dil meñ apne aarzū sab kuchh hai aur phir kuchh nahīñ

do jahāñ kī justujū sab kuchh hai aur phir kuchh nahīñ

dil mein apne aarzu sab kuchh hai aur phir kuchh nahin

do jahan ki justuju sab kuchh hai aur phir kuchh nahin

guzishta saal jo dekhā vo ab kī saal nahīñ

zamāna ek sā bas har baras nahīñ chaltā

guzishta sal jo dekha wo ab ki sal nahin

zamana ek sa bas har baras nahin chalta

ik nazar ne kiyā hai kaam tamām

aarzū bhī to thī yahī dil kī

ek nazar ne kiya hai kaam tamam

aarzu bhi to thi yahi dil ki

dete na dil jo tum ko to kyuuñ bantī jaan par

kuchh aap kī ḳhatā na thī apnā qusūr thā

dete na dil jo tum ko to kyun banti jaan par

kuchh aap ki KHata na thi apna qusur tha

isī ḳhayāl meñ din-rāt maiñ taḌaptā huuñ

tumhīñ qarār bhī doge jo be-qarār kiyā

isi KHayal mein din-raat main taDapta hun

tumhin qarar bhi doge jo be-qarar kiya

zarre kī tarah ḳhaak meñ pāmāl ho ga.e

vo jin kā āsmāñ pe sar-e-pur-ġhurūr thā

zarre ki tarah KHak mein pamal ho gae

wo jin ka aasman pe sar-e-pur-ghurur tha

tumhāre ishq meñ kyā kyā na iḳhtiyār kiyā

kabhī falak kā kabhī ġhair kā vaqār kiyā

tumhaare ishq mein kya kya na iKHtiyar kiya

kabhi falak ka kabhi ghair ka waqar kiya

jahāñ meñ zar kā hai kārḳhāna na koī apnā na hai yagāna

talāsh-e-daulat meñ hai zamāna ḳhudā hī hāfiz hai muflisī kā

jahan mein zar ka hai karKHana na koi apna na hai yagana

talash-e-daulat mein hai zamana KHuda hi hafiz hai muflisi ka

us māh-rū pe aañkh kisī kī na paḌ sakī

jalva thā tuur kā ki sarāsar vo nuur thā

us mah-ru pe aankh kisi ki na paD saki

jalwa tha tur ka ki sarasar wo nur tha

duur ham se haiñ vo to kyā Dar hai

paas hai apne aarsī dil kī

dur hum se hain wo to kya Dar hai

pas hai apne aarsi dil ki

hai talāsh-e-do-jahāñ lekin ḳhabar apnī kise

jīte-jī tak justujū sab kuchh hai aur phir kuchh nahīñ

hai talash-e-do-jahan lekin KHabar apni kise

jite-ji tak justuju sab kuchh hai aur phir kuchh nahin

adam se hastī meñ jab ham aa.e na koī hamdard saath laa.e

jo apne the vo hue parā.e ab aasrā hai to bekasī kā

adam se hasti mein jab hum aae na koi hamdard sath lae

jo apne the wo hue parae ab aasra hai to bekasi ka

jaan par apnī haa.e kyuuñ bantī

baat jo mānte kabhī dil kī

jaan par apni hae kyun banti

baat jo mante kabhi dil ki

jab javānī ga.ī chhuḌā kar haath

us pe piirī na kuchh chalī dil kī

jab jawani gai chhuDa kar hath

us pe piri na kuchh chali dil ki

shauq ne kī jo rahbarī dil kī

manzil-e-ishq tai huī dil kī

shauq ne ki jo rahbari dil ki

manzil-e-ishq tai hui dil ki

havā ke ghoḌe pe rahtā hai vo savār mudām

kisī kā us ke barābar faras nahīñ chaltā

hawa ke ghoDe pe rahta hai wo sawar mudam

kisi ka us ke barabar faras nahin chalta

ruke hai āmad-o-shud meñ nafas nahīñ chaltā

yahī hai hukm-e-ilāhī to bas nahīñ chaltā

ruke hai aamad-o-shud mein nafas nahin chalta

yahi hai hukm-e-ilahi to bas nahin chalta

ik ḳhayāl-o-ḳhvāb hai a 'shor' ye bazm-e-jahāñ

yaar aur jām-o-subū sab kuchh hai aur phir kuchh nahīñ

ek KHayal-o-KHwab hai a 'shor' ye bazm-e-jahan

yar aur jam-o-subu sab kuchh hai aur phir kuchh nahin

paik-e-ḳhayāl bhī hai ajab kyā jahāñ-numā

aayā nazar vo paas jo apne se duur thā

paik-e-KHayal bhi hai ajab kya jahan-numa

aaya nazar wo pas jo apne se dur tha

nahīñ hai TuuTe kī buuTī jahān meñ paidā

shikasta jab huā tār-e-nafas nahīñ chaltā

nahin hai TuTe ki buTi jahan mein paida

shikasta jab hua tar-e-nafas nahin chalta