sayyah

use safar naame

aur sayyāhoñ kī zindagī kī kahāniyāñ bahut pasand thiiñ

us ne muḳhtalif mulkoñ

aur vahāñ ke logoñ ke baare meñ bahut kuchh ma.alūm kyā thā

vo ka.ī zabāneñ

aur safar karne ke tamām tarīqe jāntā thā

aur vo ye bhī jāntā thā

ki jab koī shaḳhs kahīñ na jā sake

to use kyā karnā chāhiye

vo ḳhvāb dekhtā thā

aur har raat ḳhud ko kisī na.ī sar-zamīn pe paatā

vo ḳhvāb dekhtā thā

jo inheñ chīzoñ ke baare meñ hote

log us ke ḳhvāb dilchaspī se sunte the

phir ek raat us ne dekhā

ki vo rāsta bhuul gayā hai

aur us ne ḳhud ko kabhī garm ret

aur kabhī duur tak phailī barf meñ dhañsā huā paayā

aglī sub.h us ne kisī se kuchh nahīñ kahā

aur un riyāsatoñ kī taraf nikal gayā

jin par kahīñ na jaane vaale log chale hī jaate haiñ

na.e yā purāne naqshoñ meñ

aise bahut se rāste dikhā.e jaate haiñ

jo kahīñ nahīñ jaate

use safar name

aur sayyahon ki zindagi ki kahaniyan bahut pasand thin

us ne muKHtalif mulkon

aur wahan ke logon ke bare mein bahut kuchh malum kya tha

wo kai zabanen

aur safar karne ke tamam tariqe jaanta tha

aur wo ye bhi jaanta tha

ki jab koi shaKHs kahin na ja sake

to use kya karna chahiye

wo KHwab dekhta tha

aur har raat KHud ko kisi nai sar-zamin pe pata

wo KHwab dekhta tha

jo inhen chizon ke bare mein hote

log us ke KHwab dilchaspi se sunte the

phir ek raat us ne dekha

ki wo rasta bhul gaya hai

aur us ne KHud ko kabhi garm ret

aur kabhi dur tak phaili barf mein dhansa hua paya

agli subh us ne kisi se kuchh nahin kaha

aur un riyasaton ki taraf nikal gaya

jin par kahin na jaane wale log chale hi jate hain

nae ya purane naqshon mein

aise bahut se raste dikhae jate hain

jo kahin nahin jate