Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "2 3 ebooks"

Nazm MATCHES FOR "2 3 ebooks"

Nazm

rumuz-e-mohabbat

1
jab aa.nkh khol ke dekhaa to ho gayaa mastuur
ye meraa diida-e-biinaa hii ik hijaab hu.aa
tuu chhup gayaa mah o anjum me.n laala-o-gul me.n
har ek jalva-e-ra.ngii.n tiraa naqaab hu.aa
jab aa.nkh band hu.ii tuu hii jalva-aaraa thaa
2
mirii zabaan khulii sharh-e-aashiqii ke liye
miraa bayaa.n thaa muraqqa.a mirii KHajaalat kaa
har ek harf me.n thaa Gairiyat kaa afsaana
mirii zabaa.n ne kiyaa KHuu.n mirii mohabbat kaa
mire sukuut me.n tuufaan-e-ishq barpaa thaa
3
mire havaas rahe tere vasl me.n haa.il
jo be-KHudii me.n hu.aa Garq tuu milaa mujh ko
ajiib shai hai mohabbat me.n KHud-faraamoshii
fanaa hu.aa to milii lazzat-e-baqaa mujh ko
miraa vajuud hii ai dost ek parda thaa

Asar Sahbai
Nazm

wo zinda hai

gulaabii daur me.n
vo apne fan kaa shaahzaada thaa
fazaa-e-aariz-o-chashm-o-lab-o-gesuu kaa shaidaa.ii
vo uryaa.n
niim-uryaa.n jism kii qaus-e-quzah
un kaa ta.assur
un kii bijlii
apnii tasviiro.n me.n bhartaa thaa
hasiino.n ke dilo.n me.n vo thaa
KHud bhii un pe martaa thaa
use us daur me.n
izzat milii
daulat milii lekin
dil-e-ruumaan-parvar me.n
ko.ii sho.ala saa bhii mahsuus kartaa thaa!
2
musavvir hii ke naate
us kaa ''shash-pahluu'' tasavvur
ek sho.ala thaa
ki jis ne fan kaa vo pichhlaa tasavvur KHaak kar Daalaa
vo tasviiro.n me.n
tajriidii tasavvur zindagaanii kaa
ba.Dii KHuubii se bhartaa thaa
dikhaa.ii dene vaalaa ik nayaa sa.ngiit detaa thaa
3
vo janib-daar thaa
aur saaf kahtaa thaa
ki jab insaaniyat
tahziib
aur aalaa-tariin qadre.n
ghirii ho.n saKHt KHatro.n me.n
to ik fankaar par bhii ye bataanaa farz hotaa hai
ki vo kis kii taraf hai
fan kaa us se kyaa taqaazaa hai
4
''pikaaso'' mar gayaa
ye sog hai lekin
''pikaaso'' ab bhii zinda hai
vo apne shah-kaaro.n me.n
usii andaaz se khoyaa hu.aa hai
aur kahtaa hai:
mai.n zinda huu.n
dilo.n ke dard ko
bechainiyo.n ko
iztiraاbiyo.n
aur aaho.n ko
kahii.n ik ''manzil-e-zinda'' se pahle maut aatii hai

Salam Machhli shahri
Nazm

chand buDhi nazmen

1
potii se daadii ban.ne ke lambe safar me.n
aisaa ko.ii pa.Daav nahii.n aaya thaa jis par
ruk ke taaza dam hone kii
suukhii so.ndhii payaal pe pa.D ke
miiThe miiThe sapno.n me.n so jaane kii mohlat miltii
ab manzil par aa ke thak ke chuur pa.Dii vo
miiThe sapno.n me.n so jaane kii koshish
karte karte kyaa behaal hu.ii jaatii hai
khaa.ns khaa.ns ke saarii raat guzar jaatii hai
2
bhare-pure mahlo.n jaise is ghar kaa
ik ik kamra
apne apne naam se ab reserve karaa rakkhaa hai sabho.n ne
vo jo barsaatii me.n biitii yaade.n o.Dh ke leTaa
apne din gintaa hai
name plate pe ghar ke usii buu.Dhe kaa naam
likhaa hu.aa hai ba.De ba.De harfo.n me.n
3
rasta bilkul saaf hai
puKHta siidhii sa.Dak hai
niile vaale baaG ke phuulo.n se milne rozaana
jaayaa jaa saktaa hai lekin kaise
soch ke hii pairo.n me.n ai.nThan hone lagtii hai
aur dam be-dam hone lagtaa hai
4
betaabi se Dhuu.nD rahaa hai kaise paa.egaa ab
vo sab kuchh jo chho.D gayaa thaa
na.e na.e saamaano.n se ghar chhat tak aTaa pa.Daa hai
pahle jo rakkhaa thaa yahaa.n vo un me.n dab kar
TuuT ke chaknaa-chuur hu.aa yaa ko.ii kabaa.Dii
saste daamo.n le ke gayaa ye kaun bataa.e
taal pe us ke laa.e hu.e stereo music system ke
sab thirak rahe hai.n
aise shor-sharaabe me.n ab us kii kaun sunegaa
pahle ghar vaalo.n se i s D par
minto.n kaa hii raabta ik qaa.em to ho jaataa thaa

Bilqis Zafirul Hasan
Nazm

tin rang ek rang

tum patang ban ke havaa.o.n me.n tairtii phiro
aur Dor mire haatho.n ko kaaTtii rahe
par par zaKHmii aur aa.nkhe.n tere rango.n me.n uljhii rahe.n
lahuu bahtaa rahe
aur aas tujhe chaahne kii
aasmaan ban ke tire chaaro.n taraf bikhar jaa.e
shaam utre to terii aa.nkho.n kaa rang
mujhe apnii panaah me.n sameT le
aur terii raaho.n par meraa ik ik lams bikher de
terii raaho.n kaa kuchh pataa to hogaa
aur tere vaqt kii ko.ii manzil to hogii jaan
(2)
ek mai.n tanhaa ek vo tanhaa
ek vo jis se mai.n tumhaarii kathaa kahtaa huu.n
ek vo jo kisii kii kathaa se mujh me.n zinda
aur tum tanhaa
lo ye bhii ko.ii baat hu.ii tum ne kahaa
haa.n ye baate.n aur in baato.n ke nukiile ku.ngre
jab terii jaan me.n aTakte hai.n
to tumhaare naaKHuno.n me.n aisii shafaq dahaktii hai
jo sun na sake kuchh kah na sake
tab merii uma.ngo.n par ik aag lahraatii hai
aur mai.n tujhe un KHud-rav ja.ngalii phuulo.n se tashbiih detaa huu.n
jo sirf apnii vahshat me.n zinda rahte hai.n
(3)
zaKHm khul ga.e hai.n jaanaa.n
aur havaa.e.n chaaro.n taraf se umDii pa.Dii hai.n

Faheem Jozi
Nazm

dhaDkanen

(1)
mausam-e-sarmaa kii ThiThuraatii hu.ii shaam-e-hazii.n
choTiyo.n par barf kii ik laash
saare pe.D nange TunD-munD
sahn me.n vo charmaraate bhuure patto.n kaa kafan
ek sannaaTaa
vo ik Tahnii ta.DaKH kar gir pa.Dii
ik saa.ns TuuTaa
(2)
mai.n ne kal hii apne buu.Dhe baap ke ThanDe badan ko
Gusl de ke apne haatho.n
kaalii dhartii ke dahaane me.n utaaraa
ki yahii hai rasm
mai.n zinda bhii paamaal-e-rusuum
zindagii me.n vo chaTaktii raushnii kaa ek miinaar-e-buland
us kii kirno.n ne hazaaro.n qumqume raushan kiye
aur ye rasm-e-zamaana
umr-bhar jo duusro.n ko raushnii detaa rahaa
ik a.ndherii qabr is ke vaaste
(3)
aane vaale mausamo.n me.n sai.nka.Do.n hii Tahniyaa.n phuuTe.ngii
lekin jis jagah us pe.D se ye shaaKH TuuTii
vo nishaa.n ik daa.era ban kar rahegaa
mai.n ne jin haatho.n se apne baap ke ThanDe badan ko
kaalii dhartii ke dahaane me.n utaaraa
us kii poro.n se vo buu.Dhii dha.Dkane.n qirtaas par bahtii rahe.ngii

Ejaz Farooqi
Nazm

achchhi chiDiya

1
ek thii chi.Diyaa
ek thaa kavvaa
ek thii mainaa
ek thaa totaa
ek thii billii
ek thaa kuttaa
ek thii murGii
ek thaa bakraa
chi.Diyaa kavvaa
mainaa totaa
billii kuttaa
murGii bakraa
ye sab saath rahaa karte the
dukh-sukh saath sahaa karte the
2
achchhii chi.Diyaa bholii bholii
ik din in sab se bolii
aa.o chal kar kaam kare.n kuchh
kaam kare.n kuchh naam kare.n kuchh
KHaalii rah kar vaqt na kho.e.n
khet me.n chal kar gehuu.n bo.e.n
jab ye sab gehuu.n pak jaa.e.n
tab ham sab mil jal kar khaa.e.n
3
chi.Diyaa kii jab baat sunii ye
kavvaa bolaa mai.n nahii.n botaa
mainaa bolii mai.n nahii.n botii
totaa bolaa mai.n nahii.n botaa
billii bolii mai.n nahii.n botii
kuttaa bolaa mai.n nahii.n botaa
murGii bolii mai.n nahii.n botii
bakraa bolaa mai.n nahii.n botaa
sab ne kahaa jab ham nahii.n bote
chi.Diyaa ne vo aap hii boyaa
4
tho.De dino.n me.n vaqt vo aayaa
khet ye gehuu.n kaa phal laayaa
chi.Diyaa bolii chal kar kaaTe.n
gehuu.n se ghar apnaa paaTe.n
un sab ne jab kaam sunaa ye
kavvaa bolaa mujh se na hogaa
mainaa bolii mai.n na karuu.ngii
totaa bolaa mujh se na hogaa
billii bolii mai.n na karuu.ngii
kuttaa bolaa mujh se na hogaa
murGii bolii mai.n na karuu.ngii
bakraa bolaa mujh se na hogaa
jab na kisii ne kaam kiyaa ye
chi.Diyaa ne khet aap hii kaaTaa
5
gehuu.n ghar me.n kaaT ke Daale
phir sab se yuu.n bolii chi.Diyaa
aa.o ye ham chakkii me.n piise.n
pis kar ye ho jaa.e.nge aaTaa
chakkii aur aaTe kii sun kar
un me.n se har ik ghabraayaa
sab se pahle kavvaa bolaa
aaTaa ye mujh se na pisegaa
mainaa bolii totaa bolaa
aaTaa ye mujh se na pisegaa
mainaa bolii totaa bolaa
aaTaa ye ham se na pisegaa
billii bolii kuttaa bolaa
aaTaa ye ham se na pisegaa
murGii bolii bakraa bolaa
aaTaa ye ham se na pisegaa
jab na kisii ne piisaa aaTaa
chi.Diyaa ne vo aap hii piisaa
6
saare gehuu.n piis chukii vo
phir un se yuu.n bolii chi.Diyaa
aa.o pakaa.e.n mil kar roTii
kaam ye ho jaa.e to hai achchhaa
baat ye sun kar kavvaa bolaa
mujh se nahii.n pak saktii ye roTii
mainaa bolii totaa bolaa
ham se nahii.n pak saktii ye roTii
billii bolii kuttaa bolaa
ham se nahii.n pak saktii ye roTii
murGii bolii bakraa bolaa
ham se nahii.n pak saktii ye roTii
jab na kisii ne kaam kiyaa ye
chi.Diyaa ne roTii bhii pakaa lii
7
roTii jab chi.Diyaa ne pakaa lii
puuchhaa kaun ye khaa.egaa roTii
kavvaa bolaa mai.n khaa.uu.ngaa
sab roTii chaT kar jaa.uu.ngaa
mainaa bolii mai.n khaa.uu.ngii
totaa bolaa mai.n khaa.uu.ngaa
billii bolii mai.n khaa.uu.ngii
kuttaa bolaa mai.n khaa.uu.ngaa
murGii bolii mai.n khaa.uu.ngii
bakraa bolaa mai.n khaa.uu.ngaa
sab ne kahaa ham khaa.e.nge roTii
saarii chaT kar jaa.e.nge roTii
dil me.n vo na zaraa sharmaa.e
jhaT-paT roTii khaane aa.e
8
ab to un se chi.Diyaa bolii
roTii ye tum ko na milegii
kaam se tum sab ghabraate ho
phir ye roTii kyo.n khaate ho
phir ye roTii kyo.n khaate ho
baat ye sun kar sab ghabraa.e
sab sharmaa.e sab pachhtaa.e
chi.Diyaa aur sab us ke bachche
mil kar khaanaa khaane baiThe
sab ne mil kar khaanaa khaayaa
sab ne mil kar gaanaa gaayaa
kaam kaa phal chi.Diyaa ne paayaa
kaam ne in kaa kaam banaayaa
chaa.nd me.n baiThii taaraa raanii
ai lo bachcho KHatm kahaanii

Mohammad Shafiuddin Nayyar
Nazm

shair ki duniya

hotaa huu.n jab mai.n tanhaa ye sochtaa huu.n aksar
aabaadiyaa.n hai.n achchhii yaa ja.ngalo.n ke manzar
shaa.ir huu.n mai.n miraa ho maskan alag jahaa.n se
shahro.n ke shor-o-Gul se taariik aasmaa.n se
saa.e me.n pe.D ke mai.n bistar lagaa.uu.n apnaa
ThanDii havaa ho aatii bahtaa ho saaf dariyaa
ra.ngiiniyaa.n shafaq kii dil ko mire lubhaa.e.n
shams-o-qamar jahaa.n ke qisse na.e sunaa.e.n
qudrat kaa ham-zabaa.n huu.n aur us ke bhed paa.uu.n
gahraa.iyo.n me.n us kii goyaa utar mai.n jaa.uu.n
2
par aql kaa hai kahnaa ye sab Galat hai naadaa.n
guu.ngii hai terii qudrat manzar hai.n us ke be-jaa.n
be-kaar hai agar to dasht-o-jabal basaa.e
be-sarfa hai agar to hamdam unhe.n banaa.e
shaa.ir tujhe hai.n kahte hai ishq teraa jiinaa
fitrat hai paak terii hai qalb-e-tuur-e-siinaa
tuu nuur-e-sarmadii kii hai jhalkiyaa.n dikhaataa
insaa.n ko aasmaa.n kii saire.n hai to karaataa
teraa qalam jahaa.n me.n halchal sii Daaltaa hai
Duube ubhaartaa hai girte sambhaaltaa hai
3
par kyuu.n tujhe ai shaa.ir bastii se hai kuduurat
aabaadiyo.n me.n pal kar aabaadiyo.n se nafrat
insaa.n aur us kii fitrat parkhii nahii.n hai tuu ne
aalam aur us kii vus.at paa.ii nahii.n hai tuu ne
maatam kahii.n bapaa hai KHushiyaa.n kahii.n hai.n hotii
iqbaal hai kahii.n to qismat kahii.n hai sotii
jo ik taraf qazaa ke tuufaan aa rahe hai.n
tuu ik taraf sahaab-e-rahmat bhii chhaa rahe hai.n
teraa hai rutba aalii is bazm-e-zindagii me.n
aa aa shariik ho jaa is razm-e-zindagii me.n
aalaam ko ghaTaa de aasaa.ishe.n ba.Dhaa de
sham-e-suKHan jalaa kar sab zulmate.n haTaa de
aa kab se muntazir hai aadam kaa ye gharaanaa
aabaad is me.n ho jaa terii yahii hai duniyaa

Ameer Aurangabadi
Nazm

madh

(1)
kas tarah bayaa.n ho tiraa pairaa-e-taqriir
goyaa sar-e-baatil pe chamakne lagii shamshiir
vo zor hai ik lafz idhar nutq se niklaa
vaa.n siina-e-aGyaar me.n paivast hu.e tiir
garmii bhii hai ThanDak bhii ravaanii bhii sakuu.n bhii
taasiir kaa kyaa kahiye hai taasiir hii taasiir
e.ajaaz usii kaa hai ki arbaab-e-sitam kii
ab tak ko.ii anjaam ko pahu.nchii nahii.n tadbiir
atraaf-e-vatan me.n hu.aa haq baat kaa shohra
har ek jagah makr-o-riyaa kii hu.ii tash.hiir
raushan hu.e ummiid se ruKH ahl-e-vafaa ke
peshaanii-e-aadaa pe siyaahii hu.ii tahriir
(2)
hurriyat-e-aadam kii rah-e-saKHt ke rah-giir
KHaatir me.n nahii.n laate KHayaal-e-dam-e-ta.aziir
kuchh na.ng nahii.n ranj-e-asiirii ki puraanaa
mardaan-e-safaa-kesh se hai rishtaa-e-zanjiir
kab dabdaba-e-jabr se dabte hai.n ki jin ke
iimaan o yaqii.n dil me.n kiye rahte hai.n tanviir
ma.aluum hai un ko ki rihaa hogii kasii din
zaalim ke giraa.n haath se mazluum kii taqdiir
aaKHir ko sar-afraaz hu.aa karte hai.n ahraar
aaKHir ko giraa kartii hai har jaur kii ta.amiir
har daur me.n sar hote hai.n qasr-e-jam-o-daaraa
har ahd me.n diivaar-e-sitam hotii hai tasKHiir
har daur me.n mal.uun shaqaavat hai 'shimar' kii
har ahd me.n mas.uud hai qurbaanii-e-shabbiir
(3)
kartaa hai qalam apne lab o nutq kii tathiir
pahu.nchii hai sar-e-haraf-e-du.aa ab mirii tahriir
har kaam me.n barkat ho har ik qaul me.n quvvat
har gaam pe ho manzil-e-maqsuud qadam-giir
har lahza tiraa taale-e-iqbaal sivaa ho
har lahza madad-gaar ho tadbiir kii taqdiir
har baat ho maqbuul, har ik bol ho baalaa
kuchh aur bhii raunaq me.n ba.Dhe shola-e-taqriir
har din ho tiraa lutf-e-zabaa.n aur ziyaada
allaah kare zor-e-bayaa.n aur ziyaada

Faiz Ahmad Faiz
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

chaak

kahii.n ko.npalo.n ko nikhaartaa hai vo lazzat-e-nam-e-shaaKH se
kahii.n muu-qalam se sa.nvaartaa hai gulo.n me.n rang na.e na.e
kabhii baKHshaa hai dilo.n ko dard kii jaa.n-gudaaz lataafate.n
ko.ii rang ho ko.ii ruup ho
ko.ii shakl ko.ii mizaaj ho
sabhii us ke chaak se aa.e hai.n
2
ye saarii baate.n sach hii sahii
ye saare gumaan durust sahii
par ye to kaho
qadmo.n tale rau.nde patto.n kii aavaaz sunii hai tum ne kabhii
murjhaa.e hu.e phuulo.n se kabhii biitii hu.ii rut kii baat hu.ii
kabhii KHauf-zada naKHchiiro.n kii aa.nkho.n me.n jhaa.nk ke dekhaa hai
kabhii dukhte dilo.n kii us dha.Dkan us dahshat me.n bhii shariik hu.e
jo hote hu.e bhii na hone ke ehsaas se paidaa hotii hai
phaTii puraanii shaklo.n vaale
ye apaahij ye ma.azuur za.iif
ye TuuTe phuuTe khilaune bhii
usii chaak se aa.e hai.n ki nahii.n
kal jin kii hayaat thii barq-aasaa
paivand-e-KHas-o-KHaashaak hu.e
jinhe.n dekh ke aa.nkhe.n raushan thii.n
pinhaa.n pas-e-parda-e-KHaak hu.e
vo naqsh-gar-e-kaamil hai to phir
jo naqsh-e-jamiil banaataa hai
jo dard dilo.n me.n jagaataa hai
use Gaarat kyuu.n kar detaa hai
fankaar-e-azal ko kyaa apne kisii naqsh pe itminaan nahii.n
3
aadmii-zaade kisii rang kisii naqsh kaa paaband na ho
ziist Thahraa hu.aa jouha.D nahii.n mavvaaj-o-ravaa.n dariyaa hai
tuu hai ik Thahre hu.e pal me.n talabgaar-e-davaam
ye davaam asl me.n hai be-hisi-e-marg kaa naam
aadmii-zaade tire rishte hai.n baadal kii tarah
ghir ke aate hai.n baraste hai.n guzar jaate hai.n
yuu.n bhii hotaa hai ki kuchh der Thahar jaate hai.n
yuu.n bhii hotaa hai ki bin barse bikhar jaate hai.n
tuu kisii rishte kisii abr kaa paaband na ho
tuu ki hai TuuTe khilaune ke liye girya-kunaa.n
dekh ye KHaak ke paikar to faqat shakl badal lete hai.n
inhii TuuTe hu.e bekaar khilauno.n kii ye miTTii phir se
ziist ke chalte hu.e chaak ke kaam aatii hai
phir na.e ruup me.n Dhal jaatii hai
jaane vaalo.n ke liye
miTte ra.ngo.n ke liye TuuTe khilauno.n ke liye
teraa har nauha bajaa hai lekin
aane vaalo.n kaa banaav bhii to dekh
taaza ko.npal kii nazaakat me.n tanaav bhii to dekh
ki vo fankaar-e-azal
aaj bhii apne usii chaak pe hai

Zia Jalandhari
Nazm

parchhaiyan

kyuu.n na ab tum se tasavvur me.n karuu.n baat suno tum se ye kahnaa hai mujhe
tum kahogii nahii.n mai.n vaj.h-e-suKHan jaan ga.ii
yaad se terii hii ma.amuur hai.n din-raat ye kahnaa hai mujhe
tum kahogii ki mai.n hastii ko kafan maan ga.ii
raah-e-ulfat me.n kabhii hogaa tiraa saath ye kahnaa hai mujhe
tum kahogii mai.n zamaane kaa chalan jaan ga.ii
kaun badlegaa ye haalaat ye kahnaa hai mujhe
tum kahogii mai.n unhe.n daar-o-rasan maan ga.ii
zindagii ye hai to marnaa bhii hai baaraat ye kahnaa hai mujhe
tum kahogii ki ye mai.n soKHta-tan jaan ga.ii
2
mai.n zamaane ke huu.n aa.iin kaa paaband ye kahnaa hai mujhe
tum kaho dekho ki ye marg-e-abad hai ki nahii.n
haa.n mai.n is pe huu.n razaa-mand ye kahnaa hai mujhe
tum kaho jaur-e-zamaa.n kii ko.ii had hai ki nahii.n
mujh pe har raah hu.ii band ye kahnaa hai mujhe
tum kaho zinda giraftaar-e-lahad hai ki nahii.n
haa.n giraftaar huu.n do chand ye kahnaa hai mujhe
tum kaho ne.amat-e-hastii se ye kad hai ki nahii.n
3
tum merii ziist ke viiraane me.n partav ho KHayaabaano.n kaa
mai.n to sarsar huu.n ki viiraano.n se kyaa mel KHayaabano.n ke
tum to ho naGma-e-shab-taab mare uj.De shabistaano.n kaa
mai.n to shevan huu.n ki shevan hai.n nishaa.n aise shabistaano.n ke
tum nayaa ruup rachaa.o nayaa si.ngaar ho mere na.e armaano.n kaa
mai.n to huu.n KHuun-e-tamannaa ki sadaa KHuun hu.aa karte hai.n armaano.n ke
tum to amrit ho malaalo.n ke alaav me.n jalii jaano.n kaa
mai.n nahii.n raakh bhii kyaa aur nishaa.n ho.nge malaalo.n se jalii jaano.n ke

Mukhtar Siddiqui
Nazm

tin muKHtasar nazmen

1
is tarah lab hile
ki raato.n ne
apne siine ke raaz khol diye
2
munjamid qadmo.n ko pighlaataa hai kaun
raasta ban kar
chalaa jaataa hai kaun
3
tere labo.n par
mere dil kii KHvaahish hai
aa jaa.e na ko.ii tabaahii
dekh ke chal

Ali Zaheer Rizvi Lakhnavi
Nazm

KHuda se

tujh ko bhii kuchh KHabar hai duniyaa banaane vaale
ye kaar-gaah-e-hastii baazaar-e-auj-o-pastii
le dekh ho rahii hai bechainiyo.n kii bastii
tujh ko bhii kuchh KHabar hai duniyaa banaane vaale
2
phuulo.n ke chaak daamaa.n Guncho.n me.n soz-e-pinhaa.n
gulshan bahaar me.n bhii be-kaif-o-dard-saamaa.n
soz-e-daruu.n nahii.n hai josh-e-junuu.n nahii.n hai
dil hii se aashiqii thii dil hii me.n KHuu.n nahii.n hai
paimaane uTh ga.e hai.n maiKHaane uTh ga.e hai.n
viiraaniyaa.n salaamat diivaane uTh ga.e hai.n
tujh ko bhii kuchh KHabar hai duniyaa banaane vaale
3
maamuur-e-Gam hai duniyaa daar-e-alam hai duniyaa
daam-e-tava.nagrii me.n said-e-sitam hai duniyaa
aare se chal rahe hai.n naqshe badal rahe hai.n
insaa.n kaa KHuun pii kar insaan pal rahe hai.n
mafquud KHurramii hai har bazm maatamii hai
is Gam-kade kii har shai goyaa jahannamii hai
tujh ko bhii kuchh KHabar hai duniyaa banaane vaale
4
ai kaar-saaz-e-aalam ai be-niyaaz-e-aalam
ma.amuur-e-soz-e-Gam hai kab se ye saaz-e-aalam
maayuus ho chuke hai.n himmat hii kho chuke hai.n
insaa.n bhalaa.iyo.n kii qismat ko ro chuke hai.n
barbaad ho rahe hai.n naashaad ho rahe hai.n
bande tire saraapaa fariyaad ho rahe hai.n
tujh ko bhii kuchh KHabar hai duniyaa banaane vaale
5
haivaan bhii nahii.n hai.n insaan bhii nahii.n hai.n
insaa.n-numaa darinde shaitaan bhii nahii.n hai.n
ye zohd kii dukaane.n ye ma.asiyat kii kaane.n
ye vaa.izo.n ke mu.nh me.n chaltii hu.ii zabaane.n
fir.aun ho rahe hai.n mal.uun ho rahe hai.n
maz.hab-farosh mullaa qaaruun ho rahe hai.n
tujh ko bhii kuchh KHabar hai duniyaa banaane vaale
6
ai be-niyaaz-e-hastii ai kaar-saaz-e-hastii
kab tak rahegaa yuu.nhii poshiida raaz-e-hastii
ko.ii nahii.n hamaaraa ko.ii nahii.n sahaaraa
kis samt bah rahii hai ye zindagii kii dhaaraa
fikr-e-davaa nahii.n hai zikr-e-du.aa nahii.n hai
dil kah rahaa hai ab to ko.ii KHudaa nahii.n hai
tujh ko bhii kuchh KHabar hai tujh ko bhii kuchh KHabar hai

Qaisar Amravatwi
Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

aadhi raat

1
siyaah pe.D hai.n ab aap apnii parchhaa.ii.n
zamii.n se taa-mah-o-anjum sukuut ke miinaar
jidhar nigaah kare.n ik athaah gum-shudgii
ik ek kar ke fasurda charaaGo.n kii palke.n
jhapak ga.ii.n jo khulii hai.n jhapakne vaalii hai.n
jhalak rahaa hai pa.Daa chaa.ndnii ke darpan me.n
rasiile kaif bhare manzaro.n kaa jaagtaa KHvaab
falak pe taaro.n ko pahlii jamaahiyaa.n aa.ii.n
2
tamoliyo.n kii dokaane.n kahii.n kahii.n hai.n khulii
kuchh uu.nghtii hu.ii ba.Dhtii hai.n shaah-raaho.n par
savaariyo.n ke ba.De ghu.ngruu.o.n kii jhankaare.n
kha.Daa hai os me.n chup-chaap har si.ngaar kaa pe.D
dulhan ho jaise hayaa kii sugandh se bojhal
ye mauj-e-nuur ye bharpuur ye khilii hu.ii raat
ki jaise khiltaa chalaa jaa.e ik safed ka.nval
sipaah-e-ruus hai ab kitnii duur berlin se
jagaa rahaa hai ko.ii aadhii raat kaa jaaduu
chhalak rahii hai KHum-e-Gaib se sharaab-e-vajuud
fazaa-e-niim-shabii nargis-e-KHumaar-aaluud
ka.nval kii chuTkiyo.n me.n band hai nadii kaa suhaag
3
ye ras kaa sej ye sukumaar ye sukomal gaat
nayan kamal kii jhapak kaam-ruup kaa jaaduu
ye rasmasaa.ii palak kii ghanii ghanii parchhaa.ii.n
falak pe bikhre hu.e chaa.nd aur sitaaro.n kii
chamaktii u.ngliyo.n se chhi.D ke saaz fitrat ke
taraane jaagne vaale hai.n tum bhii jaag uTho
4
shu.aa-e-mahr ne yuu.n un ko chuum chuum liyaa
nadii ke biich kumudnii ke phuul khil uTThe
na muflisii ho to kitnii hasiin hai duniyaa
ye jhaa.e.n jhaa.e.n sii rah rah ke ek jhii.ngur kii
hinaa kii Tattiyo.n me.n narm sarsaraahaT sii
fazaa ke siine me.n KHaamosh sansanaahaT sii
ye kaa.enaat ab ik nii.nd le chukii hogii
5
ye mahv-e-KHvaab hai.n ra.ngiin machhliyaa.n tah-e-aab
ki hauz-e-sehn me.n ab in kii chashmake.n bhii nahii.n
ye sar-niguu.n hai.n sar-e-shaaKH phuul gu.Dhal ke
ki jaise be-bujhe a.ngaare ThanDe pa.D jaa.e.n
ye chaa.ndnii hai ki umDaa hu.aa hai ras-saagar
ik aadmii hai ki itnaa dukhii hai duniyaa me.n
6
qariib chaa.nd ke ma.nDlaa rahii hai ik chi.Diyaa
bha.nvar me.n nuur ke karvaT se jaise naav chale
ki jaise siina-e-shaa.ir me.n ko.ii KHvaab pale
vo KHvaab saa.nche me.n jis ke na.ii hayaat Dhale
vo KHvaab jis se puraanaa nizaam-e-Gam badle
kahaa.n se aatii hai madmaaltii lataa kii lipaT
ki jaise saik.Do.n pariyaa.n gulaabiyaa.n chhi.Dkaa.e.n
ki jaise saik.Do.n ban-deviyo.n ne jhuule par
adaa-e-KHaas se ik saath baal khol diye
lage hai.n kaan sitaaro.n ke jis kii aahaT par
is inqalaab kii ko.ii KHabar nahii.n aatii
dil-e-nujuum dha.Dakte hai.n kaan bajte hai.n
7
ye saa.ns letii hu.ii kaa.enaat ye shab-e-maah
ye pur-sukuu.n ye pur-asraar ye udaas samaa.n
ye narm narm havaa.o.n ke niil-guu.n jho.nke
fazaa kii oT me.n mardo.n kii gungunaahaT hai
ye raat maut kii be-ra.ng muskuraahaT hai
dhu.aa.n dhu.aa.n se manaazir tamaam nam-diida
KHunuk dhundalke kii aa.nkhe.n bhii niim KHvaabiida
sitaare hai.n ki jahaa.n par hai aa.nsu.o.n kaa kafan
hayaat parda-e-shab me.n badaltii hai pahluu
kuchh aur jaag uThaa aadhii raat kaa jaaduu
zamaana kitnaa la.Daa.ii ko rah gayaa hogaa
mire KHayaal me.n ab ek baj rahaa hogaa
8
gulo.n ne chaadar-e-shabnam me.n mu.nh lapeT liyaa
labo.n pe so ga.ii kaliyo.n kii muskuraahaT bhii
zaraa bhii sumbul-e-turkii laTe.n nahii.n hiltii.n
sukuut-e-niim-shabii kii hade.n nahii.n miltii.n
ab inqalaab me.n shaayad ziyaada der nahii.n
guzar rahe hai.n ka.ii kaarvaa.n dhundalke me.n
sukuut-e-niim-shabii hai unhii.n ke paa.nv kii chaap
kuchh aur jaag uThaa aadhii raat kaa jaaduu
9
na.ii zamiin nayaa aasmaa.n na.ii duniyaa
na.e sitaare na.ii gardishe.n na.e din raat
zamii.n se taa-ba-falak intizaar kaa aalam
fazaa-e-zard me.n dhu.ndle Gubaar kaa aalam
hayaat maut-numaa intishaar kaa aalam
hai mauj-e-duud ki dhundlii fazaa kii nabze.n hai.n
tamaam KHastagii-o-maa.ndgii ye daur-e-hayaat
thake thake se ye taare thakii thakii sii ye raat
ye sard sard ye be-jaan phiikii phiikii chamak
nizaam-e-saaniya kii maut kaa pasiinaa hai
KHud apne aap me.n ye kaa.enaat Duub ga.ii
KHud apnii kokh se phir jagmagaa ke ubhregii
badal ke kechulii jis tarah naag lahraa.e
10
KHunuk fazaa.o.n me.n raqsaa.n hai.n chaa.nd kii kirne.n
ki aabgiino.n pe pa.Dtii hai narm narm phuvaar
ye mauj-e-Gaflat-e-ma.asuum ye KHumaar-e-badan
ye saa.ns nii.nd me.n Duubii ye aa.nkh madmaatii
ab aa.o mere kaleje se lag ke so jaa.o
ye palke.n band karo aur mujh me.n kho jaa.o

Firaq Gorakhpuri
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

marsiye

1
duur jaa kar qariib ho jitne
ham se kab tum qariib the itne
ab na aa.oge tum na jaa.oge
vasl-e-hijraa.n baham hu.e kitne
2
chaa.nd nikle kisii jaanib tirii zebaa.ii kaa
ra.ng badle kisii suurat shab-e-tanhaa.ii kaa
daulat-e-lab se phir ai KHusrav-e-shiirii.n-dahanaa.n
aaj arzaa.n ho ko.ii harf shanaasaa.ii kaa
garmi-e-rashk se har anjuman-e-gul-badanaa.n
tazkira chhe.De tirii pairahan-aaraa.ii kaa
sehn-e-gulshan me.n kabhii ai shah-e-shamshaad-qadaa.n
phir nazar aa.e saliiqa tirii ra.anaa.ii kaa
ek baar aur masiihaa-e-dil-e-dil-zadagaa.n
ko.ii va.ada ko.ii iqraar masiihaa.ii kaa
saaz-o-saamaan baham pahu.nchaa hai rusvaa.ii kaa
3
kab tak dil kii KHair manaa.e.n kab tak rah dikhlaa.oge
kab tak chain kii mohlat doge kab tak yaad na aa.oge
biitaa diid ummiid kaa mausam KHaak u.Dtii hai aa.nkho.n me.n
kab bhejoge dard kaa baadal kab barkhaa barsaa.oge
ahd-e-vafaa yaa tark-e-mohabbat jo chaaho so aap karo
apne bas kii baat hii kyaa hai ham se kyaa manvaa.oge
kis ne vasl kaa suuraj dekhaa kis par hijr kii raat Dhalii
gesu.o.n vaale kaun the kyaa the un ko kyaa jatlaa.oge
'faiz' dilo.n ke bhaag me.n hai ghar bharnaa bhii luT jaanaa bhii
tum is husn ke lutf-o-karam par kitne din itraa.oge

Faiz Ahmad Faiz
Nazm

jahan dariya utarta hai

1
sarishk-e-KHuu.n ruKH-e-mazmuun pe chaltaa hai to ik rasta
nikaltaa hai
nadii dariyaa pe tham jaa.e
lahuu nuqte pe jam jaa.e to unvaan-e-safar Thahre
usii raste pe sarkash raushnii taaro.n me.n Dhaltii hai
usii nuqte kii suulii par payambar baat karte hai.n
mujhe chalnaa nahii.n aataa
shab-e-saakin kii KHaana-zaad tasviiro gavaahii do
fasiil-e-sub.h-e-mumkin par mujhe chalnaa nahii.n aataa
mire chashmo.n me.n shor-e-aab yakjaa bar-shakaalii hai
nadii maqruuz baadal kii
miraa dariyaa savaalii hai
rag-e-harf-e-zubuu.n me.n jo charaaG-e-KHuu.n safar me.n hai
abhii us nuqta-e-aaKHir ke ziine tak nahii.n aataa
jahaa.n jallaad kaa ghar hai
jahaa.n diivaar-e-sub.h-e-zaat ke raKHne se nigah-e-KHashmagii.n
baaruud kii chashmak Daraatii hai
jahaa.n suulii ke mimbar par payambar baat karte hai.n
2
ab in baato.n ke sikke jeb ke andar khanakte hai.n ki jin par
qasr-e-shaahii ke manaazir
aslaha-KHaano.n se jaarii hukm kunda hai.n
bhare baazaar me.n tifl-e-tahii-kiisa pareshaa.n hai ki us ke paa.nv
Taksaalo.n ke raste se abhii naa-aashnaa hai.n
aur us kaa baap guu.ngaa hai
nadii ruk ruk ke chaltii hai
takallum rehn rakhne se safar aasaa.n nahii.n hotaa
hu.aa paspaa jahaa.n paanii
jahaa.n maujo.n ne zanjiir-e-vafaa pahnii sipar girdaab kii rakh dii
alam rakhe qalam rakhe
KHafaa baadal ne jin paayaab dariyaa.o.n se mu.nh mo.Daa
jahaa.n taaraaj hai khetii
jahaa.n qarya uja.Dtaa hai
tanaab-e-raah kaTtii hai kahii.n KHema ukha.Dtaa hai
vahaa.n se duur hai nadii
vahaa.n se duur hai bachcha ki us ke paa.nv
dariyaa.o.n ke raste se abhii naa-aashnaa hai.n
aur us kaa baap guu.ngaa hai
use chalnaa nahii.n aataa
fasiil-e-sub.h-e-mumkin par use chalnaa nahii.n aataa
3
sahar ke paas hai.n mansuuKH sharte.n sulh-naame kii
sabaa dars-e-ziyaa.n-aamoz kii tafsiil rakhtii hai
kisii tamsiil me.n tum ho
kisii ijmaal me.n mai.n huu.n
kahii.n qirtaas KHaalii kaa vo be-unvaan saahil hai
jahaa.n aashuftagaan-e-adl ne hathiyaar Daale hai.n
bahut zaate.n hai.n sadmo.n kii
ka.ii hisse hai.n siine me.n nafas gum-karda lamhe ke
ka.ii tabqaat hai.n din ke
kahii.n sub.h-e-mukaafaat-e-suKHan ke mantaqe me.n tum muqayyad ho
kisii pichhle pahar ke sulh-naame kii adaalat me.n
ka.Dii sharto.n par apne dastaKHat ke ruu-ba-ruu mai.n huu.n
suno qirtaas-e-KHaalii ke sipar-andaaz saahil se
havaa kyaa baat kahtii hai
idhar us duusre saahil se jo mallaah aayaa hai
zamiine.n bechtii bastii se kyaa paiGaam laayaa hai
ko.ii ta.aziir kii dhamkii
ko.ii va.ada rihaa.ii kaa
ko.ii aa.nsuu
ko.ii chhuTTii

Akhtar Husain Jafri
Nazm

suraj ubal paDenge

kiran ko tum kis tarah a.ndhero.n kii chaadaro.n me.n lapeT doge
kiran to phuuTegii
aur a.ndhere kii chaadare.n taar-taar ho.ngii
lahuu bahegaa
to raat Dhal jaa.egii
kisii kii jabii.n se suuraj ubal pa.De.nge
(2)
nidaa ye aa.ii
ki kaj-kulaaho.n ke taaj chhiino
ye taKHt taaraaj kar ke chho.Do
in uu.nche mahlo.n ko KHaak kar do
ye masnade.n sab ukhaa.D phe.nko
ye gurz-e-aahan
jo tum pe paiham baras rahaa hai
uTho
ba.Dho
ba.Dh ke gurz-e-aahan ko apne haath me.n thaam lo
ye asaa-e-muusaa banegaa
zulm-o-sitam ke phaniyar sapoliyo.n ko nigal hii legaa
udaas chehre KHushii se yuu.n tamtamaa.e
jaise bahaar ke KHvaab jaag uTThe
chahaar-suu ek shor-e-labbaik uTh rahaa thaa
jo kal talak ek be-baso.n kaa hujuum thaa
aaj jo jarraar lashkar-e-pur-shikoh ban kar ba.Dhaa
to sab taajvar sabhii kaj-kulaah sab shahryaar
barg-e-KHizaa.n kii maanind KHaak me.n mil ga.e
faqat ik galiim-posho.n kaa KHuun thaa
jo sadaa.e.n detaa rahaa
bahaaro.n ke qaafilo.n ko
vo masnade.n taKHt-o-taaj uu.nche mahal to qaa.em rahe
na.e kaj-kulaah aa.e
galiim-posho.n kaa lashkar-e-pur-shikoh phir ik hujuum ban kar bikhar gayaa
KHvaab TuuT kar phir KHizaa.n ke patto.n kii tarah
miTTii me.n mil ga.e
phir vo gurz-e-aahan thaa
taKHt-o-taaj-e-shahii kaa zaamin
(3)
asaa-e-muusaa ko kaun rokegaa
zulm-o-Gaarat-garii ke phaniyar sapoliye
kab tak Dase.nge
kabhii to haatho.n se nuur phuuTegaa
aur zulmat-kado.n me.n suuraj ubal pa.De.nge

Ejaz Farooqi
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now