hayule

samundaroñ ke muhīb tūfāñ mere azā.em ke sāhiloñ se shikast khā kar palaT chuke haiñ

maiñ kohsāroñ kī hastiyoñ se bhī āsmāñ kā vaqār ban kar ulajh chukā huuñ

maiñ jañgaloñ kī havāoñ kā zor toḌ detā rahā huuñ apne nafas kī shorīda satvatoñ se

mire tafakkur kī garm-raftāriyoñ se larzāñ rahe haiñ sahrāoñ ke bagūle

ye zikr hai us tavīl maazī kā maiñ akelā thā is bharī kā.enāt meñ jab

faqat mirī jāñ-gudāz tanhā.ī saaya ban kar thī saath mere

maiñ un dinoñ sochtā thā merā vajūd ā.īna-dār tāb-o-tavāñ hai jis ko

zavāl-e-āmādgī se nisbat nahīñ hai koī

aur aaj jab ki ye mere bachche

jinheñ zamāne kī aañkh ne mere dast-o-bāzū kā ruup samjhā

mirī tavānā.iyoñ ke markaz kā aks jaanā

mire rag-o-pai meñ ek ehsās-e-ḳhauf har-dam ubhārte haiñ

to sochtā huuñ

maiñ kitnā kamzor ho gayā huuñ

havā kā ik nā-tavāñ sā jhoñkā bhī un ke pahlū se jab guzartā hai

laakh andeshe jaag uThte haiñ mere dil meñ

ajiib tashvīsh gher letī hai jism-o-jāñ kī tamām tābinda vus.atoñ ko

maiñ apne bachchoñ ko apnī quvvat kahūñ ki be-himmatī kā maz.har

samundaron ke muhib tufan mere azaem ke sahilon se shikast kha kar palaT chuke hain

main kohsaron ki hastiyon se bhi aasman ka waqar ban kar ulajh chuka hun

main jangalon ki hawaon ka zor toD deta raha hun apne nafas ki shorida satwaton se

mere tafakkur ki garm-raftariyon se larzan rahe hain sahraon ke bagule

ye zikr hai us tawil mazi ka main akela tha is bhari kaenat mein jab

faqat meri jaan-gudaz tanhai saya ban kar thi sath mere

main un dinon sochta tha mera wajud aaina-dar tab-o-tawan hai jis ko

zawal-e-amadgi se nisbat nahin hai koi

aur aaj jab ki ye mere bachche

jinhen zamane ki aankh ne mere dast-o-bazu ka rup samjha

meri tawanaiyon ke markaz ka aks jaana

mere rag-o-pai mein ek ehsas-e-KHauf har-dam ubhaarte hain

to sochta hun

main kitna kamzor ho gaya hun

hawa ka ek na-tawan sa jhonka bhi un ke pahlu se jab guzarta hai

lakh andeshe jag uThte hain mere dil mein

ajib tashwish gher leti hai jism-o-jaan ki tamam tabinda wusaton ko

main apne bachchon ko apni quwwat kahun ki be-himmati ka mazhar