shaer-e-azam

ḳhabt mujh ko shā.erī kā jab huā

das minute meñ saaTh ġhazleñ kah gayā

sab se ro ro kar kahā sun lo ġhazal

taaki maiñ ho jā.ūñ phir se normal

rahm apnoñ ko na aayā jab zarā

to pareshāñ ho ke hotel meñ gayā

taaki mil jaa.e ik aisā aadmī

chaa.e pī kar jo sune ġhazleñ mirī

jā ke baiThā saat ghanTe jab vahāñ

ik muazzaz shaḳhs aa.e nā-gahāñ

dekhte hī ho gayā dil baaġh baaġh

ab to hogā peT halkā aur dimāġh

ba.ad-az-ādāb aur taslīm ke

maiñ ne un se ye kahā ta.azīm se

aa.i.e taklīf itnī kījiye

chaa.e mere saath hī pī lījiye

aa ke baiThe saath jab kī iltijā

aap kā jo hukm ho mangvāoñgā

muskurā kar phir to bole āñ-janāb

murġh yaḳhnī qorma nargis kabāb

shīrmāl o shāhī TukḌā fernī

aur agar mil jaa.e to chūran koī

toss makkhan duudh kaafī rā.ita

al-ġharaz jo kuchh kahā mañgvā liyā

naak tak jab khā chuke maiñ ne kahā

ho ta.āruf ab hamārā aap kā

naam hai 'asrār' merā mohtaram

saarī duniyā jāntī hai besh-o-kam

shā.er-e-āzam huuñ maiñ izzat-ma.āb

vo ye bole maiñ to bahrā huuñ janāb

KHabt mujh ko shaeri ka jab hua

das minute mein saTh ghazlen kah gaya

sab se ro ro kar kaha sun lo ghazal

taki main ho jaun phir se normal

rahm apnon ko na aaya jab zara

to pareshan ho ke hotel mein gaya

taki mil jae ek aisa aadmi

chae pi kar jo sune ghazlen meri

ja ke baiTha sat ghanTe jab wahan

ek muazzaz shaKHs aae na-gahan

dekhte hi ho gaya dil bagh bagh

ab to hoga peT halka aur dimagh

baad-az-adab aur taslim ke

main ne un se ye kaha tazim se

aaie taklif itni kijiye

chae mere sath hi pi lijiye

aa ke baiThe sath jab ki iltija

aap ka jo hukm ho mangwaonga

muskura kar phir to bole aan-janab

murgh yaKHni qorma nargis kabab

shirmal o shahi TukDa ferni

aur agar mil jae to churan koi

toss makkhan dudh kafi raita

al-gharaz jo kuchh kaha mangwa liya

nak tak jab kha chuke main ne kaha

ho taaruf ab hamara aap ka

nam hai 'asrar' mera mohtaram

sari duniya jaanti hai besh-o-kam

shaer-e-azam hun main izzat-maab

wo ye bole main to bahra hun janab