tarana-e-milli

chīn-o-arab hamārā hindostāñ hamārā

muslim haiñ ham vatan hai saarā jahāñ hamārā

tauhīd kī amānat sīnoñ meñ hai hamāre

āsāñ nahīñ miTānā nām-o-nishāñ hamārā

duniyā ke but-kadoñ meñ pahlā vo ghar ḳhudā kā

ham is ke pāsbāñ haiñ vo pāsbāñ hamārā

teġhoñ ke saa.e meñ ham pal kar javāñ hue haiñ

ḳhanjar hilāl kā hai qaumī nishāñ hamārā

maġhrib kī vādiyoñ meñ gūñjī azaañ hamārī

thamtā na thā kisī se sail-e-ravāñ hamārā

bātil se dabne vaale ai āsmāñ nahīñ ham

sau baar kar chukā hai tū imtihāñ hamārā

ai gulistān-e-undulus vo din haiñ yaad tujh ko

thā terī Dāliyoñ meñ jab āshiyāñ hamārā

ai mauj-e-dajla tū bhī pahchāntī hai ham ko

ab tak hai terā dariyā afsāna-ḳhvāñ hamārā

ai arz-e-pāk terī hurmat pe kaT mare ham

hai ḳhuuñ tirī ragoñ meñ ab tak ravāñ hamārā

sālār-e-kārvāñ hai mīr-e-hijāz apnā

is naam se hai baaqī ārām-e-jāñ hamārā

'iqbāl' kā tarāna bāñg-e-darā hai goyā

hotā hai jāda-paimā phir kārvāñ hamārā

chin-o-arab hamara hindostan hamara

muslim hain hum watan hai sara jahan hamara

tauhid ki amanat sinon mein hai hamare

aasan nahin miTana nam-o-nishan hamara

duniya ke but-kadon mein pahla wo ghar KHuda ka

hum is ke pasban hain wo pasban hamara

teghon ke sae mein hum pal kar jawan hue hain

KHanjar hilal ka hai qaumi nishan hamara

maghrib ki wadiyon mein gunji azan hamari

thamta na tha kisi se sail-e-rawan hamara

baatil se dabne wale ai aasman nahin hum

sau bar kar chuka hai tu imtihan hamara

ai gulistan-e-undulus wo din hain yaad tujh ko

tha teri Daliyon mein jab aashiyan hamara

ai mauj-e-dajla tu bhi pahchanti hai hum ko

ab tak hai tera dariya afsana-KHwan hamara

ai arz-e-pak teri hurmat pe kaT mare hum

hai KHun teri ragon mein ab tak rawan hamara

salar-e-karwan hai mir-e-hijaz apna

is nam se hai baqi aaram-e-jaan hamara

'iqbaal' ka tarana bang-e-dara hai goya

hota hai jada-paima phir karwan hamara