dusri mulaqat

kah nahīñ saktā kahāñ se aa.e ho, tum kaun ho

aisā lagtā hai ki ye sūrat hai pahchānī huī

ḳhaak meñ rauñdā huā chehra magar ik dilkashī

aañkh meñ halkā tabassum, dil meñ koī Tiis sī

paañv se lipTī huī biite hue lamhoñ kī gard

pairahan ke chaak meñ gahre ġhamoñ kī tāzgī

pursish-e-ġham par bhī kah saknā na apne jī kā haal

kuchh kahā to bas yahī ki tum pe kuchh biitī nahīñ

raah meñ chalte hue Thokar lagī aur gir paḌe

yūñhī kāñTe chubh ga.e haiñ, phaT ga.ī hai āstīñ

yaad aatā hai ki tum mujh se mile the pahlī baar

ik kahānī meñ na jaane kis kī thī likkhī huī

aur maiñ ne is tarah ke aadmī ko dekh kar

dil meñ sochā thā ki us se aaj kar luuñ dostī!

kah nahin sakta kahan se aae ho, tum kaun ho

aisa lagta hai ki ye surat hai pahchani hui

KHak mein raunda hua chehra magar ek dilkashi

aankh mein halka tabassum, dil mein koi Tis si

panw se lipTi hui bite hue lamhon ki gard

pairahan ke chaak mein gahre ghamon ki tazgi

pursish-e-gham par bhi kah sakna na apne ji ka haal

kuchh kaha to bas yahi ki tum pe kuchh biti nahin

rah mein chalte hue Thokar lagi aur gir paDe

yunhi kanTe chubh gae hain, phaT gai hai aastin

yaad aata hai ki tum mujh se mile the pahli bar

ek kahani mein na jaane kis ki thi likkhi hui

aur main ne is tarah ke aadmi ko dekh kar

dil mein socha tha ki us se aaj kar lun dosti!