کی تلاش کا نتیجه | موضو - نظم, صفحہ hiddat-e-lams

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "hiddat-e-lams"

نظم کے متعلقہ نتیجہ "hiddat-e-lams"

نظم

سپید پھول رات کے سیاہ پانیوں سے
آرزو کی آبشار سے
لڑھکتا تیرتا بھٹکتا پتھروں کی رہ گزر سے جائے گا
تو روزن فراز کوہسار سے
نظر اٹھا کے اس کو دیکھنا
وہ کون تھا
فغاں کے مرحلوں میں اس کو کیا ہوا
وہ برگ برگ ہوگا زخم زخم سیل خوں صدائے خون
وہ شاخ سے بریدہ ہو گیا تو ایک خواب تھا
وہ خواب سے بریدہ ہو گیا تو صرف رہ رو ندائے ماورائے قرب و لمس
صرف برگ آسا آخری صدائے دل
وہ سبز تھا نہ سرخ تھا نہ زرد تھا
سپید تھا
سیاہ گر نہ ہو سکا تو محض اتفاق تھا یہ حادثہ
یہ ساری باتیں
تم سے کہہ رہا ہوں
تم جو صرف آنکھ ہو
فراز کوہ پر تمہارا روئے آفتاب ہے
میں پھول ہوں سپید پھول
کون ہے مرا وہاں
میں آبشار کی جلا وطن اداس سلطنت سے
وادیوں کی سمت شام سے رواں
مقدروں کی اے ستم ظریف ساعت گراں

بلراج کومل

نظم

کوئی نے نواز تھا دم بخود
کہ نفس سے حدت جاں گئی
کوئی سر بہ زانو تھا باربدؔ
کہ صدائے دوست کہاں گئی

احمد فراز

نظم

بساط پر جو بھی ہے
وہ ہونے کی مہلتوں میں اسیر
پیہم بدل رہا ہے
وجود وہ حدت رواں ہے
جو نت نئی ہیئتوں میں باقی ہے
اور اس کو فنا نہیں

ضیا جالندھری

نظم

سماعتیں کھلی رکھو
سنہری بالیوں میں جب
فراز لمس نازنیں سے لو پذیر
مہکتے دانے بج اٹھیں
تو سن سکو
زمین زادیاں سنا رہی ہیں گیت

انور شمیم

نظم

دیار برگ رعنا سے
گزرتا ہوں
تو مجھ کو خوف آتا ہے
دم لمس پریشاں سے
صدائے دیدۂ تر سے
میں اس کے رنگ کو
خوشبو کو اس کی نغمگی کو
حادثہ مجروح و داماندہ نہ کر ڈالو

بلراج کومل

نظم

دیار برگ رعنا سے
گزرتا ہوں
تو مجھ کو خوف آتا ہے
دم لمس پریشاں سے
صدائے دیدۂ تر سے
میں اس کے رنگ کو خوشبو کو اس کی نغمگی کو
حادثاً مجروح و واماندہ نہ کر ڈالوں

بلراج کومل

نظم

مرے وجود کا مکان
خار دار تار کا حصار جس کے ارد گرد
آدمی کا خون پینے والی زرد جھاڑیوں کے خار دار ہات ہیں
مری زمیں کے ارد گرد
کہکشاں کے خار دار دائروں کا رقص ہے
زمیں سے آسمان تک
وجود اپنے ان گنت حواس کا گناہ ہے
شعور و لمس و لذت و مقام کے سراب ہیں
میں پوچھتا ہوں سنگ میں گداز پنبہ ڈھونڈنے سے کیا ملا
یہ زندگی یہی تو ہے
کہ ریزہ ریزہ جمع کی ہوئی متاع زیست کو
ہوائے تند پھینک آئے دشت بے سواد میں
مری نظر کے سامنے
نہ جانے کتنے جسم تھے کہ ٹوٹ کر بکھر گئے
میں ایسے ہولناک تجربوں کے بعد بار بار
خود کو یوں سنبھالتا ہوں جیسے اپنے ہات سے
میں گر کے ٹوٹ جاؤں گا
مرا بدن اذیتوں کا خوان ہے
کبھی میں برف کی سلوں کی ہوں غذا
کبھی میں تیرگی کا رزق ہوں
کبھی مرے لئے ہے نوک دار خنجروں کا تخت خواب
اور آج ان اذیتوں کے درمیاں
مرا وجود جیسے مجھ کو چھوڑ کر چلا گیا
میں برگ سبز تھا جسے
خزاں کا ہات شاخ تر سے توڑ کر چلا گیا
میں ایک سمت فلسفے کے ان گنت نکات کی پناہ ہوں
اور ایک سمت آگہی کے جبر کی کراہ ہوں
مسابقت کے دور میں وہ ساعتیں بھی آ گئیں
کہ حسن اور عشق میں متاع اور مشتری کا رمز جاگنے لگا
نہ عشق اتنا بے خبر
نہ حسن اتنا معتبر
کہ بے دلیل قضیۂ وفا کی داد دے سکے
یہ کائنات بے حسی کی اک بسیط شکل ہے
نہ زندگی کا کچھ اثر
نہ موت سے کوئی خطر
اب ایسی کائنات میں
اس ایک ریزۂ وجود کے حواس کیا کریں
اب ایسے سرد جسم کی برہنگی کو دیکھ کر
خلوص و مہر و لطف کے حسیں لباس کیا کریں

سحر انصاری

نظم

مجھے اور تمہیں کوئی ڈر نہیں
نہ کوئی وعدہ وفا کرنا ہے
نہ کوئی امید چراغ جلانا ہے
ایک شادی تھی فرسودہ رسم زمانے کی
وہ مرحلہ بھی طے کر چکے ہم
اپنی اپنی جگہ ہم کتنے مطمئن ہیں
اب ملنے بچھڑنے کا عذاب ہے کب
اب جستجو وصال کیسا
اب لذت لمس کی کسے تمنا
نہ زمانے کی فکر
نہ لوگوں کا خوف
ہم ان تمام جذبوں سے کتنے آگے نکل گئے ہیں نا
ہاتھوں کی پوروں میں سمٹ آئے ہیں
تم لمحہ لمحہ میرا انگ انگ چھوتے ہو
میں بھی اپنے سرہانے تمہارے لفظ پیتی ہوں
انگلی کے ایک اشارے پر دنیا کتنی سمٹ آئی ہے
ہم کو کتنا قریب لے آئی ہے
اور مجھے اور تمہیں کسی کا ڈر نہیں ہے
کیوں کہ میں نے بھی اپنے موبائل کا پاس ورڈ کسی کو نہیں بتایا

مریم تسلیم کیانی

نظم

مرے جسم میں آگ ایسی لگی ہے
جسے سیکڑوں کیا
ہزاروں سمندر بجھانے کو آئیں
تو بجھنے نہ پائے
مری روح کی رہ گزاروں پہ شعلے
لپکتی زبانوں کے کشکول لے کر
مرے جسم سے
خوں کا اک قطرۂ آرزو مانگتے ہیں
مگر جسم میرا تو خود ایک دریوزہ گر ہے
جو لمحہ بہ لمحہ
خود اپنی لگائی ہوئی آگ میں
جل رہا ہے
خیالوں کے سائے بھی
اک آتش غیر محسوس میں جل رہے ہیں
کوئی ہے
جو مجھ کو نجات اس تپش سے دلائے
کوئی ہے
جو میرے لئے ایک ایسا سمندر بتائے
جو کوئی بھی جاں دار و بے جان مخلوق کے لمس سے
آشنا تک نہیں ہو
جو خود اپنے درپن میں
شکل اپنی ہی دیکھ کر
جی رہا ہو
اگر تم کو ایسا سمندر ملے تو بتاؤ
کہ یہ آتش غیر محسوس
ایسے سمندر سے ہی بجھ سکے گی
کہاں ہے سمندر
کہاں ہے سمندر
کہ میں آتش لمس کی لذت غیر محدود سے
اب پگھلنے لگا ہوں

نسیم مظفر پوری

نظم

دل بہت دکھتا ہے ہر بات پہ دل دکھتا ہے
صبح نوخیز پہ سورج کی جہاں بانی پہ
شام دل دوز پہ انجام گل اندامی پہ
عکس موجود پہ
انوار رخ زیبا پہ
نقش موہوم پہ اخف دل فردا پہ
بست افلاک پہ افسانۂ رعنائی پہ
شرۂ نیرنگیٔ ہستی و زلیخائی پہ
رات کے سوز پہ شاموں کے مہک جانے پہ
حدت شوق میں کلیوں کے چٹخ جانے پہ
مضمحل تاروں پہ سہمے ہوئے ایوانوں پہ
قہوہ خانوں میں جمع شہر کے دیوانوں پہ
رند مخمور و بلانوش پہ پروانوں میں
شمع کشتہ پہ اجڑے ہوئے انسانوں پے
آرزوؤں کی سبکساری پے ارزانی پہ
دل شفق رنگ پہ جذبوں کی فراوانی پہ
حسن خود آرا و خود بیں کی دل آرائی پہ
عشق مخمور کی جاں سوزی و تنہائی پہ

اکرام خاور

نظم

سینۂ خواب کھلے
جس طرح پیار میں ڈوبی ہوئی آنکھوں پہ لرزتی ہوئی
پلکوں کا نشہ کھلتا ہے
جس طرح بند کتابوں پہ کسی پھول کے کھلنے کا گماں کھلتا ہے
جس طرح ہاتھ کی پوروں پہ کبھی
پہلے پہلے سے کسی تجربۂ لمس محبت کا اثر کھلتا ہے
سینۂ خواب کھلے
سینۂ خواب کھلے اور میں دیکھوں وہ کم آثار جوانی کا خمار
وہی حیرت جسے میں نے فقط ایک سانس کی ڈوری
میں پرو لینے کی خواہش کی تھی
وہ تذبذب کہ جسے کمسن‌‌ و کم‌ خواب نگاہوں کے بھروسے نے
گلاب اور چنبیلی کی مہک بخشی تھی
مرتعش ہونٹوں پہ موہوم تبسم کا وہ احساس جسے
حرف و آواز بغیر
کعبۂ دل نے ترے چہرۂ گلفام پہ مبعوث کیا
اور پھر میری نگاہوں کی طرف
تیرے آغاز کو بیدار کیا
اے سخن ساز نگاہوں والے
وقت نے عمر گزشتہ کے کئی باب لکھے
اور ہر باب کی دہلیز کسی خواب مقفل کی طرح گم سم ہے
کوئی دستک کوئی آواز کوئی حرف صبا
کوئی تدبیر کہ اس لمحۂ موجود کے مر جانے سے پہلے پہلے
کاش اس خواب مقفل کا بھی سینہ کھل جائے
اور میں دیکھ سکوں
تیرے موہوم تبسم کی کہانی کا حوالہ کیا تھا
اور اب مجھ سے گنہ گار محبت کی تباہی کا ازالہ کیا ہے

ایوب خاور

نظم

میں ٹھنڈی برف کے ذروں سے
پھر سے بن رہا ہوں
تمہارے قرب کی حدت سے
پانی ہو گیا تھا
مگر اب پھر مری تشکیل ہونے جا رہی ہے
میں پھر سے بن رہا ہوں
تمہارے پیار کی حدت یقیناً روح ہے میری
مگر یہ میرے ایک اک عضو کو
پگھلا کے آب و آب کر دے گی
یہ بہتر ہے کہ تم سے فاصلہ ہو
نہ کوئی رابطہ ہو
یہ حدت پھر سے میرا جسم مجھ سے چھین لے گی
میرے اعضا کو پھر اک شکل ملنے دو
مجھے حدت سے اپنے لمس سے
تھوڑی دور رہنے دو

خواجہ ربانی

نظم

خدا کو یاد کرتا ہوں تو ماں کی یاد آتی ہے
ابھی ازلوں سے گرداں چاک کی مٹی کا نم آنکھوں میں روشن تھا کہ میں نے ماں کو دیکھا تھا
مجھے مسکان کا پہلا صحیفہ یاد ہے اب تک
کہ دل جس کی تلاوت سے سکوں کے گھونٹ بھرتا تھا
کہ جس کی لو، اگرچہ وہ نہ شرقی تھی نہ غربی تھی
مگر دو نین کے بلور میں کچھ یوں بھڑکتی تھی
کہ میرے شرق و غرب اک نور کے ہالے میں ایمن تھے
(خدا گر نور ہے تو ماں کی آنکھوں کے سوا کن طاقچوں کو زیب دیتا ہے)
خدا گر رد نہ کر دیتا تو میں آنکھوں سے ضو کرتی اسی لو کی قسم کھاتا
محبت کے مقدس روغن زیتوں سے جو خود میں بھڑکتی تھی
مجھے بھولا نہیں اب تک
وہ پہلا لمس جس سے میری قسمت کی لکیروں میں ابھی تک تابناکی ہے
محبت کا وہ جبرائیل مجھ سے بات کرتا تھا تو میں سرشار ہوتا تھا
میں ڈرتا ہوں خدا کے رزق کا کفران کرنے سے
مگر وہ چاشنی جو رزق میں اس لمس کی شرکت سے تھی اب خواب لگتی ہے
سو ماں کے بعد اک گمبھیر مشکل میں پڑا ہوں میں
کچھ ایسا ہے کہ مجھ کو ربط کچھ باقی نہیں اب نوریان لمس و خندہ کی حکایت سے
سو میں اب لمس و خندہ کے صحیفوں کے بنا عاجز ہوں رب کو بھی سمجھنے سے
کچھ ایسا ہے
کہ جیسے میں کسی بھولی ہوئی امت کے اک متروک معبد میں عبث فریاد کرتا ہوں
خدا کو یاد کرتا ہوں

بلال احمد

نظم

یہ ہرے لان میں
سنگ مرمر کی بینچوں پہ بیٹھی ہوئی
ان مورتوں سے کہیں خوب صورت کہیں مختلف
جن کے جوڑے میں جوہی کی کلیاں سجیں
جو گلاب اور بیلے کی خوشبو پئیں
اور رنگوں کی حدت سے پاگل پھریں

عشرت آفریں

نظم

یہ ہرے لان میں
سنگ مرمر کی بینچوں پہ بیٹھی ہوئی
ان حسیں مورتوں سے کہیں خوبصورت
کہیں مختلف
جن کے جوڑے میں جوہی کی کلیاں سجیں
جو گلاب اور بیلے کی خوشبو پئیں
اور رنگوں کی حدت سے پاگل پھریں

عشرت آفریں

نظم

یہ گلاب اور ڈیزی کی حدت سے نا آشنا
خوشبوؤں کے جواں لمس سے بے خبر
پھول چنتی ہیں لیکن پہنتی نہیں

عشرت آفریں

نظم

جو مزہ چاہت میں ہے
حاصل میں اس کو ڈھونڈھنا بے کار ہے
ہو کہاں تم کس جہاں میں
کیوں مجھے معلوم ہو؟
دھند میں ہو خواب میں
یا آسماں کی قوس میں
یا موج کی گردش میں ہو
تم ہاتھ کی ریکھا کے اندر ہو کہیں
یا دور سناٹوں کے ٹکراؤ سے پیدا
ان سنی آواز کی ریزش میں ہو
چاہے کہیں بھی ہو
مری چاہت کے پھیلے بازوؤں کے
حلقۂ موہوم میں موجود ہو!
لمس میں حدت بہت ہے
اور ستاروں کی چبھن کا بھی مجھے احساس ہے
بند مٹھی میں دبے موتی
کی لذت سے بھی ہوں میں آشنا
پر بیاں کیسے کروں
وہ لطف جو چاہت کی پھیلی باس کی
مدہوش کن ٹھنڈک میں ہے
چاہت کے ہر دم
پھیلتے آفاق کی لرزش میں ہے!!

وزیر آغا

نظم

نواح جاں میں ایک شب
وہ عجب خواب کی ساعت تھی
عجب رنگ کی رات
چاند نے جب سخن آغاز کیا تھا ہم سے
تیری مانوس سی خوشبو سے ہوا تھی لبریز
لمس اول کی سنہری تحریر
تیرے اور میرے سبک ماتھے پر
جب بشارت کی طرح لکھی گئی
اک اسی شب کے لیے
پاٹ کر وقت کے دریا کو
بڑی دور سے آئی تھی میں
آیت ہجر ہوئی تھی منسوخ
اک اسی شب کے لیے
ہم نے اک عمر کسی دور کے سیارے پر
سورۂ عشق تلاوت کی تھی
تو بھی آیا تھا پہن کر نئی پوشاک بدن
دل کی زیبائی پہ کچھ میں نے بھی محنت کی تھی
باغ میں ہنستے ہوئے زرد چراغ
شاخ پر کھلتے ہوئے سرخ گلاب
چشم حیراں میں دمکتے ہوئے خواب
سب پذیرائی کو بیتاب ہوئے جاتے تھے
راستے قرب کی حدت سے گھلے جاتے تھے
جسم پر وصل ابد تاب کی شیریں دستک
روح کا نقرئی در کھولتی تھی
تیری آواز بہت پاس آ کر
میرا سامان سفر کھولتی تھی
جنبش چشم پہ تیری وہ دھڑکنا دل کا
ایک موہوم اشارے پہ سنبھلنا دل کا
یاد کی جھیل میں ہر آن اترتی ہوئی رات
دل سے گزری ہی نہیں پھر وہ پگھلتی ہوئی رات
ہونٹ جب ناؤ بنے اور کنارہ سا بدن
شب تری یاد میں لرزاں تھا ستارہ سا بدن

صائمہ زیدی

نظم

پھر ترے ہاتھوں کا لمس ایسے ملائم الفاظ
تیری آنکھوں کی چمک روشن و مبہم الفاظ
اور وہ لفظ جو لفظوں میں نہاں رہتے ہیں
اور وہ لفظ کہ اظہار کے محتاج نہیں
پھر بھی ہیں ان کے لیے گوش بر آواز سبھی
ان کے ہم راز سبھی
سب سنے میں نے مگر آخر کار
سبھی تحلیل ہوئے

ضیا جالندھری

نظم

حسن میں ترے سامنے آئینہ تھی
ترے ہجر اور وصل کا آئینہ
انہماک و تعلق کی مٹی سے گوندھے ہوئے جسم کو
تیری آنکھوں کی حدت نے چمکایا تھا
تیری خلوت کی حیرت نے وہ رنگ و روغن کئے تھے
کہ آئینے ششدر کھڑے رہ گئے تھے
مگر تیری خلوت کی حیرت میں وحشت کا جو شائبہ تھا
نگاہوں سے میری کہاں چھپ سکا تھا

عشرت آفریں

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے