KHud-kushi

ek aise sarvey ke mutābiq

jo mere dost

apne dil ko mausūl hone vaalī

ġhair-zarūrī ḳhabroñ ko jam.a kar ke

murattab kar rahe haiñ

shahr meñ koī ḳhud-kushī nahīñ kar rahā

mohabbat meñ nākāmī par finail piine vaalī laḌkiyāñ

aur naukrī na milne par

baḌe bhaa.ī ke licence-yāfta pistol se

ḳhud-kushī karne vaale laḌke

bahut din se nazar nahīñ aa.e

dupaTTe kā phandā banā kar mar jaane vaalī

be-aulād dulhaneñ

aur tavīl bīmārī se tañg aa kar

ḳhud ko jalā kar halāk karne vaale

udheḌ-umar marīz

nāpaid ho ga.e haiñ

shahr meñ ab jis ko bhī ḳhud-kushī karnī ho

use bahut ziyāda tag-o-dau nahīñ karnī paḌtī

vo bāhar nikaltā hai

aur thoḌī der ke liye

nishāna-bāzoñ vaalī yellow cab kā

intizār kartā hai

yā jab us kī saḌak ke donoñ taraf

ḳhuub firing ho rahī ho

vo bilā-irāda balcony meñ jā ke khaḌā ho jaatā hai

jab log ḳhud-kushī karnā chāhte haiñ

yaqīn kījiye

kisī jinsī imtiyāz ke baġhair

rañg, nasl aur zabān ke farq ko ḳhātir meñ na laate hue

goliyāñ har jagah

unheñ DhūñDh nikāltī haiñ

ek aise sarwey ke mutabiq

jo mere dost

apne dil ko mausul hone wali

ghair-zaruri KHabron ko jama kar ke

murattab kar rahe hain

shahr mein koi KHud-kushi nahin kar raha

mohabbat mein nakaami par finail pine wali laDkiyan

aur naukri na milne par

baDe bhai ke licence-yafta pistol se

KHud-kushi karne wale laDke

bahut din se nazar nahin aae

dupaTTe ka phanda bana kar mar jaane wali

be-aulad dulhanen

aur tawil bimari se tang aa kar

KHud ko jala kar halak karne wale

udheD-umar mariz

napaid ho gae hain

shahr mein ab jis ko bhi KHud-kushi karni ho

use bahut ziyaada tag-o-dau nahin karni paDti

wo bahar nikalta hai

aur thoDi der ke liye

nishana-bazon wali yellow cab ka

intizar karta hai

ya jab us ki saDak ke donon taraf

KHub firing ho rahi ho

wo bila-irada balcony mein ja ke khaDa ho jata hai

jab log KHud-kushi karna chahte hain

yaqin kijiye

kisi jinsi imtiyaz ke baghair

rang, nasl aur zaban ke farq ko KHatir mein na late hue

goliyan har jagah

unhen DhunDh nikalti hain