar

nazar-andaz karta hua ja raha hai

aur koi ajaibaat ka shauqin

in tamam ashya pe tahqiq kar ke

apna-ap sabit karna chahta hai

magar un ko dhul mein paDi hui

tariKH ki uljhi hui Dor ka

koi sira nahin mil raha hai

aur mein kinare pe khaDi hui

apne usi ek sire ke milne ki muntazir hun

ki mera wajud dekhte hi dekhte

ek ajaib-KHane mein Dhal chuka hai