bahut se ġham chhupe hoñge hañsī meñ

zarā in hañsne vāloñ ko TaTolo

bahut se gham chhupe honge hansi mein

zara in hansne walon ko TaTolo

hamārī zindagī kahne kī had tak zindagī hai bas

ye shīrāza bhī dekhā jaa.e to barham hai barsoñ se

hamari zindagi kahne ki had tak zindagi hai bas

ye shiraaza bhi dekha jae to barham hai barson se

ġharīb ko havas-e-zindagī nahīñ hotī

bas itnā hai ki vo izzat se marnā chāhtā hai

gharib ko hawas-e-zindagi nahin hoti

bas itna hai ki wo izzat se marna chahta hai

salīqa bolne kā ho to bolo

nahīñ to chup bhalī hai lab na kholo

saliqa bolne ka ho to bolo

nahin to chup bhali hai lab na kholo

har ġham sahnā aur ḳhush rahnā

mushkil hai āsān nahīñ hai

har gham sahna aur KHush rahna

mushkil hai aasan nahin hai

kahāñ milegī bhalā is sitamgarī kī misāl

taras bhī khātā hai mujh par tabāh kar ke mujhe

kahan milegi bhala is sitamgari ki misal

taras bhi khata hai mujh par tabah kar ke mujhe

ab ke 'vaqār' aise bichhḌe haiñ

milne kā imkān nahīñ hai

ab ke 'waqar' aise bichhDe hain

milne ka imkan nahin hai

in āñsuoñ se bhalā merā kyā bhalā hogā

vo mere ba.ad jo royā bhī yaad kar ke mujhe

in aansuon se bhala mera kya bhala hoga

wo mere baad jo roya bhi yaad kar ke mujhe

dil meñ jo mar jaa.e vo hai armāñ

jo nikle armān nahīñ hai

dil mein jo mar jae wo hai arman

jo nikle arman nahin hai

ḳhushī dāman-kashāñ hai dil asīr-e-ġham hai barsoñ se

hamārī zindagī kā ek hī aalam hai barsoñ se

KHushi daman-kashan hai dil asir-e-gham hai barson se

hamari zindagi ka ek hi aalam hai barson se

maiñ zindagī ko liye phir rahā huuñ kab se 'vaqār'

ye bojh ab mire sar se utarnā chāhtā hai

main zindagi ko liye phir raha hun kab se 'waqar'

ye bojh ab mere sar se utarna chahta hai

vaqār' ai kaash merī umr meñ shāmil na kī jaa.e

vo muddat haañ vahī muddat jo guzrī un kī furqat meñ

waqar' ai kash meri umr mein shamil na ki jae

wo muddat han wahi muddat jo guzri un ki furqat mein