Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "to.dte"

نظم کے متعلقہ نتیجہ "to.dte"

نظم

پتھروں کو توڑتے ہیں آدمی کے استخواں
سنگ باری ہو تو بن جاتی ہے ہمت سائباں
پیٹ میں لیتی ہے لیکن بھوک جب انگڑائیاں
اور تو اور اپنے بچے کو چبا جاتی ہے ماں

جوش ملیح آبادی
نظم

روک ان ٹوٹتے قدموں کو انہیں پوچھ ذرا
پوچھ اے بھوک سے دم توڑتے ڈھانچوں کی قطار
زندگی جبر کے سانچوں میں ڈھلے گی کب تک
ان فضاؤں میں ابھی موت پلے گی کب تک

ساحر لدھیانوی
نظم

ہم پیدا کرتے ہیں
ہم گیلی مٹی کو مٹھی میں بھینچا کرتے ہیں
تو شکلیں بنتی ہیں
ہم ان کی چونچیں کھول کے سانسیں پھونکا کرتے ہیں
جو مٹی تھے وہ چھو لینے سے طائر ہوتے ہیں
ہم شاعر ہوتے ہیں
کنعان میں رہتے ہیں
جب جلوہ کرتے ہیں
تو ششدر انگشتوں کو پوریں نشتر دیتی ہیں
پھر خون ٹپکتا ہے جو سرد نہیں ہوتا
اک سہما سا سکتہ ہوتا ہے درد نہیں ہوتا
یونان کے ڈاکو ہیں
ہم دیوتاؤں کے محل میں نقب لگایا کرتے ہیں
ہم آسمان کا نیلا شہ دروازہ توڑتے ہیں
ہم آگ چراتے ہیں
تو اس دنیا کی یخ چوٹی سے برف پگھلتی ہے
پھر جمے ہوئے سینے ملتے ہیں
سانس ہمکتی ہے
اور شریانوں کے منہ کھلتے ہیں
خون دھڑکتا ہے
جیون راماین میں
جب راون استبدادی کاروبار چلاتا ہے
ہم سیتا لکھتے ہیں
جب رتھ کے پہیے جسموں کے پوشاک کچلتے ہیں
تو گیتا لکھتے ہیں
جب ہونٹوں کے سہمے کپڑوں پر بخیہ ہوتا ہے
ہم بولا کرتے ہیں
جب منڈی سے ایک ایک ترازو غائب ہوتا ہے
تو جیون کو میزان پہ رکھ کر تولا کرتے ہیں
مزدوری کرتے ہیں
ہم لفظوں کے جنگل سے لکڑی کاٹا کرتے ہیں
ہم ارکشی کے ماہر ہیں انبار لگاتے ہیں
پھر رندہ پھیرتے ہیں پھر برما دیتے ہیں
پھر بدھ ملاتے ہیں پھر چول بٹھاتے ہیں
ہم تھوڑے تھوڑے ہوتے ہیں
اس بھری بھرائی دنیا میں ہم کم کم ہوتے ہیں
جب شہر میں جنگل در آئے اور اس کا چلن جنگلائے
تو ہم غار سے آتے ہیں
جب جنگل شہر کی زد میں ہو اور اس کا سکوں شہرائے
تو برگد سے نکلتے ہیں
ہم تھوڑے تھوڑے ہوتے ہیں
ہم کم کم ہوتے ہیں
ہم شاعر ہوتے ہیں

وحید احمد
نظم

پہلے زمانہ اور تھا مے اور تھی دور اور تھا
وہ بولیاں ہی اور تھیں وہ ٹولیاں ہی اور تھیں، وہ ہولیاں ہی اور تھیں
لیکن مرے پیر مغاں
کل تو نیا انداز تھا
اک دور کا تھا خاتمہ اک دور کا آغاز تھا
تیرے وفاداروں نے جب کھیلیں گلابی ہولیاں
نکلے بنا کر ٹولیاں
ہنستے چلے گاتے چلے
اپنے گلابی رنگ سے دنیا کو نہلاتے چلے
مسجد سے منہ موڑے ہوئے
مندر کا سنگ آستاں چھوڑے ہوئے
گرجا سے کترائے ہوئے
جیسے کہ ہوں روحانیت کی زندگانی ہی سے گھبرائے ہوئے
دور وفاداری کا یہ انجام تھا
فکر گنہ گاری کا تازہ دل ربا پیغام تھا
تیرے ہی کوچے میں یہ سب عہد وفا توڑے گئے
رشتے نئے جوڑے گئے
اور پھر گنہ گاروں نے کیا رندانہ ہنگامے کیے
اس وقت ان کو یاد تھا بس ایک ترسانا ترا
مفلسوں ناداروں کو للچانا ترا
جب میکدے کی گود میں
تیرے جفا تیری سزا کے نام پر ساغر چلے
سوکھے ہوئے کاسے لبالب بھر چلے
سب اپنے لب تر کر چلے
پھر توڑ دیں وہ پیالیاں جن میں سدا پی آئے تھے
شیشے چھنا چھن چھن چھنا چھن ٹوٹتے
اور رند لذت لوٹتے
ٹوٹے ہوئے شیشوں کا اک انبار تھا
شیشوں کے اس انبار میں اک وہ بھی کہنہ جام تھا
جس کو سکندر کے قوی ہیکل جواں
بھاگے تھے پورس کی زمیں کو چھوڑ کر
ان میں وہ کاسے بھی تو ہیں جن کو عرب لے آئے تھے
اپنی عبا سے ڈھانپ کر
پینے سے پہلے دیکھتے تھے محتسب کو جھانک کر
لیکن کبھی
پینے سے باز آتے نہ تھے فاتح جو تھے
ان میں ہیں ایسے جام بھی
جن پر پٹھانوں کے قوی ہاتھوں کے دھندلے سے نشاں
کچھ آج بھی موجود ہیں
اور ان نشانوں میں ہے خوں مفتوح ہندستان کا
اور ان میں ہیں وہ جام بھی جن کو مغل لے آئے تھے
تاتار سے قندھار سے کابل سے رکنا باد سے
مفتوح ہندستان میں
جن کو وہ اپنے قصر عالیشاں میں چھلکاتے رہے
تیغوں سے کھنکاتے رہے
اور وہ حسیں نازک سبک ہلکی صراحی کس کی ہے
پیرس کے مے خانوں میں یہ مشہور تھی
لایا تھا اک تاجر اسے جو بعد میں فاتح بنا
یہ ہلکے شیشوں کے گلاس اور یہ نئے ہلکے سے پیگ
جن پر لکھا ہے یہ بنے تھے ملک انگلستان میں
اور حال کی صدیوں میں چلتے رہے
پینے کو مل جاتی تھی پی لیتے تھے ہم
لیکن تہی دستی کا یہ عالم تھا دل جلتے رہے
ہم آج گھبرا ہی گئے
اور ان سبھی شیشوں کو چکناچور کر ڈالا وفور جوش میں
چھن چھن چھنا چھن توڑ کر
جیسے کہ بربادی کی دیوی چھم چھما چھم ناچتی
ہولی منانے کے لیے مے خانے میں آ ہی گئے
ٹوٹے ہوئے شیشوں کے اس انبار پر
ہم نے جلائی آگ یوں
زردشت کا پاکیزہ دل سچائیوں پر ہنس دیا
جیسے کہ یہ کہنے لگا
جلنے دو جلنے دو یوں ہی شیشے پگھلنے دو یوں ہی
تیرے وفاداروں نے یوں پیر مغاں
شب بھر جلائیں ہولیاں
نعرے وہ مستانے لگے اس جوش میں
دل گر پڑے احساس کی آغوش میں
اور بول اٹھے تسلیم اے پیر مغاں جاتے ہیں ہم
کل پھر پلٹ کر آئیں گے
اس وقت اس مے خانے میں سامان ہوں گے دوسرے
تیرے پرانے ذہن کے معیار توڑے جائیں گے
تعمیر نو کی جائے گی
لیکن ہمارے سال خوردہ مہرباں پیر مغاں
تجھ کو برا لگتا ہے کیوں
غیروں کا کیا تیرا بھی کیا
یہ مے کدہ ہم سب کا ہے پنچایتی
تو کیا ہے تیرا خوف کیا
کہہ تو دیا پیر مغاں کل پلٹ کر آئیں گے
ہرگز نہ ہم باز آئیں گے
کس کو ڈراتا ہے کہ تم اس کی سزا پا جاؤ گے
گاتے تھے ہم گاتے ہیں ہم گائیں گے ہم
ہرگز نہ باز آئیں گے ہم
جھیلیں گے جیتے جائیں گے
پیروں میں ہے زنجیر لیکن ٹوٹ بھی سکتی ہے یہ
ہاں آج ہستی قید ہے کل چھوٹ بھی سکتی ہے یہ
گانے دے گانے دے ہمیں
دھومیں مچانے دے ہمیں
شیشے کو شیشے سے لڑانے دے ہمیں
چھن چھن چھنا چھن کی صدا
بڑھنے دے بڑھنے دے ابھی
ہم مست و بے خود ناچتے گاتے جلاتے توڑتے
ہنستے رہیں چلتے رہیں
اور تو بھی خود پیر مغاں
ہولی کے نغمے سن ذرا اور دیکھ اپنی آنکھ سے
تیرے وفاداروں نے کیا کھیلیں گلابی ہولیاں
منہ مے کدے سے موڑ کر ہولی کی یہ ٹولی چلی
گل زار میں
سبزے لچکتی ڈالیاں گنجان، سندر جھاڑیاں
پانی کی سینچی کیاریاں، کانٹوں میں چبھتی پتیاں
یہ سب سہی لیکن یہاں وہ شے کہاں
جس کے لیے مشہور ہے انگور ناب
ہاں کیا کہا پیر مغاں
تلووں کے نیچے پھول ہیں ان میں سے دو اک چن بھی لوں
خالی ہیں گلدستے ترے
تجھ کو نہیں معلوم ابھی
خالی یہ گلدستے ترے خالی ہی رہ جائیں گے اب
پھولوں نے ٹھانی ہے کہ شاخوں ہی پہ مر جائیں گے اب
اور تیرے کمروں میں وہ نہ آئیں گے اب
منہ بند کلیاں اب کہاں
جو اپنی سندر موہنی مسکان کر دیں رائیگاں
اور اپنا گلشن چھوڑ دیں سینے میں خوشبوئیں لیے
اور اجنبی ماحول میں
طاق نظر کی کانپتی زینت بنیں
کلیوں کے منہ اب کھل چکے منہ بند کلیاں اب کہاں
کلیاں کہاں یہ پھول ہیں
خاک چمن کی گود میں آرام جاں یہ پھول ہیں
آتش زباں یہ پھول ہیں
اور دیکھ تو یہ پھول کتنے شوخ ہیں
جو ٹوٹ کر شاخوں سے گر جاتے ہیں تیری راہ میں
اے دلکش پیر مغاں
یہ چاہتے ہیں روک دیں گل زار میں راہیں تری
تیرے لیے چارہ ہی کیا اب رہ گیا
ان بے حیا پھولوں کی آنکھوں کا تو پانی بہہ گیا
اب ہیں یہ ان کی جرأتیں روکیں گے تیرے راستے
تو بھی خدا کے واسطے
ان کو کچل دے پیس دے
ورنہ خدا نخواستہ
یہ روک ہی لیں راستہ
کلیاں نہیں کانٹے ہیں یہ
کانٹوں سے بھی بد تر ہیں یہ نشتر ہیں یہ خنجر ہیں یہ
گل زار میں تیرے قدم کچھ آج تو آئے نہیں
تو نے انہیں سبزوں پہ کی ہے مے کشی
صدیوں سے تیرا دور ہے
گل زار پر ہے حق ترا
تو ڈر گیا پیر مغاں
کتنا بھیانک خواب تھا
تعبیر کچھ بھی ہو مگر
تیرے وفاداروں نے کل
کس آن سے کس بان سے کس شان سے
کھیلیں گلابی ہولیاں

علی جواد زیدی
نظم

راہ میں آنکھیں بچھائے
پھول نرگس کے ملے
راہ میں مہکے گلاب اور راہ میں لالے کھلے
دید کی لیکن انہیں رفتار فرصت بھی تو دے
منکشف کرتی ہوئی
بے نام جل پریوں کو
گہرے پانیوں میں ایک لمحاتی ترنگ
بے نشان بن باسیوں پر
ٹہنیوں میں آس کے مامن کسی
بھولے بھٹکے زمزمہ کی راہ تکتے
دوار کھولے جاگتے ہیں
رات کالی برشگالی
جگنوؤں کی ناگہاں یلغار
پھر گہرا اندھیرا
اور جبلت کی اتھاہ
شکتیوں کا
بن میں ڈیرا
من میں ڈیرا
ساحلوں کی ریت میں سونپے ہوئے
اک ودیعت کی طرح حشرات آب
خول اپنے توڑتے ہیں
اور بے رہبری ہی آہستہ خرام
اپنے من کی چاندنی میں
رینگنے لگتے ہیں
شور آب بھی کہتے ہیں وہ
اک سمت ہے
اک سمت ہے سحر کشش بھی
سب دشائیں ناگہاں
اک ساتھ بھرتی ہیں ہنکارا
بھولنے لگتے ہیں جب معصوم زائر
جل دشا
کتنے خوں آلود پنجے
کتنے خنجر گھات میں ہیں
پھر بھی جاری یاترا

شفیق فاطمہ شعریٰ
نظم

چھا رہی ہے مہیب خاموشی
بے کراں سی عجیب خاموشی
وقف حرمان و یاس بیٹھی ہوں
آہ کتنی اداس بیٹھی ہوں
دل میں کچھ نقش جگمگاتے ہیں
جس طرح خواب جھلملاتے ہیں
وہ ستم کاریاں یگانوں کی
سرد مہری وہ مہربانوں کی
کڑوی کڑوی بری بری باتیں
زہر میں وہ بجھی بجھی باتیں
چند دم توڑتے ہوئے نغمے
چند سائے سے آرزوؤں کے
زیست کی کائنات ہے ساری
زندگی ایک رات ہے ساری
رات اور موسم خزاں کی رات
رنج و آلام بے کراں کی رات
قبر سے بھی زیادہ تیرہ و تار
ہر نفس ایک آرزو کا مزار
تیرگی میں جہان کھویا سا
درد اک گیت میں سمویا سا
بجھ گئی شمع آرزؤں کی
دل میں اب داغ بھی نہیں کوئی
آہ دشواریاں غریبی کی
ہائے خودداریاں غریبی کی

نجمہ تصدق
نظم

فراق کے لمحے
دم توڑتے
آغوش میں
یادیں
سانس لیتیں
احساسوں میں
اور مسلسل
دھڑکتا رہتا ہے
کوئی
سینے میں

خدیجہ خان
نظم

اونچی پیڑھی پر بیٹھی
برتاوا کرتی
چوکس آنکھیں
ہو کے جیسی بھوک سے لڑتی
روٹی توڑتے ہاتھوں کو تہذیب سکھاتی
چسکے لیتی جیبھوں کو اک حد میں رکھتی
پیاس بجھانے کے آداب بتاتی آنکھیں

حمیدہ شاہین
نظم

دیکھو اس بند کمرے سے باہر نہ نکلو
کیوں کہ ممکن ہے اب تک
وہ زخمی برہنہ بند
باغ کے ایک گوشے میں دم توڑتے ہوں
ہاں اگر ہو سکے تو کسی سے کہو
ان کے خوں گشتہ جسموں پہ
زرتار لفظوں کی پوشاک ڈھک کر
ان کو باہر پڑی کرسیوں پر بٹھا دے
تا کہ اس راہ سے کوئی گزرے
تو کہہ دے کہ سب ٹھیک ہے

زاہدہ زیدی
نظم

سنو ہم درختوں سے پھل توڑتے وقت
ان کے لیے ماتمی دھن بجاتے نہیں
سنو پیار کے قہقہوں
اور بوسوں کے معصوم لمحوں میں ہم
آنسوؤں کے دیوں کو جلاتے نہیں
اور تم لمس بوسوں
سلگتی ہوئی گرم سانسوں میں
آنسو ملانے پہ کیوں تل گئی ہو

فضل تابش
نظم

جس کے چاروں‌ سمت اب تک
پانیوں کا ریلا ہے
ایسا سرد پانی کہ
جس میں کوئی اترے تو
روح سرد پڑ جائے
کانپ جائے سارا تن
کون یہ سمجھتا ہے
خواب کتنے ضدی ہیں
گول گول لہروں میں
ڈوب کر ابھرنے کا
حوصلہ سمیٹے یہ
ایسے کود پڑتے ہیں
جیسے کوئی مدت سے
پیاس میں تڑپتا ہو
اور سامنے اس کے
صرف ایک کوزہ ہو
جس میں چند قطرے ہوں
سن لو آنکھ کا قصہ
قرض اپنے خوابوں کا کس طرح چکاتی ہے
موج کے تھپیڑوں سے ریزہ ریزہ ہوتی ہے
لمحہ لمحہ جلتی ہے ٹوٹ کر برستی ہے
سرخ سرخ ڈوروں میں سب تھکن سمیٹے یہ
خواب کب سمجھتے ہیں آنکھ کی تڑپ کیا ہے
کتنے درد پلکوں پر یوں اٹھائے پھرتی ہے
گہرے اس سمندر میں کیسے کیسے طوفاں ہیں
توڑتے ہیں کیا کیا کچھ شور کیسے کرتے ہیں
خواب ایک جزیرہ ہے وہ کہاں سمجھتا ہے
اس کی ایک خواہش پر آنکھ کتنا روتی ہے
آنکھ کتنا روتی ہے

اسریٰ رضوی
نظم

کچھ دھوپ
اس شہر کے لئے
جس کے بارے میں
البیرونی اور ہوینسانگ سے بھی زیادہ
جانتا ہے ایک رکشے والا
اور جس کی برکت کے لیے
کسی حاکم سے زیادہ فکر مند ہے وہ فقیر
جس کی چوکھٹ چومتے ہیں
کبوتر ہزار
گاتے ابوجھ گان پھڑپھڑاتے پنکھ
توڑتے سایہ سناٹوں کے
لکھتے عبارتیں امن کی
نفرتوں کے آکاش پر
بنا تھکے ہارے

ہری اوم
نظم

گلابی چونچ میں کیڑے لیے اڑتی ہے گوریا
جدھر اک آشیاں میں اس کے بچوں نے ابھی آنکھیں نہیں کھولیں
مگر ہیں بھوک سے بے کل
مچھیرے صبح کی دھندھلی رداؤں میں
پرانے چھپروں کی کوکھ سے شانوں پہ رکھ کر جال نکلے ہیں
وہیں پر کھانستے ہیں چند محنت کش الاؤ کے کنارے بیڑیاں پی کر
فلک پیما عمارت کے لیے مزدور پتھر توڑتے ہیں منہمک ہو کر
سحر کی سرمئی دھندھلی رداؤں میں
میں گہری سوچ میں گم ہوں
صف دانش وراں کیا ان سے برتر ہے؟

عنبر بہرائچی
نظم

تند خو یہ ترے لمحات اسیری اے دل
تیرے انفاس کی گرمی سے حرارت پا کر
سیخچوں میں سے گزرتے ہوئے
پھاندتے توڑتے دیوار و در زنداں کو
رات کی راج دلاری کو تھپکتے گاتے
صبح کے شوخ ستارے کی طرف بڑھتے ہوئے
سوئے خوابیدہ سحر
مطلع انوار کی سمت
بڑھ رہے ہیں نئی امید کا دامن تھامے

کندن اراولی
نظم

رات کی کوئی گھڑی تھی
یا سحر دم کا سماں
دوپہر یا سہ پہر
یا وقت کی حد سے سوا
احساس کا جھونکا کوئی
اب اس سے کوئی فرق تو پڑتا نہیں
بہتے لہو یا ذبح ہوتی گردنوں
مسمار ہوتے خوبصورت مسکنوں کے ڈھیر پر
کب وقت کا یا ساعتوں کا
ہو سکا ہوگا حساب
دم توڑتے بچے کی صبح و شام کیا
بے نام دھندلی ساعتوں کا نام کیا
اک درد ساری ساعتوں سے ماسوا
آدمی کا اک سکوت مرگ اندر صد سکوت
رات کی کوئی گھڑی تھی
یا سحر دم کا سماں
اے خدائے لم یزل
اے چارہ ساز بے کساں
آدمی ہے اور بس اس کی نوائے بے کراں

عین تابش
نظم

کیوں زیاں کار بنوں سود فراموش رہوں
فکر فردا نہ کروں محو غم دوش رہوں
نالے بلبل کے سنوں اور ہمہ تن گوش رہوں
ہم نوا میں بھی کوئی گل ہوں کہ خاموش رہوں
جرأت آموز مری تاب سخن ہے مجھ کو
شکوہ اللہ سے خاکم بدہن ہے مجھ کو
ہے بجا شیوۂ تسلیم میں مشہور ہیں ہم
قصۂ درد سناتے ہیں کہ مجبور ہیں ہم
ساز خاموش ہیں فریاد سے معمور ہیں ہم
نالہ آتا ہے اگر لب پہ تو معذور ہیں ہم
اے خدا شکوۂ ارباب وفا بھی سن لے
خوگر حمد سے تھوڑا سا گلہ بھی سن لے
تھی تو موجود ازل سے ہی تری ذات قدیم
پھول تھا زیب چمن پر نہ پریشاں تھی شمیم
شرط انصاف ہے اے صاحب الطاف عمیم
بوئے گل پھیلتی کس طرح جو ہوتی نہ نسیم
ہم کو جمعیت خاطر یہ پریشانی تھی
ورنہ امت ترے محبوب کی دیوانی تھی
ہم سے پہلے تھا عجب تیرے جہاں کا منظر
کہیں مسجود تھے پتھر کہیں معبود شجر
خوگر پیکر محسوس تھی انساں کی نظر
مانتا پھر کوئی ان دیکھے خدا کو کیونکر
تجھ کو معلوم ہے لیتا تھا کوئی نام ترا
قوت بازوئے مسلم نے کیا کام ترا
بس رہے تھے یہیں سلجوق بھی تورانی بھی
اہل چیں چین میں ایران میں ساسانی بھی
اسی معمورے میں آباد تھے یونانی بھی
اسی دنیا میں یہودی بھی تھے نصرانی بھی
پر ترے نام پہ تلوار اٹھائی کس نے
بات جو بگڑی ہوئی تھی وہ بنائی کس نے
تھے ہمیں ایک ترے معرکہ آراؤں میں
خشکیوں میں کبھی لڑتے کبھی دریاؤں میں
دیں اذانیں کبھی یورپ کے کلیساؤں میں
کبھی ایفریقا کے تپتے ہوئے صحراؤں میں
شان آنکھوں میں نہ جچتی تھی جہانداروں کی
کلمہ پڑھتے تھے ہمیں چھاؤں میں تلواروں کی
ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے
تھی نہ کچھ تیغ زنی اپنی حکومت کے لیے
سر بکف پھرتے تھے کیا دہر میں دولت کے لیے
قوم اپنی جو زرو و مال جہاں پر مرتی
بت فروشی کے عوض بت شکنی کیوں کرتی
ٹل نہ سکتے تھے اگر جنگ میں اڑ جاتے تھے
پاؤں شیروں کے بھی میداں سے اکھڑ جاتے تھے
تجھ سے سرکش ہوا کوئی تو بگڑ جاتے تھے
تیغ کیا چیز ہے ہم توپ سے لڑ جاتے تھے
نقش توحید کا ہر دل پہ بٹھایا ہم نے
زیر خنجر بھی یہ پیغام سنایا ہم نے
تو ہی کہہ دے کہ اکھاڑا در خیبر کس نے
شہر قیصر کا جو تھا اس کو کیا سر کس نے
توڑے مخلوق خدا وندوں کے پیکر کس نے
کاٹ کر رکھ دئیے کفار کے لشکر کس نے
کس نے ٹھنڈا کیا آتشکدۂ ایراں کو
کس نے پھر زندہ کیا تذکرۂ یزداں کو
کون سی قوم فقط تیری طلب گار ہوئی
اور تیرے لیے زحمت کش پیکار ہوئی
کس کی شمشیر جہانگیر جہاں دار ہوئی
کس کی تکبیر سے دنیا تری بیدار ہوئی
کس کی ہیبت سے صنم سہمے ہوئے رہتے تھے
منہ کے بل گر کے ہو اللہ احد کہتے تھے
آ گیا عین لڑائی میں اگر وقت نماز
قبلہ رو ہو کے زمیں بوس ہوئی ہوئی قوم حجاز
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے
محفل کون و مکاں میں سحر و شام پھرے
مئے توحید کو لے کر صفت جام پھرے
کوہ میں دشت میں لے کر ترا پیغام پھرے
اور معلوم ہے تجھ کو کبھی ناکام پھرے
دشت تو دشت ہیں دریا بھی نہ چھوڑے ہم نے
بحر ظلمات میں دوڑا دئیے گھوڑے ہم نے
صفحۂ دہر سے باطل کو مٹایا ہم نے
نوع انساں کو غلامی سے چھڑایا ہم نے
تیرے کعبے کو جبینوں سے بسایا ہم نے
تیرے قرآن کو سینوں سے لگایا ہم نے
پھر بھی ہم سے یہ گلہ ہے کہ وفادار نہیں
ہم وفادار نہیں تو بھی تو دل دار نہیں
امتیں اور بھی ہیں ان میں گنہ گار بھی ہیں
عجز والے بھی ہیں مست مئے پندار بھی ہیں
ان میں کاہل بھی ہیں غافل بھی ہیں ہشیار بھی ہیں
سیکڑوں ہیں کہ ترے نام سے بے زار بھی ہیں
رحمتیں ہیں تری اغیار کے کاشانوں پر
برق گرتی ہے تو بے چارے مسلمانوں پر
بت صنم خانوں میں کہتے ہیں مسلمان گئے
ہے خوشی ان کو کہ کعبے کے نگہبان گئے
منزل دہر سے اونٹوں کے حدی خوان گئے
اپنی بغلوں میں دبائے ہوئے قرآن گئے
خندہ زن کفر ہے احساس تجھے ہے کہ نہیں
اپنی توحید کا کچھ پاس تجھے ہے کہ نہیں
یہ شکایت نہیں ہیں ان کے خزانے معمور
نہیں محفل میں جنہیں بات بھی کرنے کا شعور
قہر تو یہ ہے کہ کافر کو ملیں حور و قصور
اور بے چارے مسلماں کو فقط وعدۂ حور
اب وہ الطاف نہیں ہم پہ عنایات نہیں
بات یہ کیا ہے کہ پہلی سی مدارات نہیں
کیوں مسلمانوں میں ہے دولت دنیا نایاب
تیری قدرت تو ہے وہ جس کی نہ حد ہے نہ حساب
تو جو چاہے تو اٹھے سینۂ صحرا سے حباب
رہرو دشت ہو سیلی زدۂ موج سراب
طعن اغیار ہے رسوائی ہے ناداری ہے
کیا ترے نام پہ مرنے کا عوض خواری ہے
بنی اغیار کی اب چاہنے والی دنیا
رہ گئی اپنے لیے ایک خیالی دنیا
ہم تو رخصت ہوئے اوروں نے سنبھالی دنیا
پھر نہ کہنا ہوئی توحید سے خالی دنیا
ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے جام رہے
تیری محفل بھی گئی چاہنے والے بھی گئے
شب کی آہیں بھی گئیں صبح کے نالے بھی گئے
دل تجھے دے بھی گئے اپنا صلہ لے بھی گئے
آ کے بیٹھے بھی نہ تھے اور نکالے بھی گئے
آئے عشاق گئے وعدۂ فردا لے کر
اب انہیں ڈھونڈ چراغ رخ زیبا لے کر
درد لیلیٰ بھی وہی قیس کا پہلو بھی وہی
نجد کے دشت و جبل میں رم آہو بھی وہی
عشق کا دل بھی وہی حسن کا جادو بھی وہی
امت احمد مرسل بھی وہی تو بھی وہی
پھر یہ آرزدگئ غیر سبب کیا معنی
اپنے شیداؤں پہ یہ چشم غضب کیا معنی
تجھ کو چھوڑا کہ رسول عربی کو چھوڑا
بت گری پیشہ کیا بت شکنی کو چھوڑا
عشق کو عشق کی آشفتہ سری کو چھوڑا
رسم سلمان و اویس قرنی کو چھوڑا
آگ تکبیر کی سینوں میں دبی رکھتے ہیں
زندگی مثل بلال حبشی رکھتے ہیں
عشق کی خیر وہ پہلی سی ادا بھی نہ سہی
جادہ پیمائی تسلیم و رضا بھی نہ سہی
مضطرب دل صفت قبلہ نما بھی نہ سہی
اور پابندی آئین وفا بھی نہ سہی
کبھی ہم سے کبھی غیروں سے شناسائی ہے
بات کہنے کی نہیں تو بھی تو ہرجائی ہے
سر فاراں پہ کیا دین کو کامل تو نے
اک اشارے میں ہزاروں کے لیے دل تو نے
آتش اندوز کیا عشق کا حاصل تو نے
پھونک دی گرمئ رخسار سے محفل تو نے
آج کیوں سینے ہمارے شرر آباد نہیں
ہم وہی سوختہ ساماں ہیں تجھے یاد نہیں
وادیٔ نجد میں وہ شور سلاسل نہ رہا
قیس دیوانۂ نظارۂ محمل نہ رہا
حوصلے وہ نہ رہے ہم نہ رہے دل نہ رہا
گھر یہ اجڑا ہے کہ تو رونق محفل نہ رہا
اے خوشا آں روز کہ آئی و بصد ناز آئی
بے حجابانہ سوئے محفل ما باز آئی
بادہ کش غیر ہیں گلشن میں لب جو بیٹھے
سنتے ہیں جام بکف نغمۂ کو کو بیٹھے
دور ہنگامۂ گلزار سے یکسو بیٹھے
تیرے دیوانے بھی ہیں منتظر ہو بیٹھے
اپنے پروانوں کو پھر ذوق خود افروزی دے
برق دیرینہ کو فرمان جگر سوزی دے
قوم آوارہ عناں تاب ہے پھر سوئے حجاز
لے اڑا بلبل بے پر کو مذاق پرواز
مضطرب باغ کے ہر غنچے میں ہے بوئے نیاز
تو ذرا چھیڑ تو دے تشنۂ مضراب ہے ساز
نغمے بیتاب ہیں تاروں سے نکلنے کے لیے
طور مضطر ہے اسی آگ میں جلنے کے لیے
مشکلیں امت مرحوم کی آساں کر دے
مور بے مایہ کو ہمدوش سلیماں کر دے
جنس نایاب محبت کو پھر ارزاں کر دے
ہند کے دیر نشینوں کو مسلماں کر دے
جوئے خوں می چکد از حسرت دیرینۂ ما
می تپد نالہ بہ نشتر کدۂ سینۂ ما
بوئے گل لے گئی بیرون چمن راز چمن
کیا قیامت ہے کہ خود پھول ہیں غماز چمن
عہد گل ختم ہوا ٹوٹ گیا ساز چمن
اڑ گئے ڈالیوں سے زمزمہ پرداز چمن
ایک بلبل ہے کہ ہے محو ترنم اب تک
اس کے سینے میں ہے نغموں کا تلاطم اب تک
قمریاں شاخ صنوبر سے گریزاں بھی ہوئیں
پتیاں پھول کی جھڑ جھڑ کے پریشاں بھی ہوئیں
وہ پرانی روشیں باغ کی ویراں بھی ہوئیں
ڈالیاں پیرہن برگ سے عریاں بھی ہوئیں
قید موسم سے طبیعت رہی آزاد اس کی
کاش گلشن میں سمجھتا کوئی فریاد اس کی
لطف مرنے میں ہے باقی نہ مزہ جینے میں
کچھ مزہ ہے تو یہی خون جگر پینے میں
کتنے بیتاب ہیں جوہر مرے آئینے میں
کس قدر جلوے تڑپتے ہیں مرے سینے میں
اس گلستاں میں مگر دیکھنے والے ہی نہیں
داغ جو سینے میں رکھتے ہوں وہ لالے ہی نہیں
چاک اس بلبل تنہا کی نوا سے دل ہوں
جاگنے والے اسی بانگ درا سے دل ہوں
یعنی پھر زندہ نئے عہد وفا سے دل ہوں
پھر اسی بادۂ دیرینہ کے پیاسے دل ہوں
عجمی خم ہے تو کیا مے تو حجازی ہے مری
نغمہ ہندی ہے تو کیا لے تو حجازی ہے مری

علامہ اقبال
نظم

لے کے اک چنگیز کے ہاتھوں سے خنجر توڑ دوں
تاج پر اس کے دمکتا ہے جو پتھر توڑ دوں
کوئی توڑے یا نہ توڑے میں ہی بڑھ کر توڑ دوں
اے غم دل کیا کروں اے وحشت دل کیا کروں

اسرار الحق مجاز
نظم

ہر آن نفع اور ٹوٹے میں کیوں مرتا پھرتا ہے بن بن
ٹک غافل دل میں سوچ ذرا ہے ساتھ لگا تیرے دشمن
کیا لونڈی باندی دائی دوا کیا بندا چیلا نیک چلن
کیا مندر مسجد تال کنواں کیا کھیتی باڑی پھول چمن
سب ٹھاٹھ پڑا رہ جاوے گا جب لاد چلے گا بنجارا

نظیر اکبرآبادی
نظم

جہاں زاد میں آج تیری گلی میں
یہاں رات کی سرد گوں تیرگی میں
ترے در کے آگے کھڑا ہوں
سر و مو پریشاں
دریچے سے وہ قاف کی سی طلسمی نگاہیں
مجھے آج پھر جھانکتی ہیں
زمانہ، جہاں زاد وہ چاک ہے جس پہ مینا و جام و سبو
اور فانوس و گلداں
کے مانند بنتے بگڑتے ہیں انساں
میں انساں ہوں لیکن
یہ نو سال جو غم کے قالب میں گزرے!
حسن کوزہ گر آج اک تودۂ خاک ہے جسم
میں نم کا اثر تک نہیں ہے
جہاں زاد بازار میں صبح عطار یوسف
کی دکان پر تیری آنکھیں
پھر اک بار کچھ کہہ گئی ہیں
ان آنکھوں کی تابندہ شوخی
سے اٹھی ہے پھر تودۂ خاک میں نم کی ہلکی سی لرزش
یہی شاید اس خاک کو گل بنا دے!

ن م راشد
نظم

میں نے ماضی سے کئی خشک سی شاخیں کاٹیں
تم نے بھی گزرے ہوئے لمحوں کے پتے توڑے
میں نے جیبوں سے نکالیں سبھی سوکھی نظمیں
تم نے بھی ہاتھوں سے مرجھائے ہوئے خط کھولے
اپنی ان آنکھوں سے میں نے کئی مانجے توڑے
اور ہاتھوں سے کئی باسی لکیریں پھینکیں
تم نے پلکوں پہ نمی سوکھ گئی تھی سو گرا دی
رات بھر جو بھی ملا اگتے بدن پر ہم کو
کاٹ کے ڈال دیا جلتے الاؤ میں اسے

گلزار
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے