agar kuchh hosh hum rakhte to mastane hue hote

agar kuchh hosh ham rakhte to mastāne hue hote

pahuñchte jā lab-e-sāqī kuuñ paimāne hue hote

abas in shahriyoñ meñ vaqt apnā ham kiye zaa.e

kisī majnūñ kī sohbat baiTh dīvāne hue hote

na rakhtā maiñ yahāñ gar ulfat-e-lailā nigāhoñ kuuñ

to majnūñ kī tarah aalam meñ afsāne hue hote

agar ham āshnā hote tirī begāna-ḳhūī siiñ

barā-e-maslahat zāhir meñ begāne hue hote

zi-bas kāfir-adāyoñ ne chalā.e sañg-e-be-rahmī

agar sab jam.a kartā maiñ to but-ḳhāne hue hote

na kartā zabt agar maiñ girya-e-be-iḳhtiyārī kuuñ

guzartā jis taraf ye puur vīrāne hue hote

nazar chashm-e-ḳharīdārī siiñ kartā dilbar-e-nādāñ

agar qatre mire aañsū ke durdāne hue hote

mohabbat ke nashe meñ ḳhaas insāñ vāste varna

farishte ye sharābeñ pī ki mastāne hue hote

evaz apne garebāñ ke kisī kī zulf haat aatī

hamāre haat ke panje magar shāne hue hote

tirī shamshīr-e-abrū siiñ hue sanmukh va illā na

ajal kī teġh siiñ jyuuñ aarā dandāne hue hote

maza jo āshiqī meñ hai so māshūqī meñ hargiz niiñ

'sirāj' ab ho chuke afsos parvāne hue hote

agar kuchh hosh hum rakhte to mastane hue hote

pahunchte ja lab-e-saqi kun paimane hue hote

abas in shahriyon mein waqt apna hum kiye zae

kisi majnun ki sohbat baiTh diwane hue hote

na rakhta main yahan gar ulfat-e-laila nigahon kun

to majnun ki tarah aalam mein afsane hue hote

agar hum aashna hote teri begana-KHui sin

bara-e-maslahat zahir mein begane hue hote

zi-bas kafir-adayon ne chalae sang-e-be-rahmi

agar sab jama karta main to but-KHane hue hote

na karta zabt agar main girya-e-be-iKHtiyari kun

guzarta jis taraf ye pur virane hue hote

nazar chashm-e-KHaridari sin karta dilbar-e-nadan

agar qatre mere aansu ke durdane hue hote

mohabbat ke nashe mein KHas insan waste warna

farishte ye sharaben pi ki mastane hue hote

ewaz apne gareban ke kisi ki zulf hat aati

hamare hat ke panje magar shane hue hote

teri shamshir-e-abru sin hue sanmukh wa illa na

ajal ki tegh sin jyun aara dandane hue hote

maza jo aashiqi mein hai so mashuqi mein hargiz nin

'siraj' ab ho chuke afsos parwane hue hote