sukūn de na sakīñ rāhateñ zamāne kī

jo niiñd aa.ī tire ġham kī chhāñv meñ aa.ī

sukun de na sakin rahaten zamane ki

jo nind aai tere gham ki chhanw mein aai

ajiib shai hai tasavvur kī kār-farmā.ī

hazār mahfil-e-rañgīñ sharīk-e-tanhā.ī

ajib shai hai tasawwur ki kar-farmai

hazar mahfil-e-rangin sharik-e-tanhai

nafas nafas pe yahāñ rahmatoñ kī bārish hai

hai bad-nasīb jise zindagī na raas aa.ī

nafas nafas pe yahan rahmaton ki barish hai

hai bad-nasib jise zindagi na ras aai

malāmatoñ se junūñ meñ na kuchh kamī aa.ī

jarāhatoñ se baḌhī zaḳhm-e-dil kī ra.anā.ī

malamaton se junun mein na kuchh kami aai

jarahaton se baDhi zaKHm-e-dil ki ranai

ḳhushī visāl kī ab hai na rañj-e-tanhā.ī

ye kis maqām pe mujh ko hayāt le aa.ī

KHushi visal ki ab hai na ranj-e-tanhai

ye kis maqam pe mujh ko hayat le aai

phailā fazā meñ naġhma-e-zanjīr-e-marhabā

zindāñ meñ ghuT ke rah na sakī zindagī kī baat

phaila faza mein naghma-e-zanjir-e-marhaba

zindan mein ghuT ke rah na saki zindagi ki baat

tārīḳh-e-kā.enāt-e-ibādat junūñ se hai

unvān-e-aql-o-hosh hai dīvāngī kī baat

tariKH-e-kaenat-e-ibaadat junun se hai

unwan-e-aql-o-hosh hai diwangi ki baat