nazm

agar maiñ ye nazm na likhtā

to mohabbat nārāz ho jaatī

aur kahtī ki maiñ tumhāre saath

saḌak paar nahīñ karūñgī

chaa.e nahīñ piyūñgī aur daftar meñ

kaam nahīñ karūñgī

mohabbat kī nārāzgī

kisī jañg meñ hone vaale

nuqsān se ziyāda shadīd hotī hai

vo aur bhī kuchh kahtī

jo mujhe sunā.ī na detā

aur maiñ us ke naam ek ḳhat likhtā

agar maiñ vo ḳhat na likhtā to mere dost nārāz ho jaate

aur kahte ham itvār ke din tumhāre saath

cricket nahīñ kheleñge

aur un meñ se ek

railway-line paar karte hue ḳhud-kushī kar letā

aur hamāre laa.e hue phuul

apnī qabr pe rakhne se inkār kar detā

agar maiñ ḳhat na likhtā

agar maiñ nazm na likhtā

to zindagī apnā zā.iqa kis zabān pe mahsūs kartī

ḳhvāb kis rasm-ul-ḳhat meñ likhe jaate

maut ke rāste meñ

bichhā.ī jaane vaalī bārūdī surañg

kaun sī sar-zamīn pe tayyār hotī

panāh dene ke liye

hamesha kis mulk kī sarhadeñ khulī rahtīñ

dhamāke se phaT jaane ke liye

har baar kaun sā dil aage baḌhtā

agar main ye nazm na likhta

to mohabbat naraaz ho jati

aur kahti ki main tumhaare sath

saDak par nahin karungi

chae nahin piyungi aur daftar mein

kaam nahin karungi

mohabbat ki naraazgi

kisi jang mein hone wale

nuqsan se ziyaada shadid hoti hai

wo aur bhi kuchh kahti

jo mujhe sunai na deta

aur main us ke nam ek KHat likhta

agar main wo KHat na likhta to mere dost naraaz ho jate

aur kahte hum itwar ke din tumhaare sath

cricket nahin khelenge

aur un mein se ek

railway-line par karte hue KHud-kushi kar leta

aur hamare lae hue phul

apni qabr pe rakhne se inkar kar deta

agar main KHat na likhta

agar main nazm na likhta

to zindagi apna zaiqa kis zaban pe mahsus karti

KHwab kis rasm-ul-KHat mein likhe jate

maut ke raste mein

bichhai jaane wali barudi surang

kaun si sar-zamin pe tayyar hoti

panah dene ke liye

hamesha kis mulk ki sarhaden khuli rahtin

dhamake se phaT jaane ke liye

har bar kaun sa dil aage baDhta