shab-e-hijran

havā be-mehr thī us raat ThanDī aur kaTīlī

saañs lenā sar se ūñchī lahr se Takkar lagānā thā

sadā koī nahīñ thī

samt kī ta.ayyun mushkil thī

nashebī bastiyoñ meñ rāste ik dūsre meñ ḳhatm hote the

tujhe kyā alam hai vo raat sar-tā-pā shab-e-hijrāñ hamāre haq meñ kaisī thī

lakīreñ haath kī nā-mehrbāñ

māthā ma.īshat kī tarah tañg aur ghar barkat se chehra nuur se aarī

gunāhoñ kā kyā maqdūr thā achchhā amal bhī ho nahīñ paayā

kisī buḌhiyā kī kuTiyā meñ diyā jhāḌū

na ro.e bā-vazū ho kar

na kuchh tartīl na tahlīl

hoñToñ se duā hī phūTtī lekin hamārī tiira rozī raat ke har brij par

bedār aur choukas thī

gaahe gaahe ik lalkār aatī thī azal kī lauh se

aur ham manoñ miTTī ke nīche sahm jaate the

havā be-mehr thī us raat ThanDī kaTīlī

saañs lenā sar se ūñchī lahr se Takkar lagānā thā

hawa be-mehr thi us raat ThanDi aur kaTili

sans lena sar se unchi lahr se Takkar lagana tha

sada koi nahin thi

samt ki tayyun mushkil thi

nashebi bastiyon mein raste ek dusre mein KHatm hote the

tujhe kya alam hai wo raat sar-ta-pa shab-e-hijran hamare haq mein kaisi thi

lakiren hath ki na-mehrban

matha maishat ki tarah tang aur ghar barkat se chehra nur se aari

gunahon ka kya maqdur tha achchha amal bhi ho nahin paya

kisi buDhiya ki kuTiya mein diya jhaDu

na roe ba-wazu ho kar

na kuchh tartil na tahlil

honTon se dua hi phuTti lekin hamari tera rozi raat ke har brij par

bedar aur choukas thi

gahe gahe ek lalkar aati thi azal ki lauh se

aur hum manon miTTi ke niche sahm jate the

hawa be-mehr thi us raat ThanDi kaTili

sans lena sar se unchi lahr se Takkar lagana tha