apne riste hue zaKHmon ki qaba laya hun

apne riste hue zaḳhmoñ kī qabā laayā huuñ

zindagī merī taraf dekh ki maiñ aayā huuñ

kisī sunsān jazīre se pukāro mujh ko

maiñ sadāoñ ke samundar meñ nikal aayā huuñ

kaam aa.ī hai vahī chhāñv ghanī bhī jo na thī

vaqt kī dhuup meñ jis vaqt maiñ kumhlāyā huuñ

ḳhairiyat pūchhte haiñ log baḌe tanz ke saath

jurm bas ye hai ki ik shoḳh kā ham-sāya huuñ

sub.h ho jaa.e to us phuul ko dekhūñ ki jise

maiñ shabistān-e-bahārāñ se uThā laayā huuñ

asr-e-nau mujh ko nigāhoñ maiñ chhupā kar rakh le

ek miTtī huī tahzīb kā sarmāya huuñ

apne riste hue zaKHmon ki qaba laya hun

zindagi meri taraf dekh ki main aaya hun

kisi sunsan jazire se pukaro mujh ko

main sadaon ke samundar mein nikal aaya hun

kaam aai hai wahi chhanw ghani bhi jo na thi

waqt ki dhup mein jis waqt main kumhlaya hun

KHairiyat puchhte hain log baDe tanz ke sath

jurm bas ye hai ki ek shoKH ka ham-saya hun

subh ho jae to us phul ko dekhun ki jise

main shabistan-e-bahaaran se uTha laya hun

asr-e-nau mujh ko nigahon main chhupa kar rakh le

ek miTti hui tahzib ka sarmaya hun