zulm kī Tahnī kabhī phaltī nahīñ

naav kāġhaz kī kahīñ chaltī nahīñ

zulm ki Tahni kabhi phalti nahin

naw kaghaz ki kahin chalti nahin

bādal aa.e haiñ ghir gulāl ke laal

kuchh kisī kā nahīñ kisī ko ḳhayāl

baadal aae hain ghir gulal ke lal

kuchh kisi ka nahin kisi ko KHayal

jhūTā kabhī na jhūTā hove

jhūTe ke aage sachchā rove

jhuTa kabhi na jhuTa howe

jhuTe ke aage sachcha rowe

hai ye duniyā jā-e-ibrat ḳhaak se insān kī

ban ga.e kitne subū kitne hī paimāne hue

hai ye duniya ja-e-ibrat KHak se insan ki

ban gae kitne subu kitne hi paimane hue

pā-bos-e-yār kī hameñ hasrat hai ai nasīm

āhista ā.īyo tū hamāre mazār par

pa-bos-e-yar ki hamein hasrat hai ai nasim

aahista aaiyo tu hamare mazar par

vo na aa.e to tū hī chal 'rañgīñ'

is meñ kyā terī shaan jaatī hai

wo na aae to tu hi chal 'rangin'

is mein kya teri shan jati hai

tā hashr rahe ye daaġh dil kā

yā-rab na bujhe charāġh dil kā

ta hashr rahe ye dagh dil ka

ya-rab na bujhe charagh dil ka

thā jahāñ mai-ḳhāna barpā us jagah masjid banī

TuuT kar masjid ko phir dekhā to but-ḳhāne hue

tha jahan mai-KHana barpa us jagah masjid bani

TuT kar masjid ko phir dekha to but-KHane hue

bas maiñ haiñ vo ġhair ke ham ko bulā sakte nahīñ

aur ham us jā kisī sūrat se jā sakte nahīñ

bas main hain wo ghair ke hum ko bula sakte nahin

aur hum us ja kisi surat se ja sakte nahin

man.a karte ho abas yaaro aaj

us ke ghar jā.eñge par jā.eñge ham

mana karte ho abas yaro aaj

us ke ghar jaenge par jaenge hum

jo tire paas se aatā hai meñ pūchhūñ huuñ yahī

kyoñ jī kuchh zikr hamārā bhī vahāñ rahtā hai

jo tere pas se aata hai mein puchhun hun yahi

kyon ji kuchh zikr hamara bhi wahan rahta hai