aawazon se jism hua nam

āvāzoñ se jism huā nam

jaise ik nā-bīnā sā ġham

hoñToñ meñ dariyā kā qatra

chādar meñ ḳhush-bū jaisā ḳham

ā.īnoñ kā rañg hamesha

aisā jaise hoñToñ meñ dam

kam hotī āñkhoñ ke bhītar

bīnā.ī ke shītal sargam

sar ūñchā ūñchī tanhā.ī

qadmoñ meñ begāna aadam

dariyā meñ uryāñ har lamha

bāhoñ ke andar bahtā yam

nam chehre ḳham hote chādar

chehroñ meñ yaksāñ hote sam

shab kī ik tanhā sīrat meñ

lab kī har dastak hotī kam

ik dastak dastak ko suntī

lohū kā sākit hotā ḳham

aawazon se jism hua nam

jaise ek na-bina sa gham

honTon mein dariya ka qatra

chadar mein KHush-bu jaisa KHam

aainon ka rang hamesha

aisa jaise honTon mein dam

kam hoti aankhon ke bhitar

binai ke shital sargam

sar uncha unchi tanhai

qadmon mein begana aadam

dariya mein uryan har lamha

bahon ke andar bahta yam

nam chehre KHam hote chadar

chehron mein yaksan hote sam

shab ki ek tanha sirat mein

lab ki har dastak hoti kam

ek dastak dastak ko sunti

lohu ka sakit hota KHam