an-kahe lafzon mein matlab DhunDhta rahta hun main

an-kahe lafzoñ meñ matlab DhūñDhtā rahtā huuñ maiñ

kyā kahā thā us ne aur kyā sochtā rahtā huuñ maiñ

yuuñ hī shāyad mil sake hone na hone kā surāġh

ab musalsal ḳhud ke andar jhāñktā rahtā huuñ maiñ

maut ke kaale samundar meñ ubharte Dūbte

barf ke tode kī sūrat Doltā rahtā huuñ maiñ

in fazāoñ meñ umaDtī phailtī ḳhushbū hai vo

in ḳhalāoñ meñ ravāñ, ban kar havā rahtā huuñ maiñ

jism kī do gaz zamīñ meñ dafn kar detā hai vo

kā.enātī had kī sūrat phailtā rahtā huuñ maiñ

dostoñ se sard-mehrī bhī mire bas meñ nahīñ

aur muravvat kī tapish meñ khaultā rahtā huuñ maiñ

ik dhamāke se na phaT jaa.e kahīñ merā vajūd

apnā laavā aap bāhar pheñktā rahtā huuñ maiñ

chain thā 'ḳhālid' to ghar kī chār-dīvārī meñ thā

resturānoñ meñ abas kyā DhūñDhtā rahtā huuñ maiñ

an-kahe lafzon mein matlab DhunDhta rahta hun main

kya kaha tha us ne aur kya sochta rahta hun main

yun hi shayad mil sake hone na hone ka suragh

ab musalsal KHud ke andar jhankta rahta hun main

maut ke kale samundar mein ubharte Dubte

barf ke tode ki surat Dolta rahta hun main

in fazaon mein umaDti phailti KHushbu hai wo

in KHalaon mein rawan, ban kar hawa rahta hun main

jism ki do gaz zamin mein dafn kar deta hai wo

kaenati had ki surat phailta rahta hun main

doston se sard-mehri bhi mere bas mein nahin

aur murawwat ki tapish mein khaulta rahta hun main

ek dhamake se na phaT jae kahin mera wajud

apna lawa aap bahar phenkta rahta hun main

chain tha 'KHalid' to ghar ki chaar-diwari mein tha

resturanon mein abas kya DhunDhta rahta hun main