pūchh kar kaun dil dukhātā hai

hādse kab batā ke hote haiñ

puchh kar kaun dil dukhata hai

hadse kab bata ke hote hain

us se hī to chalte haiñ kārobār gulshan ke

vo hī rāt-rānī hai vo hī gul-hazāra hai

us se hi to chalte hain karobar gulshan ke

wo hi raat-rani hai wo hi gul-hazara hai

koī aayā nahīñ manāne hameñ

ham ne nārāz ho ke dekh liyā

koi aaya nahin manane hamein

hum ne naraaz ho ke dekh liya

kuchh to kahiye hamāre baare meñ

kaun haiñ ham hameñ pata to chale

kuchh to kahiye hamare bare mein

kaun hain hum hamein pata to chale

ḳhāmoshī meñ rahne vaale logoñ ko

sannāTe kī guuñj sunā.ī detī hai

KHamoshi mein rahne wale logon ko

sannaTe ki gunj sunai deti hai

mere ash'ār churāne vaalo

kyā mirā dard churā sakte ho

mere ash'ar churane walo

kya mera dard chura sakte ho

kahāñ par kho ga.ī ab DhūñDhtā huuñ

bharosa naam kī chābī milī thī

kahan par kho gai ab DhunDhta hun

bharosa nam ki chabi mili thi

is se pahle ke chhīn lete log

ham ne ḳhushiyāñ hī daan meñ de diiñ

is se pahle ke chhin lete log

hum ne KHushiyan hi dan mein de din

mujh ko tanhā.iyoñ ne maarā hai

bhiiḌ dekho mire janāze kī

mujh ko tanhaiyon ne mara hai

bhiD dekho mere janaze ki

aap ko devtā samajhtā thā

aap to ḳhuub devtā nikle

aap ko dewta samajhta tha

aap to KHub dewta nikle

yahī kal zaḳhm meñ tabdīl hoñge

bharam jo 'ishq ke paale ga.e haiñ

yahi kal zaKHm mein tabdil honge

bharam jo 'ishq ke pale gae hain

ham ne paanī kahā thā aur un ne

pyaas de dī hai pyaas ke badle

hum ne pani kaha tha aur un ne

pyas de di hai pyas ke badle

kaun bhalā apnī marzī se bichhḌā thā

donoñ kī apnī apnī majbūrī thī

kaun bhala apni marzi se bichhDa tha

donon ki apni apni majburi thi

adhūre rah ga.e ham is liye bhī

koī ham ko mukammal chāhiye thā

adhure rah gae hum is liye bhi

koi hum ko mukammal chahiye tha

tumhārī yaad kī banjar zamīñ par

suḳhan ke phuul bo.e jā rahe haiñ

tumhaari yaad ki banjar zamin par

suKHan ke phul boe ja rahe hain

pahle zaḳhmoñ se ham navāze ga.e

phir dilāsa diyā gayā ham ko

pahle zaKHmon se hum nawaze gae

phir dilasa diya gaya hum ko

un ke naḳhre haiñ qāfiye jaise

un kā ġhussa radīf jaisā hai

un ke naKHre hain qafiye jaise

un ka ghussa radif jaisa hai

rabt TuuTā to yuuñ lagā jaise

pankh noche ga.e hoñ bulbul ke

rabt TuTa to yun laga jaise

pankh noche gae hon bulbul ke

aap apnī hī maiñ qismat se chhalā jaatā huuñ

kyā sazā mujh ko milī hai ye bhale hone kī

aap apni hi main qismat se chhala jata hun

kya saza mujh ko mili hai ye bhale hone ki

yuuñ samajhiye ġhazal mukammal hai

jab mohabbat baġhal meñ baiThī ho

yun samajhiye ghazal mukammal hai

jab mohabbat baghal mein baiThi ho

jauharī kyoñ nahīñ parakh paayā

golkunDā kī khaan the ham to

jauhari kyon nahin parakh paya

golkunDa ki khan the hum to