wazir ka farman

logo mujhe salām karo maiñ vazīr huuñ

gardan ke saath ḳhud bhī jhuko maiñ vazīr huuñ

gardan meñ haar Daal do maiñ jhuk sakūñ agar

na.are bhī kuchh buland karo maiñ vazīr huuñ

tum hāthoñ-hāth lo mujhe daure par aa.uuñ jab

motor ke saath saath chalo maiñ vazīr huuñ

likkhe haiñ shā.iroñ ne qasā.ed mire liye

ek aadh nazm tum bhī kaho maiñ vazīr huuñ

jo mujh se kahne aao ḳhabar-dār mat kaho

jo kuchh maiñ kah rahā huuñ suno maiñ vazīr huuñ

ma.azūr huuñ maiñ apnī vazārat se be-tarah

tum tarah-dār mujh ko kaho maiñ vazīr huuñ

be-shak hai barhamī sī mirī guftugū ke beach

lekin adab se baat suno meñ vazīr huuñ

maiñ vo nahīñ ki yūsuf be-kārvāñ phirūñ

merā julūs le ke chalo maiñ vazīr huuñ

aḳhbār vaalo soch samajh kar karo savāl

jo shīsha mere muñh na lago maiñ vazīr huuñ

mujh se qarābatoñ ko bas ab bhuul jaao tum

ai mere bhaa.ī band gadho maiñ vazīr huuñ

mujh ko to mil ga.ī hai vazārat kī zindagī

marte ho tum to jaao maro maiñ vazīr huuñ

logo mujhe salam karo main wazir hun

gardan ke sath KHud bhi jhuko main wazir hun

gardan mein haar Dal do main jhuk sakun agar

nare bhi kuchh buland karo main wazir hun

tum hathon-hath lo mujhe daure par aaun jab

motor ke sath sath chalo main wazir hun

likkhe hain shairon ne qasaed mere liye

ek aadh nazm tum bhi kaho main wazir hun

jo mujh se kahne aao KHabar-dar mat kaho

jo kuchh main kah raha hun suno main wazir hun

mazur hun main apni wazarat se be-tarah

tum tarah-dar mujh ko kaho main wazir hun

be-shak hai barhami si meri guftugu ke beach

lekin adab se baat suno mein wazir hun

main wo nahin ki yusuf be-karwan phirun

mera julus le ke chalo main wazir hun

aKHbar walo soch samajh kar karo sawal

jo shisha mere munh na lago main wazir hun

mujh se qarabaton ko bas ab bhul jao tum

ai mere bhai band gadho main wazir hun

mujh ko to mil gai hai wazarat ki zindagi

marte ho tum to jao maro main wazir hun