chand taron ka ban

mom kī tarah jalte rahe ham shahīdoñ ke tan

rāt-bhar jhilmilātī rahī sham-e-sub.h-e-vatan

rāt-bhar jagmagātā rahā chāñd tāroñ kā ban

tishnagī thī magar

tishnagī meñ bhī sarshār the

pyāsī āñkhoñ ke ḳhālī kaTore liye

muntazir mard o zan

mastiyāñ ḳhatm, mad-hoshiyāñ ḳhatm thīñ, ḳhatm thā bāñkpan

raat ke jagmagāte dahakte badan

sub.h-dam ek dīvār-e-ġham ban ga.e

ḳhār-zār-e-alam ban ga.e

raat kī shah-ragoñ kā uchhaltā lahū

jū-e-ḳhūñ ban gayā

kuchh imāmān-e-sad-makr-o-fan

un kī sāñsoñ meñ af.ī kī phunkār thī

un ke siine meñ nafrat kā kaalā dhuāñ

ik kamīñ-gāh se

pheñk kar apnī nok-e-zabāñ

ḳhūn-e-nūr-e-sahar pī ga.e

raat kī talchhateñ haiñ añdherā bhī hai

sub.h kā kuchh ujālā bhī hai

hamdamo!

haath meñ haath do

sū-e-manzil chalo

manzileñ pyaar kī

manzileñ daar kī

kū-e-dildār kī manzileñ

dosh par apnī apnī salībeñ uThā.e chalo

mom ki tarah jalte rahe hum shahidon ke tan

raat-bhar jhilmilati rahi sham-e-subh-e-watan

raat-bhar jagmagata raha chand taron ka ban

tishnagi thi magar

tishnagi mein bhi sarshaar the

pyasi aankhon ke KHali kaTore liye

muntazir mard o zan

mastiyan KHatm, mad-hoshiyan KHatm thin, KHatm tha bankpan

raat ke jagmagate dahakte badan

subh-dam ek diwar-e-gham ban gae

KHar-zar-e-alam ban gae

raat ki shah-ragon ka uchhalta lahu

ju-e-KHun ban gaya

kuchh imaman-e-sad-makr-o-fan

un ki sanson mein afi ki phunkar thi

un ke sine mein nafrat ka kala dhuan

ek kamin-gah se

phenk kar apni nok-e-zaban

KHun-e-nur-e-sahar pi gae

raat ki talchhaten hain andhera bhi hai

subh ka kuchh ujala bhi hai

hamdamo!

hath mein hath do

su-e-manzil chalo

manzilen pyar ki

manzilen dar ki

ku-e-dildar ki manzilen

dosh par apni apni saliben uThae chalo