بھلے ہی چھاؤں نہ دے آسرا تو دیتا ہے

یہ آرزو کا شجر ہے خزاں رسیدہ سہی

ہوا کے ہونٹ کھلیں ساعت کلام تو آئے

یہ ریت جیسا بدن آندھیوں کے کام تو آئے

تمہارے در سے اٹھائے گئے ملال نہیں

وہاں تو چھوڑ کے آئے ہیں ہم غبار اپنا

ہم اس کے جبر کا قصہ تمام چاہتے ہیں

اور اس کی تیغ ہمارا زوال چاہتی ہے

تمام عمر اسے چاہنا نہ تھا ممکن

کبھی کبھی تو وہ اس دل پہ بار بن کے رہا

پھر یہی رت ہو عین ممکن ہے

پر ترا انتظار ہو کہ نہ ہو

زندگانی میں سبھی رنگ تھے محرومی کے

تجھ کو دیکھا تو میں احساس زیاں سے نکلا

ہوا کرے گا ہر اک لفظ مشکبار اپنا

ابھی سکوں سے کیے جاؤ انتظار اپنا