خبر نہیں ہے مرے بادشاہ کو شاید

ہزار مرتبہ آزاد یہ غلام ہوا

گہوارۂ سفر میں کھلی ہے ہماری آنکھ

تعمیر اپنے گھر کی ہوئی سنگ میل سے

گھر اور بیاباں میں کوئی فرق نہیں ہے

لازم ہے مگر عشق کے آداب میں رہنا

دل بیتاب کے ہم راہ سفر میں رہنا

ہم نے دیکھا ہی نہیں چین سے گھر میں رہنا

آمادہ رکھیں چشم و دل سامان حیرانی کریں

کیا جانیے کس وقت وہ نظارہ فرمانی کریں

سکھ کی خاطر دکھ مت بیچ

جال کے پیچھے جال نہ ڈال

ہمیشہ دل ہوس انتقام پر رکھا

خود اپنا نام بھی دشمن کے نام پر رکھا

عجب سفر تھا عجب تر مسافرت میری

زمیں شروع ہوئی اور میں تمام ہوا

تری دنیا میں اے دل ہم بھی اک گوشے میں رہتے ہیں

ہمیں بھی کچھ امیدیں ہیں تری عالم پناہی سے

دنیا مرے پڑوس میں آباد ہے مگر

میری دعا سلام نہیں اس ذلیل سے

یہ کیا چیز تعمیر کرنے چلے ہو

بنائے محبت کو ویران کر کے

اس کی آنکھوں کے وصف کیا لکھوں

جیسے خوابوں کا بیکراں ٹھہراؤ

ایک آنسو سے کمی آ جائے گی

غالباً دریاؤں کے اقبال میں

یہ ایک لمحے کی دوری بہت ہے میرے لیے

تمام عمر ترا انتظار کرنے کو

دل سے باہر آج تک ہم نے قدم رکھا نہیں

دیکھنے میں ظاہرا لگتے ہیں سیلانی سے ہم

طلوع ساعت شب خوں ہے اور میرا دل

کسی ستارۂ بد کی نگاہ میں آیا

یہی دل جو اک بوند ہے بحر غم کی

ڈبو دے گا سب شہر طوفان کر کے

مشغول ہیں صفائی و توسیع دل میں ہم

تنگی نہ اس مکان میں ہو میہمان کو