taqaddus-e-maab

'asrār' mubtalā hue ik din azaab meñ

ya.anī giraft-e-zāhid-e-izzat-ma.āb meñ

taqvā o zohd faqr tasavvuf muḳhizāt

kahtā thā dāstān magar ek baab meñ

ḳhauf-e-ḳhudā kuchh aisā biThāyā ki al-amāñ

din meñ zarā sukūn na rāhat thī ḳhvāb meñ

vo iḳhtilāj-e-qalb huā thā ki ek din

hāzir huā hakīm-e-matab kī janāb meñ

do-chār baar nabzeñ TaTolīñ to daf.atan

bole ki kuchh fasād hai shāyad luaab meñ

lāzim hai is maraz meñ ifāqa ke vāste

sandal ko ghis ke pīji.e fauran gulāb meñ

jab ye sunā to haath ke tote hī uḌ ga.e

sochā ki ab to maut kī aayā huuñ daab meñ

sab kā chukā ke qarz karūñ fikr-e-āqibat

jo umr hai guzārūñ husūl-e-savāb meñ

aate hī is ḳhayāl ke ghar-bār bech kar

saaqī ke paas pahle gayā iztirāb meñ

saaqī se jab talab kiyā khātā udhār kā

zāhid kā bhī hisāb thā mere hisāb meñ

'asrar' mubtala hue ek din azab mein

yani giraft-e-zahid-e-izzat-maab mein

taqwa o zohd faqr tasawwuf muKHizat

kahta tha dastan magar ek bab mein

KHauf-e-KHuda kuchh aisa biThaya ki al-aman

din mein zara sukun na rahat thi KHwab mein

wo iKHtilaj-e-qalb hua tha ki ek din

hazir hua hakim-e-matab ki janab mein

do-chaar bar nabzen TaTolin to dafatan

bole ki kuchh fasad hai shayad luab mein

lazim hai is maraz mein ifaqa ke waste

sandal ko ghis ke pijie fauran gulab mein

jab ye suna to hath ke tote hi uD gae

socha ki ab to maut ki aaya hun dab mein

sab ka chuka ke qarz karun fikr-e-aqibat

jo umr hai guzarun husul-e-sawab mein

aate hi is KHayal ke ghar-bar bech kar

saqi ke pas pahle gaya iztirab mein

saqi se jab talab kiya khata udhaar ka

zahid ka bhi hisab tha mere hisab mein