aurat ko chāhiye ki adālat kā ruḳh kare

jab aadmī ko sirf ḳhudā kā ḳhayāl ho

aurat ko chahiye ki adalat ka ruKH kare

jab aadmi ko sirf KHuda ka KHayal ho

vahāñ jo log anāḌī haiñ vaqt kāTte haiñ

yahāñ bhī kuchh mutashā.er dimāġh chāTte haiñ

wahan jo log anaDi hain waqt kaTte hain

yahan bhi kuchh mutashaer dimagh chaTte hain

aa ke bazm-e-sher meñ shart-e-vafā puurī to kar

jitnā khānā khā gayā hai utnī mazdūrī to kar

aa ke bazm-e-sher mein shart-e-wafa puri to kar

jitna khana kha gaya hai utni mazduri to kar

pāyān-e-kār ḳhatm huā jab ye tajziya

maiñ ne kahā huzūr to bole ki shukriya

payan-e-kar KHatm hua jab ye tajziya

main ne kaha huzur to bole ki shukriya

kahīñ golī likhā hai aur kahīñ maar

ye golīmār likkhā jā rahā hai

kahin goli likha hai aur kahin mar

ye golimar likkha ja raha hai

hamārā dost tufailī bhī hai baḌā shā.er

agarche ek baḌe aadmī kā chamcha hai

hamara dost tufaili bhi hai baDa shaer

agarche ek baDe aadmi ka chamcha hai

ek shādī to Thiik hai lekin

ek do tiin chaar had kar dī

ek shadi to Thik hai lekin

ek do tin chaar had kar di

siyāh zulf ko jo ban-sañvar ke dekhte haiñ

safed baal kahāñ apne sar ke dekhte haiñ

siyah zulf ko jo ban-sanwar ke dekhte hain

safed baal kahan apne sar ke dekhte hain

bas meñ baiThī hai mire paas jo ik zohra-jabīñ

mard niklegī agar zulf muñDā dī jaa.e

bas mein baiThi hai mere pas jo ek zohra-jabin

mard niklegi agar zulf munDa di jae

maiñ ne kahā kalām-e-'ravish' lā-javāb hai

kahne lage ki un kā tarannum ḳharāb hai

main ne kaha kalam-e-'rawish' la-jawab hai

kahne lage ki un ka tarannum KHarab hai

ġhazal kī shakl badal dī hai operation se

suḳhan-varī hai agar ye to surgery kyā hai

ghazal ki shakl badal di hai operation se

suKHan-wari hai agar ye to surgery kya hai

sunā ye hai ki vo suufī bhī thā valī bhī thā

ab is ke baa'd to paiġhambarī kā darja hai

suna ye hai ki wo sufi bhi tha wali bhi tha

ab is ke ba'd to paighambari ka darja hai

vasl kī raat jo mahbūb kahe good night

qā.eda ye hai ki english meñ duā dī jaa.e

wasl ki raat jo mahbub kahe good night

qaeda ye hai ki english mein dua di jae

har baat par jo kahtā rahā maiñ bajā bajā

us ne kahā ki yuuñ hī musalsal bajā karo

har baat par jo kahta raha main baja baja

us ne kaha ki yun hi musalsal baja karo

kal chaudhvīñ kī raat thī ābād thā kamrā tirā

hotī rahī dhin-tāk-dhin bajtā rahā tabla tirā

kal chaudhwin ki raat thi aabaad tha kamra tera

hoti rahi dhin-tak-dhin bajta raha tabla tera

maiñ bhī thā hāzir bazm meñ jab tū ne dekhā hī nahīñ

maiñ bhī uThā kar chal diyā bilkul nayā juutā tirā

main bhi tha hazir bazm mein jab tu ne dekha hi nahin

main bhi uTha kar chal diya bilkul naya juta tera

ek achchhā-ḳhāsā mard zanāne meñ ghus paḌā

goyā ki ek chor ḳhazāne meñ ghus paḌā

ek achchha-KHasa mard zanane mein ghus paDa

goya ki ek chor KHazane mein ghus paDa

is kā kyā hogā ye jo unvān aadhā rah gayā

ye bhī lete jaa.eñ jo sāmān aadhā rah gayā

is ka kya hoga ye jo unwan aadha rah gaya

ye bhi lete jaen jo saman aadha rah gaya

ḳhudī buland ho be-shak yahī thī merī raa.e

ye kab kahā thā ki qavvāl is meñ haath lagā.e

KHudi buland ho be-shak yahi thi meri rae

ye kab kaha tha ki qawwal is mein hath lagae

nahīñ karte haiñ be-rishvat liye kaam

yahī hai majnuoñ kā aaj dastūr

nahin karte hain be-rishwat liye kaam

yahi hai majnuon ka aaj dastur

vahāñ riyāz-e-musalsal se kaam chaltā hai

yahāñ gale ke sahāre kalām chaltā hai

wahan riyaz-e-musalsal se kaam chalta hai

yahan gale ke sahaare kalam chalta hai

likhī hai hāl-e-dil meñ hā.e-havvaz

ye hāl-e-zār likkhā jā rahā hai

likhi hai haal-e-dil mein hae-hawwaz

ye haal-e-zar likkha ja raha hai