Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "srukh-sailaab"

Nazm MATCHES FOR "srukh-sailaab"

Nazm

remote

aisaa ek remote banaa.e.n
jis se ghar ghar sukh phailaa.e.n
hai.n ye sundar KHvaab hamaare
laa.e.n zamii.n pe chaa.nd sitaare
nal se nikle duudh kii dhaaraa
rangii.n titlii rath ho hamaaraa
khele.n chaachaa gullii Da.nDaa
bha.ngDaa naache.n daadii daadaa
khaa.e.n machhlii aam kaa halva
jar me.n ho duniyaa kaa jalva
me.nDak gaay megh malhaar
jhe.ngur bolaa le ke giTaar
khulii fazaa aakaash ke niiche
kyaa hai fitrat raaz ye samjhe
jab chaahe.n ham baarish barse
ro.e.n na sailaab ke Dar se
science ke is daur me.n bachcho
jag ke niraale taur me.n bachcho
kaam le.n aisaa ham atom se
paa.e rihaa.ii duniyaa Gam se

Bismillah Adeem
Nazm

dukh ka zaiqa

mere logo
dukh se samjhauta na karnaa varna dukh bhii ka.DvaahaTo.n kii tarah
tumhaare zaa.iqe kaa hissa ban jaa.egaa
tum dukh ke baare me.n Gaur karnaa
us kii maahiyat jaan.naa us kii tum drawing karnaa
aur sar jo.D kar us tasviir se baate.n karnaa
galii ke baahar maidaano.n me.n kheto.n me.n ghar kii chhato.n ke uupar
har taraf baate.n karnaa dukh kii aane vaale sukh kii
mere logo
dukh ko jab pahchaanoge to us kaa qarz utaaroge
ik ik paisa jam.a karnaa sukh kii KHaatir
hathiyaar banaanaa zehno.n me.n tasviiro.n me.n tahriiro.n me.n
phir dukh ke aage DaT jaanaa
aur aisii diivaar ban.naa jis kii tayyaarii me.n kaafii din lage ho.n
kaafii log lage ho.n
saarii KHuubiyaa.n us diivaar me.n ho.n sab sailaabo.n ke aage DaT jaane kii
mere achchhe logo
kyaa tum ne sochaa hai ki diivaare.n bhii na.ngii ho jaatii hai.n kuchh ii.nTo.n ke gir jaane se
tum soch samajh ke apne sangii saathii banaanaa
ii.nTo.n ko girne na denaa
dhiimii aa.nch me.n dhiime dhiime baate.n karnaa sukh kii sukh kii
tum me.n jo sab se achchhii baate.n karegaa
vahii tumhaaraa saathii hogaa vahii tumhaaraa suuraj hogaa
mere logo
dukh ke dino.n me.n suuraj ke raste par chalnaa
us ke Duubne ubharne ke manzar par Gaur karnaa
mere logo jhiil kii maanind chup na rahnaa
baate.n karnaa chalte rahnaa dariyaa kii ravaanii ban.naa
mere logo
dukh se kabhii samjhauta mat karnaa ha.nste rahnaa
dukh ke gho.De kii lagaamo.n ko paka.D kar havaa se baate.n karnaa
uu.nchaa u.Dnaa

Shaista Habeeb
Nazm

ain-ul-yaqin

mai.n ne dukh nahii.n dekhaa
mai.n ne kuchh nahii.n dekhaa
mai.n ne sukh nahii.n dekhaa
mai.n ne kuchh nahii.n dekhaa
duniyaa merii hathelii se baahar kyaa rahii hogii mai.n ne dekhaa
zamiin par shaayad sailaab aayaa thaa
mai.n ne dekhaa ki dhuup chau.nkii
aur bhaag kar daraKHto.n kii choTiyo.n par cha.Dh ga.ii us kaa rang faq thaa
aur us kii umr terah baras se ziyaada na thii
sailaab ne us ke paa.nv chhuu liye use phir bhii yaqiin nahii.n aayaa
jaise kah rahii ho
jaa.o mujhe apne yaqiinii par kabhii yaqiin nahii.n aayaa
be-iimaan aadmii kii tarah
mai.n be-yaqiin huu.n
ye log kahaanii sunaate sunaate ruk jaate hai.n
aur KHaamoshii ko sunaate sunaate ruk jaate hai.n
jaise tiir-e-aarzuu havaa aur parinda chhide hu.e tirchhe zaaviye banaa kar
zan se guzar ga.e ho.n
aur jaise un sab ko ek nazar me.n sab ne dekh liyaa ho
jin samundaro.n par ye parinde gire.nge
vahaa.n bahut shor hogaa
aur log kahaaniyo.n ko amaanat kar ke dariyaa me.n bahaa dete ho.nge
ye log tambaakuu ke patto.n me.n apne dil lapeT kar bo dete ho.nge

Nasreen Anjum Sethi
Nazm

ek nazm

aa.nkhe.n andhe ku.e.n kii maanind duur a.ndhere rasto.n par paanii ko khurach rahe.n hai.n
gahrii dhu.nd kii chaadar o.Dhe kaun abhaagan
phuuT phuuT ke ro bhii na paa.ii
sabr kii roTii chup kaa saalan sab zaa.iqo.n se ka.Dvaa zahr gale ke andar
kund chhurii kii maanind aTke
kyaa bole saare lafz apne lahuu kii gardish se be-parvaah
lab par utre.n
mu.aafii ke chhilko.n ko utaaruu.ngii ruuhe.n kuchh na kahe.ngii
denaa sab kuchh is ko
vaapas kuchh bhii na lenaa
haath tumhaare sadaa hii bhar rahe.nge jazbo.n ke
phuulo.n se
mat kuchh kahnaa varna saaraa malba tumhaare uupar aan giregaa
kachchii diivaaro.n ke naate tasviiro.n ke ra.ngo.n se bhii kachche
haatho.n vaar zabaano.n par guzrii baato.n ke saare sukh ik ik kar ke miTte jaate hai.n
man kii saarii shaktii biich samundar Duub ga.ii hai
havaa me.n aa.nsuu gas ke gole chhuuTe.n to sab ronaa ek hii vaqt me.n role.n
tyaag kaa lambaa rasta baa nahii.n phailaa.e apnii or bulaataa hai
aage jaa.o sab kuchh suno
aa.o is aavaaz ke raste par chalte jaa.e.n
diivaar duur se duur

Shaista Habeeb
Nazm

ek nazm

aa.nkhe.n andhe ku.e.n kii maanind duur a.ndhere rasto.n par paanii ko khurach rahii hai.n
gahrii dhund kii chaadar o.Dhe kaun abhaagan
phuuT phuuT ke ro bhii na paa.ii
sabr kii roTii chup kaa saalan sab zaa.iqo.n se ka.Dvaa zahr gale ke andar
kund chhurii kii maanind aTke
kyaa bole saare lafz apne lahuu kii gardish se be-parvaa
lab par utre.n
ma.aanii ke chhilko.n ko utaaruu.n na.ngii ruuhe.n kuchh na kahe.ngii
duniyaa sab kuchh us ko
vaapas kuchh bhii na lenaa haath tumhaare sadaa hii bhare rahe.nge jazbo.n ke phuulo.n se
mat kuchh kahnaa varna saaraa malba tumhaare uupar aan giregaa
kachchii diivaaro.n ke naate tasviiro.n ke ra.ngo.n se bhii kachche
haatho.n aur zabaano.n par guzrii baato.n ke saare sukh ik ik kar ke miTte jaate hai.n
man kii saarii shaktii biich samundar Duub ga.ii hai
havaa me.n aa.nsuu-gas ke gole chhuuTe.n to sab ronaa ek hii vaqt ro le.n
tyaag kaa lambaa rasta baa.nhe.n phailaa.e apnii or bulaataa hai
aage jaa.o sab kuchh suno
aa.o is aavaaz ke raste par chalte jaa.e.n
diivaar duur se duur

Shaista Habeeb
Nazm

farisa mahdubani se

madhuubanii
apnii maa.n ko nath pahnaa.o madhuubanii
ki suukh jaa.egaa duudh us kaa
aur na pahu.nch paa.egii vo kabhii
naKHlistaan ke pardo.n me.n chhupii us jhiil tak
jahaa.n vo sirf
apne bachcho.n ko sairaab kartii hai

Taimoor Shahid
Nazm

dariya-e-ganga

ga.ngaa dariyaa kii lahro.n kii ra.anaa.ii kaa kyaa kahnaa
kaisaa pyaaraa pyaaraa hai is kaa bal khaa khaa kar bahnaa
koh-e-himaala kii uu.nchii jhiilo.n se nikal kar aataa hai
vaadiyo.n aur nashebo.n me.n tezii se chal kar aataa hai
ta.Dtaa mu.Dtaa girtaa pa.Dtaa aage ba.Dhtaa rahtaa hai
pag pag par is kaa pal pal me.n paanii cha.Dhtaa rahtaa hai
jharnaa ban ban kar girne me.n manzar KHuub dikhaataa hai
pighlii hu.ii chaa.ndnii kii chaadar patthar par phailaataa hai
maidaano.n me.n aa kar dhiimii dhiimii chaal se chaltaa hai
lahraataa hai iThlaataa hai bal khaataa hai machaltaa hai
us kii pyaarii pyaarii lahre.n dekh ke dil lahraataa hai
vo bhii paanii ke dhaare ke saath hii bahtaa jaataa hai
is kii pyaarii shobhaa dekh ke sab nar naarii jiite hai.n
aa.nkho.n hii aa.nkho.n me.n is bahte amrit ko piite hai.n
chhoTe chhoTe aur bhii dariyaa is me.n milte jaate hai.n
jaise bachche humak humak kar maa.n kii god me.n aate hai.n
ye bhii apnii godii me.n in sab ko pyaar se letaa hai
chho.D ke vo is ko nahii.n jaate kuchh aisaa sukh detaa hai
is dariyaa se niklii hai.n aisii pyaarii pyaarii nahre.n
dil ko lubhaane vaalii hai.n jin kii baa.nkii baa.nkii lahre.n
kartii hai.n sairaab ye nahre.n bhaarat ke maidaano.n ko
taaqat ye de detii hai.n laakho.n kamzor kisaano.n ko
laakho.n hii biighe khetii hotii hai in se harii-bharii
ja.ngal sahraa khet chaman bante hai.n in se sabz-parii
in nahro.n kii harakat se zarKHez zamii.n ho jaatii hai
in nahro.n kii barakat se zar-rez zamii.n ho jaatii hai
nahre.n ye laakho.n hii insaano.n ke dil kaa sahaaraa hai.n
nahre.n ye sab un kii aashaa.o.n kaa bahtaa dhaaraa hai.n
bahte rahnaa is kaa nit ye baat bataataa rahtaa hai
jo paiham kuchh kartaa hai phal is kaa paataa rahtaa hai
bhaarat kii KHidmat se is ne itnii azmat paa.ii hai
KHidmat kar ke KHidmat kii KHuub is ne raah dikhaa.ii hai
ham bhii apnii koshish se sarsabz banaa.e.n bhaarat ko
paabandii kii zillat se aazaad karaa.e.n bhaarat ko
ga.ngaa dariyaa kyaa hai 'nayyar' ye allaah kii rahmat hai
ga.ngaa dariyaa kyaa hai hamaare des ke haq me.n ne.amat hai

Mohammad Shafiuddin Nayyar
Nazm

us aangan ka chand

1
shaam samay ik uu.nchii sii.Dhiyo.n vaale ghar ke aa.ngan me.n
chaa.nd ko utre dekhaa ham ne chaa.nd bhii kaisaa puuraa chaa.nd

Ibn۔e۔Insha
Nazm

mazafat

chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n
aa.nsu.o.n kii bastii me.n
rasne-basne vaalo.n ko
kab ko.ii Garaz is se
kaarobaar-e-hastii me.n
naf' kyaa KHasaaraa kyaa
'umr ke KHazaane me.n
besh-o-kam kaa yaaraa kyaa
un kaa apnaa maslak hai
un kii apnii duniyaa hai
un gharo.n kii chaukhaT par
vaqt baa.ng detaa hai
mu.nh a.ndhere chakkii me.n
KHvaab piise jaate hai.n
chaa.nd sii raso.ii me.n
bartano.n ke aa.iine
dukh ko mu.nh chi.Dhaate hai.n
un gharo.n ke aangan me.n
din shuruu' hotaa hai
KHvaab kaate jaane se
zindagii kii Dorii me.n
sukh piro.e jaane se
aa.nkh ke kaToro.n me.n
Gam samo.e jaane se
mehrbaa.n mashaqqat ke
bojh Dho.e jaane se
din tuluu' hotaa hai
kyaariyo.n kii miTTii me.n
giit jab nahaate hai.n
rang chahchahaate hai.n
saath kii mu.nDero.n par
KHvaab par sukhaate hai.n
bachchiyaa.n KHayaalo.n me.n
apne ghar basaatii hai.n
mom ke gharo.ndo.n me.n
zindagii kii ha.nD-kuliyaa
dhuup se pakaatii hai.n
be-zabaan gu.Diyo.n se
jin kii aa.nkh dhaage kii
jin ke ho.nT resham ke
apne dil kii sab baate.n
baarhaa bataatii hai.n
aur rumuuz jiine ke
aap siikh jaatii hai.n
un gharo.n ke aa.ngan me.n
dopahar utartii hai
ek nannhii suu.ii kii
aa.nkh ke jharoke se
ik kiran ke mokhe se
dhuup ke hinaa.ii haath
tashtarii ba.Dhaate hai.n
chaahato.n ke miiThe rang
zaa.iqo.n ke naadiida
lams chho.D jaate hai.n
chuu.Diyaa.n khanaktii hai.n
haath baat karte hai.n
ang ang ha.nstaa hai
por por ke andar
dil dha.Dakne lagtaa hai
por por rotii hai
o.Dhnii bhigotii hai
KHvaab vo pa.Dosii hai
jis ke ujle kurte kaa
roz ik button TuuTe
dil ki vo mohalla hai
jis ke basne vaalo.n se
roz ik KHushii ruuThe
jaane kitne jismo.n ko
be-riyaa mohabbat kii
aag chaaT jaatii hai
jaane kitne nau-mauluud
KHvaab dafn hote hai.n
dil ke sard-KHaane me.n
jaane kitne rishto.n ko
dafn kar ke chupke se
vaqt ke gunaaho.n par
KHaak Daalii jaatii hai
un udaas galiyo.n me.n
sardiyo.n kii raato.n me.n
duur paar se aate
dil-navaaz giito.n ke
saa.nvle salone bol
chaa.nd ko rulaate hai.n
chaa.nd bholaa-bhaalaa hai
chaa.nd ko ye kyaa maa'luum
zindagii kii nauTankii
yuu.nhii chaltii rahtii hai
muflisii kii raqqaasa
taal par zamaane kii
jaane kitnii sadiyo.n se
ek jaise bolo.n par
raqs kartii rahtii hai
sub.h se zaraa pahle
bebasii ke bistar par
vo jo aa ke Dhahtii hai
bistaro.n ke sab paivand
us ko gudgudaate hai.n
be-sabab ha.nsaate hai.n
be-sabab rulaate hai.n
un galii mohallo.n me.n
raat jab utartii hai
maa.e.n apne bachcho.n ko
loriyaa.n sunaatii hai.n
apnii sard baa.nho.n kaa
paalnaa hilaatii hai.n
KHvaab vo dikhaatii hai.n
afsarii ke shaahii ke
KHvaab kaj-kulaahii ke
chaa.nd aur gulaab un ke
madrase jo jaate hai.n
qamchiyo.n se hotaa hai
bachpane kaa istiqbaal
phuul jaise jismo.n par
bed jab barastii hai
duur tak chaTaa.ii par
ik qataar me.n baiThe
lafz thartharaate hai.n
sab varaq kitaabo.n ke
aise pha.D.pha.Daate hai.n
jaise jaan khi.nchtii ho
un kii dars-gaaho.n me.n
qamchiyaa.n mu'allim hai.n
qamchiyaa.n mudarris hai.n
qamchiyaa.n raTaatii hai.n
sabr achchhii 'aadat hai
sabr aur qanaa'at se
zindagii sa.nvartii hai
un galii mohallo.n kaa
husn kam-suKHan bhii hai
aur bholaa-bhaalaa bhii
haa.n ye kam-suKHan la.Dkaa
bhiigtii maso.n ke saath
ghar se jab nikaltaa hai
'umr kii hade.n saarii
yuu.n phalaa.ng jaataa hai
muflisii havas-pesha
phuul jaise gaalo.n kaa
rang chuus letii hai
bholii-bhaalii baato.n se
ras nicho.D letii hai
aur phir zamaane ke
biich chho.D detii hai
peT be-hayaa dallaal
dar-ba-dar phiraataa hai
sau jatan sikhaataa hai
chhoTe chhoTe qasbo.n me.n
ghar ke saamne baiThii
siidhii-saadii ummiide.n
raah taktii rahtii hai.n
'umre.n biit jaatii hai
kuchh KHabar nahii.n miltii
Daakiyaa jab aataa hai
chaahato.n kii puu.njii me.n
ik raqam ba.Dhaataa hai
aur lauT jaataa hai
siidhii-saadii ummiide.n
ghar se jaane vaalo.n ko
ek jaise lafzo.n kii
bhejtii hai.n sauGaate.n
vaqt buu.Dhaa munshii hai
jis ko KHat kaa sab mazmuun
lafz lafz azbar hai
phir bhii puuchh letaa hai
aur kyaa likhuu.n bolo
phir se ab ke saavan me.n
saa.ibaa.n Tapaktaa hai
tan kii aur ik diivaar
Dhah ga.ii hai ab ke baar
siidhii-saadii ummiide.n
roz-o-shab kii chaukhaT par
'umr kaaT detii hai.n
jism KHaak ho jaa.e
jaan raakh ho jaa.e
peT to jahannum hai
ye javaan rahtaa hai
un kii aa.nkh kaa saavan
chaahe ko.ii mausam ho
mehrbaan rahtaa hai
chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n

Ishrat Afreen
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now