curfew mein mushaera

kyā jaane us zarīf ke kyā dil meñ aa.ī thī

curfew meñ jis ne mahfil-e-sherī sajā.ī thī

allāh aisā zauq jahannam meñ Daal de

curfew meñ shā.iroñ ko jo ghar se nikāl de

aise meñ jab ki shahr ke sab rāste hoñ band

saḌkoñ pe aa ga.e the ye bā-zauq shar-pasand

aise meñ jab ki ghar se nikalnā muhāl thā

lekin ye shā.iroñ kī anā kā savāl thā

sherī-mahāz ḳhāna-e-shā.er se duur thā

ka.aba meñ hājiyoñ ko pahuñchnā zarūr thā

shā.ir ravāñ the sher ke chāqū liye hue

dil meñ ḳhayāl-e-ḳhidmat-e-urdu liye hue

zor-e-qalam ke saath sipāh-e-riyāz thī

qānūn haath meñ thā baġhal meñ bayāz thī

galiyoñ meñ qatl-o-ḳhūñ thā saḌak par fasād thā

shā.ir ba-zor-e-fikr sharīk-e-jihād thā

kaisī nikal rahī thī sadā gun-machine se

jaise kisī ko daad mile sāma.īn se

shā.ir bayāz laa.e the sandūq kī tarah

misre ugal rahe the vo bandūq kī tarah

jab firing ahl-e-suḳhan kī huī tamām

ye ḳhidmat-e-adab kā police ne sila diyā

kuchh shā.iroñ ko road pe murġhā banā diyā

kuchh kohna-mashq bhī the sujūd-o-rukū meñ

jabran unheñ paḌhāyā gayā thā shurūa meñ

tarhī mushā.ere kā samāñ de rahe the vo

ik misra-e-tarah pe azaañ de rahe the vo

kuchh shā.iroñ ko naġhma-sarā.ī kī fikr thī

sadr-e-mushā.ira ko rihā.ī kī fikr thī

jab shā.iroñ ke haath sharīk-e-duā hue

curfew kā vaqt ḳhatm huā tab rihā hue

sab apne apne ghar ga.e is hāv-hū ke ba.ad

shā.ir-azīm hotā hai har curfew ke ba.ad

kya jaane us zarif ke kya dil mein aai thi

curfew mein jis ne mahfil-e-sheri sajai thi

allah aisa zauq jahannam mein Dal de

curfew mein shairon ko jo ghar se nikal de

aise mein jab ki shahr ke sab raste hon band

saDkon pe aa gae the ye ba-zauq shar-pasand

aise mein jab ki ghar se nikalna muhaal tha

lekin ye shairon ki ana ka sawal tha

sheri-mahaz KHana-e-shaer se dur tha

kaba mein hajiyon ko pahunchna zarur tha

shair rawan the sher ke chaqu liye hue

dil mein KHayal-e-KHidmat-e-urdu liye hue

zor-e-qalam ke sath sipah-e-riyaz thi

qanun hath mein tha baghal mein bayaz thi

galiyon mein qatl-o-KHun tha saDak par fasad tha

shair ba-zor-e-fikr sharik-e-jihad tha

kaisi nikal rahi thi sada gun-machine se

jaise kisi ko dad mile samain se

shair bayaz lae the sanduq ki tarah

misre ugal rahe the wo banduq ki tarah

jab firing ahl-e-suKHan ki hui tamam

ye KHidmat-e-adab ka police ne sila diya

kuchh shairon ko road pe murgha bana diya

kuchh kohna-mashq bhi the sujud-o-ruku mein

jabran unhen paDhaya gaya tha shurua mein

tarhi mushaere ka saman de rahe the wo

ek misra-e-tarah pe azan de rahe the wo

kuchh shairon ko naghma-sarai ki fikr thi

sadr-e-mushaira ko rihai ki fikr thi

jab shairon ke hath sharik-e-dua hue

curfew ka waqt KHatm hua tab riha hue

sab apne apne ghar gae is haw-hu ke baad

shair-azim hota hai har curfew ke baad