جیوں گا میں تری سانسوں میں جب تک

خود اپنی سانس میں زندہ رہوں گا

میسر سے زیادہ چاہتا ہے

سمندر جیسے دریا چاہتا ہے

اندھا سفر ہے زیست کسے چھوڑ دے کہاں

الجھا ہوا سا خواب ہے تعبیر کیا کریں

کچھ تو عنایتیں ہیں مرے کارساز کی

اور کچھ مرے مزاج نے تنہا کیا مجھے

عشق اک ایسی حویلی ہے کہ جس سے باہر

کوئی دروازہ کھلے اور نہ دریچہ نکلے

ہزار کارواں یوں تو ہیں میرے ساتھ مگر

جو میرے نام ہے وہ قافلہ کب آئے گا

یہ کون سی جگہ ہے یہ بستی ہے کون سی

کوئی بھی اس جہان میں تیرے سوا نہیں

بارہا تو نے خواب دکھلائے

بارہا ہم نے کر لیا ہے یقیں

جیسے پانی پہ نقش ہو کوئی

رونقیں سب عدم ثبات رہیں

ہوا بھی چاہئے اور روشنی بھی

ہر اک حجرہ دریچہ چاہتا ہے

رکھوں کہاں پہ پاؤں بڑھاؤں کدھر قدم

رخش خیال آج ہے بے اختیار پھر

یہ پوچھ آ کے کون نصیبوں جیا ہے دل

مت دیکھ یہ کہ کون ستارہ ہے بخت میں

بدن ملبوس میں شعلہ سا اک لرزاں قرین جاں

دل خاشاک بھی شعلہ ہوا جلتا رہا میں بھی

حیرت سے دیکھتا ہوا چہرہ کیا مجھے

صحرا کیا کبھی کبھی دریا کیا مجھے